.jpg)
លោក ស ខេង រដ្ឋមន្ត្រីក្រសួងមហាផ្ទៃ មើលឯកសារមិនប្រក្រតីដែលដកហូតពីជនបរទេសតម្រៀបនៅលើតុ កាលពីម្សិលមិញ។ ហ្វេសប៊ុកស ខេង
ភ្នំពេញៈ ក្រសួងមហាផ្ទៃកាលពីម្សិលមិញបានប្រកាសលទ្ធផលជាផ្លូវការដោយទទួលស្គាល់ជនបរទេសអន្តោប្រវេសន្តចំនួនជាង ៧ ម៉ឺននាក់ មានប័ណ្ណស្នាក់នៅអចិន្រៃ្តយ៍នៅកម្ពុជា ក្រោយរដ្ឋសភាអនុម័តច្បាប់ស្ដីពីអន្តោប្រវេសន៍ ក្រោយការបោះឆ្នោតឆ្នាំ ១៩៩៣។
យោងតាមរបាយការណ៍ស្ដីពីលទ្ធផលបូកសរុបការងារដកហូតឯកសាររដ្ឋបាលកម្ពុជាមិនប្រក្រតី និងការទទួលពាក្យសុំទទួលស្គាល់ជាជនបរទេសអន្តោប្រវេសន្ត ចេញផ្សាយកាលពីម្សិលមិញបានឲ្យដឹងថា៖ «ក្រសួងមហាផ្ទៃតែងបានយកចិត្តទុកដាក់ប្រកបដោយការទទួលខុសត្រូវខ្ពស់ ក្នុងការប្រមូលផ្ដុំដឹកនាំ និងចាត់វិធានការនានាដើម្បីអនុវត្តច្បាប់ស្ដីពីអន្តោប្រវេសន៍»។
របាយការណ៍ដដែលនេះបានឲ្យដឹងថា ក្រសួងមហាផ្ទៃបានចាត់ឲ្យធ្វើជំរឿនស្ថិតិចំនួន ២ លើក ដើម្បីរៀបចំផែនការពិនិត្យដោះស្រាយ សំដៅមានការគ្រប់គ្រងឲ្យបានច្បាស់លាស់ ដែលជំរឿនលើកទី១ នៅឆ្នាំ ១៩៩៥ និងលើកទី២ នៅឆ្នាំ ២០០២។
របាយការណ៍នេះបានឲ្យដឹងទៀតថា៖ «ប៉ុន្តែផែនការ និងវិធានការទាំងឡាយនោះត្រូវទទួលបាននូវភាពទាល់ច្រកជាបន្តបន្ទាប់អាស្រ័យដោយគណបក្សនយោបាយខ្លះ ពិសេសគណបក្សប្រឆាំង មិនត្រឹមតែមិនចូលរួមដោះស្រាយ ប៉ុន្តែជានិច្ចកាលតែងបានលើកយកកិច្ចការអន្តោប្រវេសន៍នេះមកធ្វើជាប្រធានបទបំផុសកំហឹងប្រជាពលរដ្ឋ និងធ្វើការវាយប្រហារមកលើរាជរដ្ឋាភិបាលដើម្បីកេងចំណេញខាងនយោបាយសម្រាប់គណបក្សខ្លួន ជាពិសេសពេលជិតមានដំណើរការបោះឆ្នោតម្ដងៗ»។
លោក ស ខេង រដ្ឋមន្ត្រីក្រសួងមហាផ្ទៃកាលពីម្សិលមិញបានធ្វើជាអធិបតីក្នុងកិច្ចប្រជុំផ្សព្វផ្សាយលទ្ធផលការងារដកហូតឯកសាររដ្ឋបាលកម្ពុជាមិនប្រក្រតី ដែលជនបរទេសកាន់កាប់ប្រើប្រាស់ និងការទទួលពាក្យសុំប្រកាសទទួលស្គាល់ជាជនបរទេសអន្តោប្រវេសន្ត និងប័ណ្ណស្នាក់នៅអចិន្រៃ្តយ៍ ដោយមានការចូលរួមពីមន្ត្រីជាន់ខ្ពស់ពីក្រសួងមហាផ្ទៃ និងនគរបាលជាតិ។
ឯកសារមិនប្រក្រតីដែលត្រូវបានដកហូតពីជនបរទេស។ហេង ជីវ័ន
លោក ស ខេង ថ្លែងថា៖ «ដើម្បីពង្រឹងប្រសិទ្ធភាពនៃការអនុវត្តច្បាប់ និងដើម្បីទប់ស្កាត់ជនបរទេសដែលតាំងទីលំនៅយូរនៅ ប្រទេស កម្ពុជា ដែលអាចបង្កឲ្យមានភាពច្របូកច្របល់ មិនអាចគ្រប់គ្រងបាន និងជះឥទ្ធិពល អវិជ្ជមាន ដល់សន្តិសុខ សណ្តាប់ធ្នាប់ និងសុវតិ្ថភាពសង្គម និងសិទិ្ធមនុស្ស»។
លោកថ្លែងបន្តថា៖ «ខ្ញុំគាំទ្រនិងឯកភាពចំពោះការសន្និដ្ឋានវាយតម្លៃ ក្នុងរបាយការណ៍ដែល បានចាត់ទុកថា ការធ្វើជំរឿនជនបរទេស ការដកហូតឯកសាររដ្ឋបាលមិនប្រក្រតីដែលជនបរទេសកាន់កាប់ដោយខុស ច្បាប់គឺជាជោគជ័យ ដ៏ធំធេងមួយសម្រាប់រាជរដ្ឋាភិបាលយើង»។
យោងតាមរបាយការណ៍ដដែលនេះបានឲ្យដឹងថា សមត្ថកិច្ចបានដកហូតឯកសារកម្ពុជាមិនប្រក្រតី និងជនបរទេសកាន់កាប់ជាង ៣ ម៉ឺន ៧ ពាន់ច្បាប់ ដែលក្នុងនោះមានជនបរទេសចំនួន ២០ ០៩៣ គ្រួសារ មនុស្ស ៦៩ ៨៨៤ នាក់ មាន ១០ សញ្ជាតិ។
ជាមួយគ្នានេះដែរបានទទួលពាក្យស្នើសុំប្រកាសទទួលស្គាល់ជាជនបរទេសអន្តោប្រវេសន្តចំនួន ៧១ ៩៩១នាក់ ស្មើនិងចំនួន ៣២ ៧៣៥ គ្រួសារ មានសមាជិកសរុបចំនួនជាង ១០ ម៉ឺន ៣ ពាន់នាក់ ក្នុងនោះភាគច្រើនសញ្ជាតិវៀតណាម បន្ទាប់មក ឡាវ ថៃ ភូមា ចិន ឥណ្ឌូនេស៊ី នេប៉ាល់ បង់ក្លាដេស តង់ហ្សានីញ៉ា និងអាល្លឺម៉ង់ ។
ទោះជាយ៉ាងណាក៏ដោយ លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកបានចាត់ទុកយុទ្ធនាការនេះថា មិនទាន់ទទួលបានជោគជ័យនៅឡើយ ដោយសារតែមន្ត្រីដែលបានពាក់ព័ន្ធក្នុងការចេញលិខិត និងឯកសារមិនប្រក្រតីទទួលវិន័យទៅតាមច្បាប់ហើយថា ក្រសួងត្រូវតែធ្វើការស៊ើបអង្កេតឲ្យបានស៊ីជម្រៅ និងដាក់ទោសទណ្ឌតាមច្បាប់ចំពោះអ្នកដែលពាក់ព័ន្ធក្នុងការចេញលិខិត និងឯកសារទាំងនេះដើម្បីទប់ស្កាត់ករណីកើតឡើងវិញ។
លោកបញ្ជាក់ដូច្នេះថា៖ «វាពាក់ព័ន្ធទៅនឹងការអនុវត្តតួនាទីរបស់មន្ត្រីអាជ្ញាធរដែលមានភាពចន្លោះប្រហោងដែល បណ្តោយឲ្យមានការចេញឯកសារទាំងអស់ហ្នឹង ហើយអាចមានអំពើពុកលួយក្នុងការចេញលិខិត និងឯកសារទាំងនេះឲ្យជនបរទេស ហើយករណីទាំងនេះក្រសួងត្រូវធ្វើការស្រាវជ្រាវ និងទោសទណ្ឌរដ្ឋបាល ហើយពួកគេ អាចប្រឈមនឹងទោសព្រហ្មទណ្ឌពាក់ព័ន្ធនឹងការក្លែងលិខិត»៕
