ក្រសួងមហាផ្ទៃ និងអង្គការតម្លាភាពកម្ពុជា បានចុះហត្ថលេខាលើអនុស្សរណៈនៃការយោគយល់គ្នា ដើម្បីបន្តកិច្ចសហប្រតិបត្តិការរយៈពេល ៥ ឆ្នាំ ក្នុងដំណាក់កាលទី២ ក្នុងទិសដៅអនុវត្ត «គម្រោងសាលាអភិបាលកិច្ច» ដែលចាប់ផ្តើមពីឆ្នាំ ២០២១ ដល់ឆ្នាំ ២០២៥។
កម្មវិធីចុះហត្ថលេខាលើអនុស្សរណៈនេះ ធ្វើនៅសណ្ឋាគាហ៊ីម៉ាវ៉ារីភ្នំពេញព្រឹកមិញ ដោយមានអ្នកចូលរួមជាមន្ត្រីរដ្ឋាភិបាល និងមន្ត្រីសង្គមស៊ីវិលជាច្រើនរូប។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជាប្រាប់ ភ្នំពេញ ប៉ុស្តិ៍ នៅថ្ងៃនេះថា គោលបំណងនៃការសហការគ្នានេះ គឺដើម្បីរួមគ្នាកសាងសមត្ថភាពមន្ត្រីសាធារណៈ និងអ្នកផ្តល់សេវាជុំវិញប្រធានបទអភិបាលកិច្ចល្អនិងសុចរិតភាព សម្រាប់ការចូលរួមពង្រឹងការផ្តល់សេវាសាធារណៈឲ្យកាន់តែមានប្រសិទ្ធភាព និងគុណភាព។
លោកថ្លែងថា៖ «គម្រោងថ្មីនេះក៏នឹងជួយជំរុញដល់ការរីកចម្រើនខាងបច្ចេកវិទ្យាផងដែរ។ នៅពីក្រោយការកសាងសមត្ថភាពនៃការផ្តល់សេវាសាធារណៈ កសាងសមត្ថភាពពលរដ្ឋ និងយុវជន គម្រោងនេះ នឹងផ្តល់ឲ្យពួកគេ នូវទម្រង់កម្មវិធីឌីជីថលមួយដែលភ្ជាប់ទំនាក់ទំនងនូវអ្វីដែលពួកគេត្រូវការ និងមានទំនួលខុសត្រូវក្នុងការផ្តល់ ឬទទួលបានសេវាសាធារណៈ»។
រដ្ឋលេខាធិការក្រសួងមហាផ្ទៃ លោក ងី ច័ន្រ្ទផល ប្រាប់ ភ្នំពេញ ប៉ុស្តិ៍ នៅថ្ងៃនេះថា មានសមិទ្ធផលជាច្រើន ដែលបានកើតចេញពីគម្រោងនេះ ដើម្បីឲ្យប្រសើរឡើងនូវការផ្តល់សេវាសាធារណៈដល់ប្រជាពលរដ្ឋ។ ជាពិសេសសមត្ថភាពមន្ត្រី ដែលជាអ្នកបម្រើសេវា។
លោកបន្តថា ដោយសារតែកម្ពុជាកំពុងស្ថិតក្នុងវិបត្តិកូវីដ ១៩ គម្រោងថ្មីនេះ នឹងអាចរកមធ្យោបាយថ្មីបន្ថែមទៀត តាមរយៈការផ្តល់សេវាតាមប្រព័ន្ធឌីជីថល ដើម្បីធ្វើយ៉ាងណាឲ្យការផ្តល់សេវាជូនពលរដ្ឋកាន់តែមានប្រសិទ្ធភាព។
លោកបញ្ជាក់ថា៖ «នេះគឺជារឿងមួយសំខាន់ ដែលមានការចូលរួមចំណែករបស់ដៃគូអភិវឌ្ឍន៍ ក៏ដូចជាអង្គការសង្គមស៊ីវិលនៅកម្ពុជា ដើម្បីគាំទ្រដល់ការធ្វើកំណែទម្រង់របស់រដ្ឋាភិបាល ក្នុងការជំរុញអភិបាលកិច្ច ធានាឲ្យមានប្រសិទ្ធភាពរឹងមាំបន្ថែមទៀត»។
លោក ងី ច័ន្រ្ទផល បន្ថែមថា តាមរយៈកិច្ចសហប្រតិបត្តិការក្នុងដំណាក់កាលទី១ គម្រោងនេះបានចូលរួមពង្រឹងសមត្ថភាពរបស់មន្ត្រីសាធារណៈកម្ពុជាជាច្រើន តាមរយៈការចុះបណ្តុះបណ្តាល ការអប់រំផ្សព្វផ្សាយ។ ជាពិសេសការឃ្លាំមើលជាប្រចាំនូវការអនុវត្តច្បាប់ និងសកម្មភាពនៃការផ្តល់សេវាសាធារណៈជូនពលរដ្ឋនៅតាមមូលដ្ឋាន។
កាលពីឆ្នាំ ២០១៦ អង្គការតម្លាភាព និងក្រសួងមហាផ្ទៃ បានចុះហត្ថលេខាលើអនុស្សរណៈនៃការយោគយល់គ្នាម្តងរួចមកហើយ ស្តីពីគម្រោងសាលាអភិបាលកិច្ច ដំណាក់កាលទី១ ដែលបានអនុវត្តរយៈពេល ៥ ឆ្នាំ ចាប់ពីឆ្នាំ ២០១៦ ដល់ឆ្នាំ ២០២០។
តាមរយៈគម្រោងដំណាក់កាលទី១ នេះ អង្គការតម្លាភាពអះអាងថាមន្ត្រីដែលបម្រើការនៅការិយាល័យច្រកចេញចូលតែមួយចំនួន ២៥ រាជធានី-ខេត្ត ត្រូវបានទទួលការបណ្តុះបណ្តាលអំពីការផ្តល់សេវាសាធារណៈជូនប្រជាពលរដ្ឋ។ ក្នុងនោះ ការបណ្តុះបណ្តាលទៅកាន់មន្ត្រីទាំងនេះ ក៏បានធ្វើឡើងនៅតាមការិយាល័យច្រកចេញចូលតែមួយ នៅតាមទីក្រុងចំនួន ៨ ផងដែរ។
បន្ថែមពីនេះ ការបណ្តុះបណ្តាលអំពីគម្រោងអភិបាលកិច្ច និងការផ្តល់សេវាសាធាធារណៈ ក៏បានធ្វើឡើងទៅកាន់ក្រុមគោលដៅចំនួន ៥២ ក្នុងនោះមន្ត្រី និងពលរដ្ឋសរុបជិត ១ ០០០ នាក់ បានទទួលផលអំពីសារប្រយោជន៍នៃការកសាងសមត្ថភាពក្នុងការបណ្តុះបណ្តាលនេះ។ នេះបើតាមការអះអាងរបស់អង្គការតម្លាភាព។
លោក ប៉ិច ពិសី និងលោក ងី ច័ន្ទផល រំពឹងរួមគ្នាថា គម្រោងដំណាក់ការទី២ ដែលនឹងបន្តអនុវត្តចាប់ពីពេលនេះ នឹងនាំឲ្យក្រសួងមហាផ្ទៃ និងអង្គការតម្លាភាព អនុវត្តសកម្មភាពដែលមិនទាន់សម្រេចបានក្នុងដំណាក់កាលទី១ ឲ្យទទួលបានជោគជ័យ ជាពិសេសគឺដោះស្រាយរាល់បញ្ហាប្រឈមចំពោះមុខជុំវិញការផ្តល់សេវាសាធារណៈនៅទូទាំងប្រទេស៕