ភ្នំពេញ: ក្រសួងមហាផ្ទៃ និងអង្គការគណៈកម្មាធិការសហប្រតិបត្តិការ ដើម្បីកម្ពុជា (CCC) នឹងចាប់ផ្តើមធ្វើជំរឿនសមាគម និងអង្គការមិនមែនរដ្ឋាភិបាលក្នុងស្រុកចាប់ពីថ្ងៃទី ១០ ខែ តុលា ទៅដល់ថ្ងៃទី ២៩ ខែ វិច្ឆិកា ដើម្បីពិនិត្យឡើងវិញនូវចំនួនពិតប្រាកដនៃអង្គការសមាគមដែលកំពុងបន្តធ្វើសកម្មភាព ខណៈដែលចាប់តាំងពីឆ្នាំ ១៩៩៣ មកមានអង្គការ សមាគមក្នុងស្រុកចំនួន ៥ ៣៨៦ បានចុះបញ្ជីនៅក្រសួងមហាផ្ទៃ។
តាមសេចក្ដីជូនដំណឹងរបស់ក្រសួងមហាផ្ទៃចុះថ្ងៃទី ២៣ ខែ កញ្ញា ដែលភ្នំពេញប៉ុស្ដិ៍ទើបទទួលបានកាលពីម្សិលមិញឲ្យដឹងថា អគ្គនាយកដ្ឋានរដ្ឋបាលនៃក្រសួងមហាផ្ទៃ និងអង្គការ CCC នឹងសហការគ្នារៀបចំធ្វើជំរឿនសមាគម និងអង្គការមិនមែនរដ្ឋាភិបាលក្នុងស្រុក ដើម្បីពិនិត្យឡើងវិញនូវចំនួនពិតប្រាកដរបស់សមាគម និងអង្គការមិនមែនរដ្ឋាភិបាលក្នុងស្រុកដែលបានតម្កល់សំណុំលិខិត និងចុះឈ្មោះក្នុងបញ្ជីនៅក្រសួងមហាផ្ទៃ ហើយដែលកំពុងធ្វើសកម្មភាពក្នុងប្រទេសកម្ពុជា។
ក្រសួងមហាផ្ទៃបញ្ជាក់ថា៖ «ការធ្វើជំរឿននេះ ចាប់ផ្តើមអនុវត្តពីថ្ងៃទី ១០ ខែ តុលា ឆ្នាំ ២០១៩ រហូតដល់ថ្ងៃទី ២៩ ខែ វិច្ឆិកា ឆ្នាំ ២០១៩ ខាងមុខនេះ។ ក្រសួងមហាផ្ទៃសូមស្នើឲ្យរដ្ឋបាលរាជធានី ខេត្តព្រមទាំងសមាគម និងអង្គការមិនមែនរដ្ឋាភិបាលក្នុងស្រុកជួយសម្របសម្រួលបង្កលក្ខណៈងាយស្រួល និងចូលរួមសហការ ដើម្បីឲ្យការធ្វើជំរឿននេះទទួលបានលទ្ធផលល្អ»។
លោក ខៀវ សុភ័គ អ្នកនាំពាក្យក្រសួងមហាផ្ទៃថ្លែងកាលពីថ្ងៃចន្ទថាក្រសួងមហាផ្ទៃមិនដែលបានធ្វើជំរឿនតួលេខសមាគម និងអង្គការក្រៅរដ្ឋាភិបាលក្នុងស្រុកទេចាប់តាំងពីឆ្នាំ ១៩៩៣ ដែលរដ្ឋាភិបាលអនុញ្ញាតឲ្យមានអង្គការ សមាគមធ្វើសកម្មភាពនៅកម្ពុជា។
លោកបន្តថា ការធ្វើជំរឿននេះក្នុងគោលបំណងចង់ដឹងពីចំនួនតួលេខពិតប្រាកដ និងការចុះឈ្មោះក្នុងបញ្ជីនៅក្រសួងមហាផ្ទៃបានត្រឹមត្រូវឬយ៉ាងណា? ព្រោះកន្លងមកមានសមាគម និងអង្គការជាច្រើនកំពុងធ្វើសកម្មភាពលើទស្សនវិស័យផ្សេងៗគ្នា។ ម្យ៉ាងវិញទៀតក៏មានសមាគម និងអង្គការដែលទើបតែបង្កើតថ្មី ប៉ុន្ដែពួកគាត់ខ្លះ មិនបង្ហាញពីសកម្មភាពបេសកកម្មរបស់ខ្លួនឲ្យបានច្បាស់លាស់ទេ។
លោកបញ្ជាក់ថា៖ «អ្វីដែលយើងធ្វើនាពេលនេះគឺយើងចង់ដឹងពីតួលេខពិតប្រាកដ យើងមិនចង់បានតែតួលេខ តែគ្មានអង្គការ សមាគមធ្វើការទេ អ៊ីចឹងកន្លងមកនេះមានអង្គការខ្លះក្ស័យធន់ បិទអត់ប្រាប់យើង ខ្លះបង្កើតសមាគមមកក៏អត់ប្រាប់យើងដែរ អ៊ីចឹងយើងចង់បានតួលេខមួយឲ្យច្បាស់លាស់»។
លោក ខៀវ សុភ័គ បន្ថែមថាកម្មវិធីធ្វើជំរឿននេះមិនមែនក្នុងន័យចង់បំភិតបំភ័យ ឬគំរាមកំហែងដូចការគិតរបស់អង្គការ ឬ សមាគមមួយចំនួននោះទេ។ ម្យ៉ាងទៀតការរិះគន់ពីការធ្វើជំរឿននេះ គឺជាសិទ្ធិនៃការបញ្ចេញមតិរបស់ពួកគាត់ព្រោះកម្ពុជាជាប្រទេសគោរពតាមលទ្ធិប្រជាធិបតេយ្យ។
កញ្ញា បុណ្យ រចនា នាយិកាប្រតិបត្តិនៃអង្គការក្លាហានបានថ្លែងថាវាមិនមែនជាកិច្ចការចាំបាច់ដែលត្រូវធ្វើជំរឿននោះទេ ព្រោះអង្គការមិនមែនរដ្ឋាភិបាលក្នុងស្រុកដែលកំពុងប្រតិបត្តិការនៅក្នុងប្រទេសកម្ពុជាបានចុះបញ្ជី និងតម្កល់ឯកសារនៅក្រសួងមហាផ្ទៃរួចហើយពោលគឺក្រសួងមានបញ្ជីឈ្មោះ និងលិខិតស្នាមពាក់ព័ន្ធទាំងអស់នៅក្នុងដៃ។
កញ្ញាបន្តថា អង្គការ ក្លាហាន បានចុះបញ្ជីនៅក្រសួងមហាផ្ទៃកាលពីខែ កញ្ញា ឆ្នាំ ២០១៨ ដោយបានធ្វើសកម្មភាពស្រាវជ្រាវ និងចងក្រងភ័ស្តុតាងសម្រាប់ការធ្វើយុទ្ធនាការលុបបំបាត់ការរើងអើងលើស្ត្រីក៏ដូចជាកៀរគរ និងធ្វើយុទ្ធនាការតាមបណ្តាញសង្គម ដើម្បីស្នើឲ្យមានការផ្លាស់ប្តូរបទដ្ឋានសង្គមជាវិជ្ជមានព្រមទាំងមានការគោរព និងលើកស្ទួយសិទ្ធិស្ត្រីនៅក្នុងសង្គម។
កញ្ញា រចនា បញ្ជាក់ថា៖ «ខ្ញុំមិនទាន់បានទទួលព័ត៌មានអំពីការធ្វើជំរឿននេះនៅឡើយ។ អ៊ីចឹងមិនទាន់ដឹងថា ក្រសួងតម្រូវឲ្យស្ថាប័នត្រៀមខ្លួនរបៀបម៉េច ឬឯកសារអ្វីខ្លះទេ។ ខ្ញុំគិតថា ក្រុមការងារជំរឿនគួរតែផ្តល់ព័ត៌មានឲ្យបានលម្អិត និងទាន់ពេលវេលាដល់អង្គការពាក់ព័ន្ធ ម្យ៉ាងទៀតគួរបង្ហាញអំពីវិធីសាស្ត្រ យន្តការនិងគោលបំណងច្បាស់លាស់ថា តើទិន្នន័យដែលប្រមូលបាននឹងយកទៅប្រើប្រាស់របៀបម៉េច?»។
លោក ថេង សាវឿន ប្រធានសម្ព័ន្ធសហគមន៍កសិករកម្ពុជា (CCFC) ថ្លែងថា លោកគាំទ្រការធ្វើជំរឿននេះ ប្រសិនបើចង់ដឹងពីតួលេខ និងស្រង់ទិន្នន័យដើម្បីលើកទឹកចិត្តដល់អង្គការដែលកំពុងធ្វើការលើការងារមនុស្សធម៌ប៉ុន្ដែលោកមិនគាំទ្រចំពោះការជំរឿនក្នុងន័យបំភិតបំភ័យ ឬគំរាមកំហែងដល់សកម្មភាពសមាគម និងអង្គការដែលធ្លាប់រិះគន់រដ្ឋាភិបាលនោះទេ។
លោកបញ្ជាក់ថា លោកស្នើឲ្យក្រសួង និង CCC ជួយបង្ហាញគោលបំណងពិតប្រាកដ និងច្បាស់លាស់ជាងចង់ដឹងពីតួលេខ និងការចុះបញ្ជីនេះ ព្រោះកុំឲ្យមានអង្គការមួយចំនួនមានការព្រួយបារម្ភពីស្ថានភាពរបស់ខ្លួន។ លោកបញ្ជាក់ថា៖ «ខ្ញុំមិនទាន់អាចវាយតម្លៃថា វាជាសារគំរាមកំហែងទេ តែខ្ញុំចង់ដឹងពីសកម្មភាពជំរឿន និងលទ្ធផលដែលពួកគាត់បានធ្វើថា តើនៅពេលក្រសួងទទួលបានតួលេខពិតប្រាកដ ពួកគាត់នឹងយកទៅប្រើប្រាស់យ៉ាងណាខ្លះ?»។
បើយោងតាមក្រសួងមហាផ្ទៃចាប់តាំងពីឆ្នាំ ១៩៩៣ មកកម្ពុជាមានអង្គការ សមាគមក្នុងស្រុកចំនួន ៥ ៣៨៦ បានចុះបញ្ជីក្នុងនោះសមាគមមានចំនួន ២ ១៣៥ និងអង្គការមិនមែនរដ្ឋាភិបាលចំនួន ៣ ២៥១ ហើយក្នុងចំណោមអង្គការសមាគមទាំងនោះគឺមានតែចំនួនជិត ២ ០០០ ស្ថាប័នប៉ុណ្ណោះ ដែលបានបំពេញការងារនៅក្នុងឆ្នាំ ២០១៦ និងឆ្នាំ ២០១៧៕