.jpg)
លោក ស ខេង ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ថ្លែងនាពេលកន្លងមក។ ហ៊ាន រង្សី
ភ្នំពេញ: ក្រសួងមហាផ្ទៃបានណែនាំពីការជ្រើសរើសបុគ្គលិកក្រៅក្របខ័ណ្ឌរដ្ឋរបស់រដ្ឋបាលឃុំ-សង្កាត់ (ជំនួយការរដ្ឋបាលឃុំ-សង្កាត់) ដើម្បីធានាឱ្យរដ្ឋបាលឃុំ-សង្កាត់អាចជ្រើសរើសអ្នកមានសមត្ថភាព និងបទពិសោធទៅបម្រើការងារដោយប្រសិទ្ធភាព គណនេយ្យភាព និងតម្លាភាព។
សេចក្ដីណែនាំដែលចុះហត្ថលេខាដោយលោក ស ខេង ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃចុះថ្ងៃទី ២៤ ខែធ្នូដែលភ្នំពេញប៉ុស្ដិ៍ទទួលបានពីម្សិលមិញឱ្យដឹងថា ដើម្បីធានាឱ្យរដ្ឋបាលឃុំ-សង្កាត់អាចជ្រើសរើសបានបុគ្គលិកក្រៅក្របខ័ណ្ឌរដ្ឋដែលមានសមត្ថភាព និងបទពិសោធសម្រាប់បម្រើការងារជូនរដ្ឋបាលឃុំ-សង្កាត់ប្រកបដោយប្រសិទ្ធភាព គណនេយ្យភាព និងតម្លាភាព ក្រសួងមហាផ្ទៃសូមធ្វើការណែនាំអំពីគោលការណ៍ និងនីតិវិធីក្នុងការជ្រើសរើសបុគ្គលិកក្រៅក្របខ័ណ្ឌរដ្ឋរបស់រដ្ឋបាលឃុំ-សង្កាត់មួយចំនួន។
សេចក្ដីណែនាំបន្តថា បុគ្គលិកក្រៅក្របខ័ណ្ឌរដ្ឋរបស់រដ្ឋបាលឃុំ-សង្កាត់ ដែលគេហៅថា «ជំនួយការរដ្ឋបាលឃុំ-សង្កាត់» សំដៅដល់បុគ្គលិកមិនមែនជាមន្ត្រីរាជការស៊ីវិល។ រដ្ឋបាលឃុំ សង្កាត់អាចជ្រើសរើសជំនួយការរដ្ឋបាលឃុំ សង្កាត់តាមចំនួនកំណត់ដូចជារដ្ឋបាលឃុំ-សង្កាត់ដែលមានក្រុមប្រឹក្សាចំនួន ៥ រូប ដល់ ៧ រូប អាចជ្រើសរើសជំនួយការរដ្ឋបាលឃុំ-សង្កាត់យ៉ាងច្រើនចំនួន ២ រូប។ ចំណែករដ្ឋបាលឃុំ-សង្កាត់ដែលមានក្រុមប្រឹក្សាពីចំនួន ៩ រូប ដល់ ១១ រូប អាចជ្រើសរើសជំនួយការរដ្ឋបាលឃុំ សង្កាត់យ៉ាងច្រើនចំនួន ៣ រូប។
សេចក្ដីណែនាំបញ្ជាក់ថា៖ «ចំពោះប្រាក់កម្រៃប្រចាំខែរបស់ជំនួយការរដ្ឋបាលឃុំ-សង្កាត់ ត្រូវបានកំណត់ដោយក្រុមប្រឹក្សាឃុំ-សង្កាត់សាមី អនុលោមតាមបទប្បញ្ញត្តិជាធរមាន។ ជំនួយការរដ្ឋបាលឃុំ-សង្កាត់មានសិទ្ធិទទួលបានប្រាក់ឧបត្ថម្ភផ្សេងៗស្របតាមច្បាប់ និងលិខិតបទដ្ឋានជាធរមាន»។
សេចក្ដីណែនាំបន្តថា លក្ខខណ្ឌនៃការជ្រើសរើសជំនួយការរដ្ឋបាលឃុំ-សង្កាត់ត្រូវបានធ្វើឡើងតាមរយៈការប្រឡងប្រជែងដោយផ្អែកតាមគោលការណ៍តម្លាភាព យុត្តិធម៌ សមធម៌ និងគុណសម្បត្តិស័ក្តិសម។ ការប្រឡងត្រូវបានផ្ដល់អាទិភាពដល់បេក្ខជនជាស្ត្រី ជនជាតិដើមភាគតិច ជនមានពិការភាព និងបេក្ខជនមានលំនៅឋានអចិន្រៃ្តយ៍នៅក្នុងឃុំ-សង្កាត់ដែលត្រូវជ្រើសរើសបុគ្គលិកនោះ។
ជំនួយការរដ្ឋបាលឃុំ-សង្កាត់ត្រូវបានជ្រើសរើសឱ្យបំពេញការងារសម្រាប់រយៈពេលយ៉ាងតិច ៣ ខែ និងយ៉ាងច្រើន ១២ ខែក្នុង ១ ឆ្នាំ ហើយអាចបន្តការងារតាមសេចក្ដីត្រូវការរបស់រដ្ឋបាលឃុំ-សង្កាត់ ឬតាមលិខិតបទដ្ឋាននានាជាធរមាន។
លោក ខៀវ សុភ័គ អ្នកនាំពាក្យក្រសួងមហាផ្ទៃមិនទាន់អាចទាក់ទងសុំការបញ្ជាក់បន្ថែមជុំវិញសេចក្ដីណែនាំនេះបានទេកាលពីម្សិលមិញ។
បើតាមសេចក្ដីណែនាំរបស់ក្រសួងមហាផ្ទៃក្រៅពីករណីខាងលើនេះ រដ្ឋបាលឃុំ- សង្កាត់ អាចជ្រើសរើសជំនួយការរដ្ឋបាលឃុំ-សង្កាត់បន្ថែមទៀតបាន ក្នុងករណីមានការគាំទ្រថវិកាពីស្ថាប័នពាក់ព័ន្ធ និងអង្គការដៃគូ ឬសប្បុរសជននានា។
ការជ្រើសរើសបុគ្គលិកបន្ថែមនេះ ត្រូវមានលក្ខណៈស្របតាមតម្រូវការចាំបាច់ផ្នែកជំនាញជាក់លាក់ និងតាមទំហំការងារជាក់ស្ដែងរបស់រដ្ឋបាលឃុំ- សង្កាត់ ដោយត្រូវអនុវត្តតាមគោលការណ៍ នីតិវិធីដែលមានចែងក្នុងសេចក្ដីណែនាំនេះ។
លោក ឌុច ច័ន្ទ មេឃុំអរិយក្សត្រស្រុកល្វាឯម ខេត្តកណ្ដាល បានថ្លែងកាលពីម្សិលមិញថា រដ្ឋបាលឃុំអរិយក្សត្របច្ចុប្បន្នមានជំនួយការរដ្ឋបាលឃុំម្នាក់ ដោយគ្រោងនឹងជ្រើសរើសជំនួយការរដ្ឋបាលម្នាក់ទៀត ដើម្បីជួយសម្រួលការងារផ្នែកហិរញ្ញវត្ថុនៅក្នុងឃុំអរិយក្សត្រ។
ជំនួយការឃុំអាចជួយកិច្ចការរដ្ឋបាលជាច្រើនដោយសារគាត់មានសមត្ថភាពបំពេញការងាររដ្ឋបាល។ លោកបញ្ជាក់ថា៖ «កន្លងមកគាត់ (ជំនួយការ) ជួយកិច្ចការរដ្ឋបាលគឺគាត់ជួយសរសេរ ឬចម្លងលិខិត ឬឯកសារមួយចំនួននៅពេលដែលខ្ញុំជាប់រវល់ ប៉ុន្ដែថ្មីៗនេះ ខ្ញុំក៏ប្រាប់ឱ្យគាត់ជួយធ្វើកិច្ចការទាក់ទងសរសេរអត្រានុកូលដ្ឋានជូនប្រជាពលរដ្ឋបន្ថែមទៀត»។
លោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា (ANSA) កាលពីម្សិលមិញបានគាំទ្រឱ្យមានបុគ្គលិកទាំងក្រៅក្របខ័ណ្ឌ និងក្នុងក្របខ័ណ្ឌក្នុងកម្រិតថ្នាក់ឃុំ -សង្កាត់ឱ្យមានច្រើនជាងនេះដើម្បីជួយសម្រួលដល់ការងារនៅមូលដ្ឋាន ប៉ុន្ដែអ្វីដែលគួរឱ្យកត់សម្គាល់ ថាតើសមត្ថភាពរបស់មេឃុំ ឬចៅសង្កាត់អាចគ្រប់គ្រងបុគ្គលិករបស់ខ្លួនបានកម្រិតណា។
លោកបញ្ជាក់ថា៖ «បើសិនជាមានបុគ្គលិកច្រើន ឬមានបុគ្គលិកពូកែ ទាល់តែមេដឹកនាំហ្នឹងពូកែទាំងរដ្ឋបាល ពូកែទាំងភាពជាអ្នកដឹកនាំ និងពូកែទាំងជំនាញដែរ អ៊ីចឹងជំនាញគ្រប់គ្រងនៅឃុំ-សង្កាត់មិនមែនផ្ដេកផ្ដួលតែទៅលើស្មៀនម្នាក់ទេ។ អ៊ីចឹងបើមានមនុស្សពូកែៗធ្វើការនៅឃុំ-សង្កាត់ គឺធ្វើឱ្យការងារនៅទីនោះមានប្រសិទ្ធភាព។ បើមានគ្នាច្រើន គឺទាល់តែចេះដឹកនាំ បើមិនអ៊ីចឹងទេ ដូចពាក្យចាស់ថា មានគ្នាច្រើន តែនំអន្សមខ្លោច»។
បើតាមលោក សន ជ័យ ការប្រឡងជ្រើសរើសជំនួយការឃុំ សង្កាត់នេះ ត្រូវធ្វើឱ្យមានតម្លាភាព យុត្តិធម៌ និងសមភាព ដោយចៀសវាងការជ្រើសរើសបក្ខពួកសាច់ញាតិ ឬអ្នកស្គាល់គ្នា។ លោកបានលើកឡើងថាការជ្រើសរើសបែបបក្ខពួកនិយមនេះ ជាជំងឺរ៉ាំរ៉ៃក្នុងសង្គមកម្ពុជាកន្លងមក។ ដូច្នេះត្រូវទាមទារឱ្យមានការពិនិត្យតាមដាន និងយកចិត្តទុកដាក់ឱ្យបានច្បាស់លាស់ជាងមុន ដើម្បីបើកឱកាសឱ្យមានការប្រកួតប្រជែងគ្នាដោយយុត្តិធម៌។
មិនអាចទាក់ទងមន្ត្រីក្រសួងមហាផ្ទៃផ្សេងទៀតដើម្បីសុំការបញ្ជាក់ពីនីតិវិធីក្នុងការជ្រើសរើសជំនួយការឃុំ-សង្កាត់នេះបានទេពីម្សិលមិញ៕
វីដេអូ៖
