ភ្នំពេញៈ ក្រសួងមហាផ្ទៃ ប្រកាសឲ្យមន្ត្រីរាជការថ្នាក់ជាតិ និងថ្នាក់ក្រោមជាតិ នៅតាមស្ថាប័ននានាចំណុះឲ្យក្រសួងមហាផ្ទៃដែលកំពុងប្រកបវិជ្ជាជីវៈជាមេធាវី ត្រូវជ្រើសរើសយកមុខងារណាមួយរវាងការបំពេញមុខងារជាអ្នករាជការសាធារណៈ ឬប្រកបវិជ្ជាជីវៈជាមេធាវី ដើម្បីចៀសវាងវិសមិតភាព ក្នុងការបំពេញការងារដែលផ្ទុយនឹងបទប្បញ្ញត្តិច្បាប់។
ការប្រកាសបែបនេះ ធ្វើឡើងបន្ទាប់ពីក្រសួងមហាផ្ទៃបានពិនិត្យឃើញថា កន្លងមកមានមន្ត្រីរាជការថ្នាក់ជាតិ និងថ្នាក់ក្រោមជាតិ ចំណុះក្រសួងមហាផ្ទៃ បានប្រកបវិជ្ជាជីវៈជាមេធាវី ខណៈពេលដែលពួកគេកំពុងបំពេញមុខងារសាធារណៈ។
សេចក្តីណែនាំស្ដីពីវិសមិតភាពក្នុងការបំពេញមុខងាររបស់មន្ដ្រីរាជការ ក្រសួងមហាផ្ទៃចុះថ្ងៃទី ៥ សីហា និងទើបត្រូវបានផ្សព្វផ្សាយ កាលពីពេលថ្មីៗនេះបានឲ្យដឹងថា ស្ថានភាពមន្ត្រីរាជការបែបនេះ ផ្ទុយនឹងបទប្បញ្ញត្តិច្បាប់ និងលិខិតបទដ្ឋានគតិយុត្តស្តីពីការគ្រប់គ្រងមន្ត្រីរាជការស៊ីវិល មន្ត្រីនគរបាលជាតិ មន្ត្រីពន្ធនាគារ និងច្បាប់ស្តីពីលក្ខន្តិកៈមេធាវី។
ក្រសួងមហាផ្ទៃបញ្ជាក់ថា៖ «ដើម្បីចៀសវាងការបំពេញមុខងារសាធារណៈផង និងប្រកបវិជ្ជាជីវៈជាមេធាវីផង ក្រសួងមហាផ្ទៃ សូមធ្វើការណែនាំចំពោះមន្ដ្រីរាជការចំណុះក្រសួងមហាផ្ទៃត្រូវជ្រើសរើសយកការបំពេញមុខងារជាអ្នករាជការសាធារណៈ ឬប្រកបវិជ្ជាជីវៈជាមេធាវី»។
លោក ស ខេង រដ្ឋមន្ត្រីក្រសួងមហាផ្ទៃ បានលើកឡើងនៅក្នុងសេចក្តីណែនាំដដែលថា ក្នុងករណីដែលមន្ដ្រីរាជការថ្នាក់ជាតិ និងថ្នាក់ក្រោមជាតិចំណុះក្រសួងមហាផ្ទៃដែលមិនចង់បន្តប្រកបវិជ្ជាជីវៈជាមេធាវីគឺត្រូវធ្វើសំណើទៅគណៈមេធាវីកម្ពុជា ដើម្បីស្នើសុំស្ថិតក្នុងស្ថានភាពមេធាវីសុំមិនប្រកបវិជ្ជាជីវៈ ឬសុំនៅក្រៅបញ្ជីនៃគណៈមេធាវីស្របតាមគោលការណ៍បែបបទនីតិវិធី និងច្បាប់ជាធរមាន។
លោកបន្តថា បន្ទាប់ពីទទួលបានសេចក្ដីសម្រេចស្ដីពីការអនុញ្ញាតឲ្យដាក់ក្នុងស្ថានភាពមេធាវីសុំមិនប្រកបវិជ្ជាជីវៈ ឬសេចក្ដីសម្រេចស្ដីពីការដាក់ឲ្យនៅក្រៅបញ្ជីនោះសាមីមន្ដ្រីរាជការត្រូវថតចម្លងសេចក្ដីសម្រេចនោះយកទៅដាក់ជូនអង្គភាពសាមី និងអង្គភាពគ្រប់គ្រងបុគ្គលិក ដើម្បីតម្កល់ទុកជាឯកសារ និងងាយស្រួលក្នុងការគ្រប់គ្រងទិន្នន័យមន្ដ្រីរាជការដែលមានវិជ្ជាជីវៈជាមេធាវី។
លោក ស ខេង បន្តថា ចំពោះមន្ដ្រីរាជការថ្នាក់ជាតិ និងថ្នាក់ក្រោមជាតិចំណុះក្រសួងមហាផ្ទៃដែលមានបំណងចង់បន្តវិជ្ជាជីវៈជាមេធាវី ហើយចង់បោះបង់តួនាទីជាមន្ត្រីរាជការគឺត្រូវដាក់ពាក្យស្នើសុំលាឈប់ពីអ្នករាជការសាធារណៈ ស្របតាមគោលការណ៍បែបបទនីតិវិធី និងច្បាប់ជាធរមាន។
លោកបញ្ជាក់ថា៖ «ក្នុងករណីមិនចង់លាឈប់ពីអ្នករាជការសាធារណៈសាមីខ្លួនអាចដាក់ពាក្យស្នើសុំស្ថិតក្នុងភាពទំនេរគ្មានបៀវត្សរ៍ ដើម្បីទៅប្រកបវិជ្ជាជីវៈជាមេធាវី ស្របតាមគោលការណ៍ បែបបទនីតិវិធី និងច្បាប់ជាធរមាន»។
ក្រៅពីប្រកាសណែនាំយ៉ាងដូច្នេះលោក ស ខេង ក៏បានបញ្ជាឲ្យគ្រប់អង្គភាពនៅថ្នាក់ជាតិ និងថ្នាក់ក្រោមជាតិ ចំណុះក្រសួងមហាផ្ទៃទាំងអស់ត្រូវចាត់ឲ្យមានការស្រាវជ្រាវ និងរៀបចំបញ្ជីឈ្មោះមន្ដ្រីរាជការដែលប្រកបវិជ្ជាជីវៈជាមេធាវី អំឡុងពេលពួកគេកំពុងបំពេញមុខងារក្នុងក្របខ័ណ្ឌមន្ដ្រីរាជការស៊ីវិលមន្ដ្រីនគរបាលជាតិ និងមន្ដ្រីពន្ធនាគារនៃក្រសួងមហាផ្ទៃ។
លោក លីវ សុវណ្ណា អគ្គលេខាធិការរង គណៈមេធាវីបានប្រាប់ភ្នំពេញប៉ុស្តិ៍ពីម្សិលមិញថា រហូតមកទល់ថ្ងៃអាទិត្យម្សិលមិញ គណៈមេធាវីមិនទាន់ទទួលបានសំណើណាមួយពីមន្ត្រីរាជការក្នុងក្រសួងមហាផ្ទៃស្នើមកដើម្បីសុំស្ថិតក្នុងស្ថានភាពមេធាវីសុំមិនប្រកបវិជ្ជាជីវៈ ឬសុំនៅក្រៅបញ្ជីនៃគណៈមេធាវីនោះទេ។
លោកបន្តថា យោងតាមច្បាប់គឺមេធាវីមិនអាចបំពេញមុខងារផ្សេងទៀត ក្នុងអំឡុងពេលដែលខ្លួនកំពុងបំពេញមុខងារជាមេធាវីបាននោះទេ ព្រោះវាអាចបង្កជាទំនាស់ផលប្រយោជន៍ដែលច្បាប់បានហាមប្រាម។
លោកបញ្ជាក់ថា៖ «តាមផ្លូវច្បាប់គឺមេធាវីមិនអាចធ្វើការងារផ្សេងបានទេ ព្រោះច្បាប់បានហាម ហើយការហាមបែបនេះ ព្រោះមានបញ្ហាខ្លះដែរ។ វិជ្ជាជីវៈមេធាវី គឺវិជ្ជាជីវៈសេរី ហើយបើគាត់ធ្វើជាមេធាវីផង ហើយគាត់ទៅកាន់ការមួយទៀត ដែលជះឥទ្ធិពលដល់មេធាវីផងនឹងធ្វើឲ្យបាត់ភាពយុត្តិធម៌»។
ជាមួយនឹងការអះអាងយ៉ាងដូច្នេះលោក លីវ សុវណ្ណា មិនត្រឹមតែចង់ឲ្យក្រសួងមហាផ្ទៃធ្វើការត្រួតពិនិត្យឲ្យបានហ្មត់ចត់ចំពោះករណីនេះនោះទេ លោក ក៏ស្នើដល់ស្ថាប័នរដ្ឋដទៃទៀតគួរមានការស្រាវជ្រាវឲ្យបានច្បាស់លាស់ចំពោះមន្ត្រីរបស់ខ្លួនថា តើមានជាប់ពាក់ព័ន្ធនឹងតួនាទីជាមេធាវីដែរឬអត់?
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាគាំទ្រចំពោះចំណាត់ការរបស់ក្រសួងមហាផ្ទៃក្នុងការណែនាំឲ្យមន្ត្រីរាជការត្រូវធ្វើខ្លួនឲ្យដាច់ស្រឡះរវាងការងារជាមន្ត្រីរាជការ និងធ្វើជាមេធាវីតាមវិជ្ជាជីវៈ។ លោកបន្តថា ការជ្រើសរើសអាជីពណាមួយច្បាស់លាស់គឺជានីតិវិធីមួយដែលល្អដើម្បីឲ្យបុគ្គលនីមួយៗមានពេលវេលា និងការទទួលខុសត្រូវពេញលេញ ក្នុងការប្រកបការងាររបស់ខ្លួន។
លោក ប៉ា ច័ន្ទរឿន ក៏សង្កេតឃើញដែរថា ករណីដូចគ្នានេះក៏កើតមាននៅតាមក្រសួងដទៃទៀតផងដែរ ដោយមិនមែនមានតែនៅក្នុងក្រសួងមហាផ្ទៃនោះទេ ដែលទាមទារឲ្យមានវិធានការ និងពិនិត្យមើលឡើងវិញ ដើម្បីធ្វើការកែប្រែស្ថានភាពអាក្រក់នេះនៅក្នុងស្ថាប័នរដ្ឋ។
លោកបានបញ្ជាក់ថា៖ «ការជ្រើសរើសអាជីពណាមួយច្បាស់លាស់គឺធ្វើឲ្យគាត់មានពេលពេញលេញ និងចៀសពីទំនាស់ផលប្រយោជន៍រវាងស្ថាប័នផ្សេងគ្នា ហើយប្រសិនបើមានកិច្ចការងារណាមួយដែលពាក់ព័ន្ធនឹងការងារគាត់ គឺគាត់អាចបង្កើតឲ្យមានជាទំនាស់ផលប្រយោជន៍ ដែលឈានទៅដល់ការធ្វើអំពើពុករលួយក៏មានដែរ»៕
វីដេអូ៖