ភ្នំពេញៈ ក្រសួងមហាផ្ទៃយល់ព្រមឱ្យគណបក្សសិទ្ធិមនុស្សពន្យារពេល ៦ ខែ ក្នុងការបញ្ជូនបញ្ជីឈ្មោះសមាសភាពថ្នាក់ដឹកនាំបក្សនេះទៅក្រសួងមហាផ្ទៃ ដើម្បីឱ្យស្របតាមបទប្បញ្ញត្តិក្នុងច្បាប់ស្ដីគណបក្សនយោបាយ។ មន្ត្រីក្រសួងបញ្ជាក់ថា ការពន្យារពេលនេះគឺធ្វើឡើងតាមការស្នើសុំពីអគ្គលេខាធិការគណបក្សសិទ្ធិមនុស្ស ។
កាលពីថ្ងៃទី ២២ វិច្ឆិកា លោក ស ខេង រដ្ឋមន្ត្រីក្រសួងមហាផ្ទៃបានផ្ញើលិខិតទៅប្រធានស្តីទីគណបក្សសិទ្ធិមនុស្សពីការយល់ព្រមពន្យារពេលឱ្យគណបក្សនេះបំពេញតាមលក្ខខណ្ឌដែលកំណត់ ដោយច្បាប់ស្ដីគណបក្សនយោបាយ។ ការពន្យារនេះក្រសួងទុកពេលឱ្យបក្សបញ្ជូនបញ្ជីឈ្មោះសមាសភាពថ្នាក់ដឹកនាំរបស់គណបក្សទៅក្រសួងមហាផ្ទៃ។
លិខិតសរសេរថា៖ «ពាក់ព័ន្ធនឹងករណីនេះក្រសួងមហាផ្ទៃយល់ព្រមឱ្យគណបក្សសិទ្ធិមនុស្ស ពន្យារពេលចំនួន ៦ ខែ ក្នុងការបំពេញលក្ខខណ្ឌដែលកំណត់ក្នុងបទប្បញ្ញត្តិមាត្រា ២៦ (ថ្មី) នៃច្បាប់ស្ដីពីគណបក្សនយោបាយ ដោយគិតចាប់ពីថ្ងៃជូនដំណឹងនេះរហូតដល់ខែមិថុនាឆ្នាំ ២០២០»។
លោក ឈឹម កាន ប្រធាននាយកដ្ឋានកិច្ចការសមាគម និងគណបក្សនយោបាយនៃក្រសួងមហាផ្ទៃប្រាប់ភ្នំពេញប៉ុស្ដិ៍យ៉ាងខ្លីពីម្សិលមិញថា ការពន្យារពេលនេះធ្វើឡើងតាមការស្នើសុំរបស់បក្សសិទ្ធិមនុស្សកាលពីថ្ងៃទី ២៨ ខែតុលា ឆ្នាំ ២០១៩។ លោកបន្តថា តាមគោលការណ៍ច្បាប់គឺគណបក្សដែលបើកដំណើរការត្រូវតែដាក់បញ្ជីឈ្មោះថ្នាក់ដឹកនាំគណបក្សមកក្រសួងមហាផ្ទៃ។
លោកបញ្ជាក់ថា៖ «គណបក្សហ្នឹង គាត់ដាក់ (លិខិតស្នើសុំ) មក។ សុំពន្យារហ្នឹង គឺមានតែគណបក្សហ្នឹងមួយទេ ហើយដែល (យើង) បានឆ្លើយតប»។
កាលពីថ្ងៃទី ២៩ វិច្ឆិកា ២០១៧ លោក ស ខេង បានផ្ញើលិខិតដាច់ដោយឡែកពីគ្នាទៅគណបក្សសិទ្ធិមនុស្សដែលមានលោក សឺន ស៊ូប៊ែរ្តិ៍ ជាប្រធានបក្ស និងគណបក្សភ្លើងទៀនដែលមានលោក ទាវ វណ្ណុល ជាប្រធានបក្ស ដើម្បីឱ្យគណបក្សទាំងនេះរៀបចំបញ្ជូនបញ្ជីឈ្មោះសមាសភាពថ្នាក់ដឹកនាំគណបក្សទៅក្រសួង។ លោក ស ខេង បញ្ជាក់ក្នុងលិខិតថា បក្សទាំង ២ នេះមិនទាន់បានបំពេញលក្ខខណ្ឌគ្រប់គ្រាន់តាមច្បាប់ស្តីពីគណបក្សនយោបាយទេ។
ប៉ុន្តែកាលពីខែមករា ២០១៨ លោក សឺន ស៊ូប៊ែរ្តិ៍ អតីតប្រធានគណបក្សសិទ្ធិមនុស្សបានប្រកាសរំលាយបក្សនេះ។ ប៉ុន្តែត្រូវបានក្រសួងមហាផ្ទៃបដិសេធ និងទាមទារឱ្យគណបក្សបំពេញតាមលក្ខខណ្ឌ គឺការរំលាយតាមរយៈសំឡេងគាំទ្រ ២ ភាគ ៣ នៅក្នុងសមាជគណបក្ស។
រីឯលោក ទាវ វណ្ណុល ប្រធានគណបក្ស ភ្លើងទៀន បានរៀបចំសមាជមួយដើម្បីកែប្រែលក្ខន្ដិកៈគណបក្សក្នុងការត្រៀមប្រកាសរំលាយគណបក្សកាលពីខែកុម្ភៈឆ្នាំ ២០១៨។ ប៉ុន្តែមកទល់ពេលនេះមិនទាន់បានប្រកាសជាផ្លូវការអំពីការរំលាយគណបក្សនោះទេ ថ្វីដ្បិតអតីតគណបក្សសង្គ្រោះជាតិត្រូវបានបង្កើតឡើងតាំងពីឆ្នាំ ២០១២ ដែលកើតឡើងពីកម្លាំងរួមគ្នារវាងក្រុមថ្នាក់ដឹកនាំបក្សសិទ្ធិមនុស្ស និងគណបក្ស ភ្លើងទៀន ក៏ដោយ។
លោក ហ៊ីង សុខសាន អតីតអគ្គលេខាធិការគណបក្សសិទ្ធិមនុស្សលើកឡើងលើទំព័រហ្វេសប៊ុកនៅថ្ងៃទី ២៤ វិច្ឆិកា ថា គណបក្សសិទ្ធិមនុស្សគឺគ្មានមនុស្សសម្រាប់រៀបចំសមាជ និងសម្រាប់ធ្វើបញ្ជីឈ្មោះសមាសភាពថ្នាក់ដឹកនាំទៅក្រសួងមហាផ្ទៃនោះទេ ពីព្រោះថ្នាក់ដឹកនាំបក្សនេះទាំងអស់ចេញទៅចូលរួមបង្កើតអតីតគណបក្សសង្គ្រោះជាតិ។
លោកសរសេរថា៖ «ការផ្ញើបញ្ជីឈ្មោះថ្នាក់ដឹកនាំរបស់គណបក្សទាំងអស់ទៅក្រសួងមហាផ្ទៃត្រូវធ្វើដូចៗគ្នា រួមទាំងបក្សភ្លើងទៀន និងបក្សសិទ្ធិមនុស្ស។ បក្សភ្លើងទៀនបានរៀបចំផ្ញើទៅហើយអត់មានបញ្ហា ទេ។ ដោយឡែកបក្សសិទ្ធិមនុស្សអត់មានមនុស្សព្រោះទៅសង្គ្រោះជាតិអស់ហើយ ដូច្នេះទើបមិនបានធ្វើបញ្ជីឈ្មោះតាមការចង់បានរបស់ក្រសួងមហាផ្ទៃ»។
ចំណែកកញ្ញា កឹម មនោវិទ្យា កូនស្រីរបស់លោក កឹម សុខា ប្រធាននៃអតីតគណបក្សសង្គ្រោះជាតិលើកឡើងនៅលើប្រព័ន្ធ Twitter កាលពីសប្ដាហ៍មុនដែរថា៖ «គណបក្សសិទ្ធិមនុស្សបានបដិសេធក្នុងការបញ្ជូនឈ្មោះថ្នាក់ដឹកនាំនេះ ដោយស្នើសុំការពន្យារពេល។ គណបក្សសិទ្ធិមនុស្សបានស្នើសុំទៅអាជ្ញាធរតាំងពីឆ្នាំ ២០១៨ ដើម្បីរំលាយគណបក្សសិទ្ធិមនុស្ស។ មួយវិញទៀត គណបក្សភ្លើងទៀន បានបំពេញតាមតម្រូវការរបស់ក្រសួងដើម្បីបន្តជាគណបក្សដែលបានបញ្ជីរហូតមកដល់ពេលបច្ចុប្បន្ននេះ»។
លោក សឺន ស៊ូប៊ែរ្ដិ៍ ដែលប្រកាសលាលែងពីប្រធានបក្សសិទ្ធិមនុស្ស បន្ទាប់ពីការប្រកាសរំលាយគណបក្សសិទ្ធិមនុស្សលើកឡើងថា លោកមិនបានដឹងអំពីការដាក់លិខិតសុំពន្យារពេលផ្ញើបញ្ជីឈ្មោះសមាសភាពថ្នាក់ដឹកនាំគណបក្សនេះឡើយ។ លោកថាមិនដឹងអ្នកណាជាអ្នកទទួលខុសត្រូវរបស់គណបក្សសិទ្ធិមនុស្សនោះដែរ។ លោកថ្លែងថា៖ «តាំងពីខ្ញុំលាលែងគឺមានអ្នកមកជំនួសហើយ ព្រោះអនុប្រធាននៅអូស្ត្រាលីឯណោះ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាយល់ឃើញថា លោក កឹម សុខា អាចនឹងទទួលបានការស្ដារនីតិសម្បទានយោបាយឡើងវិញក្នុងរយៈពេល ៦ ខែនេះ បើលោកចង់វិលទៅរកគណបក្សសិទ្ធិមនុស្ស។
លោកថ្លែងថា៖ «យើងគ្រាន់តែនិយាយថា វាគឺជាជម្រើសដែលល្អ។ លោក កឹម សុខា គួរតែគិតគូររៀបចំឡើងវិញនូវគណបក្សសិទ្ធិមនុស្ស។ បើនិយាយរឿង (ការរស់ឡើងវិញអតីតបក្សសង្គ្រោះជាតិ) នោះប្រាកដច្បាស់ហើយ គឺលោក កឹម សុខា នៅបន្តជាប់គុក និងពិរុទ្ធតទៅទៀត»។
ប៉ុន្តែលោក ឡៅ ម៉ុងហៃ អ្នកវិភាគនយោបាយថ្លែងថា៖ «នៅក្នុងប្រព័ន្ធត្រួតត្រាសព្វថ្ងៃនេះក្រសួងមហាផ្ទៃអាចមានគោលដៅនយោបាយណាមួយ នៅពេលក្រសួងនេះពន្យារពេលសម្រាប់ឱ្យគណបក្សសិទ្ធិមនុស្សឆ្លើយតបទៅនឹងការទាមទាររបស់ខ្លួន។ ពេលដែលការទាមទារឱ្យដោះលែងអតីតប្រធានបក្សនេះ គឺលោក កឹម សុខា ជាការទាមទារគន្លឹះរបស់សហភាពអឺរ៉ុបសម្រាប់ឱ្យគេបន្តរបបអនុគ្រោះពន្ធ EBA ឱ្យកម្ពុជាតទៅទៀត»៕