.jpg)
លោក ស ខេង ថ្លែងនៅក្នុងក្រសួងមហាផ្ទៃកន្លងមក។ ផា លីណា
ភ្នំពេញៈ អគ្គនាយកដ្ឋានរដ្ឋបាលនៃក្រសួងមហាផ្ទៃ និងអង្គការសង្គមស៊ីវិល នឹងរួមគ្នាធ្វើជំរឿនទៅលើអង្គការសង្គមស៊ីវិលដែលកំពុងធ្វើសកម្មភាពជាក់ស្ដែងនៅក្នុងប្រទេសកម្ពុជាដើម្បីរកចំនួនអ្នកដែលបានចុះបញ្ជីច្បាស់លាស់សម្រាប់ជួយពង្រឹងកិច្ចសហប្រតិបតិ្តការ និង ភាពជាដៃគូជាមួយរាជរដ្ឋាភិបាលក្នុងការអភិវឌ្ឍ។ លោក ប្រាក់ សំអឿន អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃប្រាប់ភ្នំពេញប៉ុស្តិ៍កាលពីម្សិលមិញ។
លោក ប្រាក់ សំអឿន ថ្លែងថា អគ្គនាយកដ្ឋានរដ្ឋបាលនៃក្រសួងមហាផ្ទៃ និងអង្គការសង្គមស៊ីវិលនឹងចុះទៅតាមមូលដ្ឋានរួមគ្នាដើម្បីសិក្សាថាតើអង្គការសង្គមស៊ីវិលដែលបានចុះបញ្ជីមានចំនួនពិតប្រាកដប៉ុន្មាន? និងថាតើសមាគម និងអង្គការមិនមែនរដ្ឋាភិបាលចំនួនប៉ុន្មាន កំពុងធ្វើសកម្មភាព ដើម្បីបង្កភាពងាយស្រួលនៅក្នុងការសហការជាមួយគ្នា។
លោក ប្រាក់ សំអឿន បានបញ្ជាក់ថា៖ «យើងមិនទាន់បានចាប់ផ្តើមទេ តែយើងមាន MoU រវាងអគ្គនាយកដ្ឋានរដ្ឋបាលជាមួយនឹងអង្គការ CCC (អង្គការគណៈកម្មាធិការសហប្រតិបត្តិការដើម្បីកម្ពុជា) យើងនឹងជជែកគ្នាចាប់ផ្តើមនៅពេលណា ហើយថា ត្រូវធ្វើអ្វីខ្លះ យើងមានគម្រោងបែបនេះ យើងងាយស្រួលនៅក្នុងការគាំទ្រ និងសហការគ្នា ហើយនៅពេលដែល យើងដឹងចំនួនពិតប្រាកដវានឹងងាយស្រួលក្នងការធ្វើការងារ»។
លោកបញ្ជាក់ថា គម្រោងធ្វើជំរឿនរួមគ្នានេះកើតឡើងក្រោយពេលដែលក្រសួងមហាផ្ទៃទទួលបានរបាយការណ៍ប្រចាំឆ្នាំរបស់អង្គការមិនមែនរដ្ឋាភិបាលចំនួនតែជាង ២ ០០០ ប៉ុណ្ណោះ ក្នុងចំណោមជាង ៥ ៥០០ អង្គការ ហើយអង្គការមួយចំនួនក៏បានបិទទ្វារដោយមិនបានដឹងថា ទៅណា ឬធ្វើសកម្មភាពអ្វីទេ។
យោងតាមរបាយការណ៍របស់អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃបានឲ្យដឹងថា គិតត្រឹមដំណាច់ឆ្នាំ ២០១៨ មានសមាគម និងអង្គការមិនមែនរដ្ឋាភិបាលក្នុងស្រុកបានតម្កល់សំណុំឯកសារ និងចុះបញ្ជីនៅក្រសួងមហាផ្ទៃ មានចំនួនសរុប ៥ ៥២៣ ដែលក្នុងនោះសមាគមមានចំនួន ២ ២៩៧ សមាគម ខណៈពេលដែលមានតែសមាគម និងអង្គការមិនមែនរដ្ឋាភិបាលប្រមាណជាង ២ ០០០ ស្ថាប័នប៉ុណ្ណោះដែលបានធ្វើសកម្មភាព។
លោក សឿង សារឿន ប្រធានអង្គការគណៈកម្មាធិការសហប្រតិបត្តិការដើម្បីកម្ពុជាបានអះអាងថា ការធ្វើជំរឿននឹងចាប់ផ្ដើមពីពេលបច្ចុប្បន្នរហូតទៅដល់ដំណាច់ខែតុលា ឆ្នាំ ២០១៩ ខាងមុខនេះ។ ការធ្វើជំរឿននេះនឹងជួយធ្វើឲ្យក្រសួងមហាផ្ទៃនិងអង្គការសង្គមស៊ីវិលមានទិន្នន័យពិតប្រាកដពីចំនួនអង្គការសង្គមស៊ីវិល នឹងជួយពង្រឹងទំនាក់ទំនងរវាងអង្គការសង្គមស៊ីវិល និងក្រសួងមហាផ្ទៃ។
លោក សឿង សារឿន បញ្ជាក់ថា៖ «យើងបានចាប់ផ្តើមរៀបចំពីពេលនេះទៅហើយ យើងកំពុងរៀបចំផែនការចុះអនុវត្តជាក់ស្តែងតាមមូលដ្ឋាន យើងកំពុងរៀបចំក្រុមការងារ និងរៀបចំផែនការជាមួយក្រសួងដើម្បីដាក់គម្រោងថា ទៅខេត្តណារឿងសំខាន់ យើងចង់ធ្វើបច្ចុប្បន្នភាពអង្គការមិនមែនរដ្ឋាភិបាលដែលបានចុះបញ្ជីជាមួយក្រសួងហើយប៉ុន្មានដែលកំពុងប្រតិបត្តិការជាក់ស្តែង និងប៉ុន្មានដែលកំពុងធ្វើសកម្មភាពដើម្បីបង្កើនភាពជាដៃគូឲ្យកាន់តែរឹងមាំជាពិសេសអង្គការកំពុងសហប្រតិបត្តិការ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាបានថ្លែងថាការធ្វើជំរឿនសមាគម និងអង្គការមិនមែនរដ្ឋាភិបាលជាផ្នែកមួយនៃវិធានការច្បាប់ដែលធ្វើឡើងដើម្បីធ្វើការសិក្សាស្វែងយល់ពីសមាគម និងអង្គការមិនមែនរដ្ឋាភិបាល ដោយសារតែកន្លងមកមានសមាគម និងអង្គការមិនមែនរដ្ឋាភិបាលមួយចំនួនបានធ្វើសកម្មភាពផ្ទុយទៅនឹងច្បាប់ និងលក្ខន្តិកៈរបស់ខ្លួន។
ដូច្នេះក្រសួងមហាផ្ទៃមានសមត្ថកិច្ច ក្នុងការស៊ើបអង្កេតក្នុងការអនុវត្តរបស់សមាគម និងអង្គការមិនមែនរដ្ឋាភិបាលទាំងអស់ដើម្បីធានាថា ពួកគេអនុវត្តតាមលក្ខន្តិកៈដែលបានតម្កល់ទុក ហើយធានាថាពួកគេធ្វើតាមគោលដៅរបស់គេដែលមិនប៉ះពាល់សន្តិសុខសណ្តាប់ធ្នាប់សាធារណៈ ឬស្ថិរភាពសង្គម។ ខណៈសមាគម និងអង្គការមិនមែនរដ្ឋាភិបាលមួយចំនួនបានបើកអាជីវកម្មរកស៊ីនិងរកប្រាក់ចំណេញដើម្បីផលប្រយោជន៍បុគ្គលតែប៉ុណ្ណោះ។ លើសពីនោះប្រទេសមហាអំណាចណាខ្លះបានប្រើប្រាស់អង្គការសង្គមស៊ីវិលដោយភ្ជាប់នូវរបៀបវារៈនយោបាយរបស់ខ្លួនដែលមានចេតនាចង់ធ្វើការផ្លាស់ប្តូររដ្ឋាភិបាល។
លោកថា៖ «អង្គការសង្គមស៊ីវិលមួយចំនួន គាត់បើកដូចជាមុខរបរ អង្គការខ្លះឬសមាគមខ្លះគឺបើកមុខរបរមួយដើម្បីរកស៊ី ដើម្បីផលប្រយោជន៍បុគ្គលប៉ុន្មាននាក់ ដែលជាថ្នាក់ដឹកនាំអង្គការ និងសមាគម និងទី៣ មានការជួយពីប្រទេសមហាអំណាចណាមួយ នោះដែលប្រើប្រាស់យន្តការនេះដើម្បីភ្ជាប់នូវរបៀបវារៈនយោបាយរបស់ខ្លួនតាមរយៈអង្គការនិងសមាគមទៅដល់ប្រជាពលរដ្ឋនៅមូលដ្ឋាន»៕
