.jpg)
ជនជាតិកូរ៉េខាងត្បូង ២ នាក់ និងលុយរបស់ពួកគេដែលនាំចូលកម្ពុជាដោយខុសច្បាប់។ នគរបាល
ភ្នំពេញៈ មន្ត្រីជាន់ខ្ពស់នៃក្រសួងមហាផ្ទៃបានឲ្យដឹងកាលពីម្សិលមិញថា កម្លាំងនគរបាលជំនាញបានកំពុងចាត់វិធានការយ៉ាងម៉ឺងម៉ាត់ទៅលើការស៊ើបអង្កេត បង្ការ និងទប់ស្កាត់ប្រភពបទលើ្មសនៃការលាងសម្អាតប្រាក់ហិរញ្ញប្បទាន និងភេរវកម្មបាន ក្រោយពីមានការរឹបអូសការនាំលុយដោយខុសច្បាប់ចូលមកក្នុងប្រទេស កម្ពុជា ជាបន្តបន្ទាប់ក្នុងរយៈពេលចុងក្រោយនេះ។
លោក ងី ច័ន្ទ្រផល រដ្ឋលេខាធិការនៃក្រសួងមហាផ្ទៃ និងជាប្រធានក្រុមការងារត្រួតពិនិត្យឡើងវិញ (Review Panel Group) បានអះអាងកាលពីម្សិលមិញថា បើទោះបីជារាជរដ្ឋាភិបាលកម្ពុជាបាននិងកំពុងខិតខំប្រឹងប្រែងធ្វើការងារការស៊ើបអង្កេតផលសំអាងនៃបទល្មើស ការងារបង្ការ ទប់ស្កាត់បង្ក្រាបបទល្មើសនៃការលាងសម្អាតប្រាក់ និងហិរញ្ញប្បទាន ភេរវកម្ម ប៉ុន្តែក៏ប្រឈមជាមួយបញ្ហាមួយចំនួនដែលក្នុងនោះក៏មានបញ្ហាដែលបង្កពីខាងក្រៅផងដែរ។
លោកបញ្ជាក់ដូច្នេះថា៖ «យើងបានសម្រេចគោលដៅមួយចំនួនហើយ តែកិច្ចការនេះនៅមានប្រឈមច្រើនទៀត ហើយយើងនឹងបន្តធ្វើតទៅទៀតដូចជាភ្លៀងរលឹម យើងធ្វើកិច្ចការងារច្រើន តែនៅតែមានកិច្ចការងារដែលយើងត្រូវធ្វើបន្តទៀត»។
លោក ឆៃ ស៊ីណារិទ្ធ អគ្គស្នងការរង នៃអគ្គស្នងការដ្ឋាននគរបាលជាតិការងារបង្ការ ទប់ស្កាត់ បង្ក្រាបបទល្មើសនៃការលាងសម្អាតប្រាក់ និងហិរញ្ញប្បទានភេរវកម្មដែលទទួលបានជោគជ័យកន្លងមកនេះដោយសារតែសមត្ថកិច្ចបានខិតខំស៊ើបអង្កេតនិង ស្រាវជ្រាវស៊ីជម្រៅទៅលើបទល្មើសឧក្រិដ្ឋ តាមរយៈការសហប្រតិបត្តិការ ជាមួយស្ថាប័នអន្តជាតិ និងខិតខំគ្រប់គ្រងលំហូរសាច់ប្រាក់តាមកាស៊ីណូ។
លោក ស៊ីណារិទ្ធ ថ្លែងថា៖ «ក្នុងរយៈពេលកន្លងទៅ ចុងក្រោយនេះគឺយើងបានធ្វើប្រតិបត្តិការបានច្រើន គឺយើងបានរកឃើញ និងបានទប់ស្កាត់ យើងបានចាត់វិធានការក្តៅទៅលើការសម្អាតប្រាក់នេះ ហើយយើងកំពុងតែមានចំណុចវិជ្ជមានច្រើន»។
លោក ស៊ីណារិទ្ធ អះអាងថា លោករដ្ឋមន្ត្រីក្រសួងមហាផ្ទៃ បានណែនាំ គ្រប់បណ្តាអង្គភាពពាក់ព័ន្ធទាំងអស់ដែលជាមន្ត្រីអនុវត្តច្បាប់ ត្រូវតែយកចិត្តទុកដាក់លើកិច្ចការទាំងនោះ យ៉ាងហ្មត់ចត់ ហើយសមត្ថកិច្ចបានកំពុងស្វះស្វែងរកដៃគូ និងស្ថាប័នអន្តរជាតិដែលមានបទពិសោធ ដើម្បី សហការ និងផ្តល់ជំនួយក្នុងការ បណ្តុះបណ្តាល ធនធានមនុស្សក្នុងការស៊ើបអង្កេត ទប់ស្កាត់ បង្ក្រាបបទល្មើសនៃការលាងសម្អាតប្រាក់។
កាលពីថ្ងៃទី ២៩ ខែ ឧសភា ឆ្នាំ ២០១៩ ជនជាតិចិនម្នាក់ទៀត ត្រូវបានឃាត់ខ្លួន នៅអាកាសយានដ្ឋានអន្តរជាតិភ្នំពេញ ដោយដកហូតលុយជិត ១ លានដុល្លារអាមេរិក ដែលលុយនោះត្រូវបាននាំចូលពីទីក្រុងហុងកុង ប្រទេសចិន និងករណីដោយឡែកមួយទៀតជនជាតិចិនចំនួន ៣ នាក់ ត្រូវបានឃាត់ពាក់ព័ន្ធនឹងការនាំចូលលុយពីក្រៅប្រទេសយកមកសម្អាតនៅកម្ពុជា ចំនួន ៣ លាន ៥ សែន ២ ម៉ឺនដុល្លារអាមេរិក។
ខណៈប៉ុន្មានថ្ងៃថ្មីៗកន្លងមកនេះអាជ្ញាធរបានចាប់ខ្លួនជនជាតិកូរ៉េខាងត្បូង ២ នាក់ និងបានរឹបអូសប្រាក់ចំនួន ២ លាន ២ សែនដុល្លារសហរដ្ឋអាមេរិក ដែលនាំចេញពីទីក្រុងហុងកុង ឆ្លងកាត់ព្រលានយន្តហោះខេត្តសៀមរាប។
លោក ស៊ីណារិទ្ធ ថ្លែងថា៖ «យើងគិតពីបញ្ហាលំហូរ ផ្នែកហិរញ្ញវត្ថុនានា ការគ្រប់គ្រងប្រព័ន្ធនៅកាស៊ីណូ ហើយថាប្រសិនបើសមត្ថកិច្ចពុំយកចិត្តទុកដាក់ទេទៅលើលំហូរនេះ វានឹងធ្វើឲ្យមានភាពងាយស្រួល។ ពេលយើងចាប់បានហ្នឹង ប្រភពវាអត់ស្របច្បាប់ ហើយវាយកមកមានចេតនាជាស្អី?យើងសង្ស័យថាវាពាក់ព័ន្ធនឹងការសម្អាតប្រាក់បើលំហូរលុយស្របច្បាប់គេនឹងតាមធនាគារ»។
លោក ឆៃ ស៊ីណារិទ្ធ បានថ្លែងថា សមត្ថកិច្ចបាននិងកំពុងសហការជាមួយប្រទេសពាក់ព័ន្ធដើម្បីស្រាវជ្រាវ ករណីជនជាតិចិនថា តើហេតុអ្វីបានជាពួកគេយកលុយដ៏ច្រើនចូលមកប្រទេស កម្ពុជា។
លោក ស៊ីណារិទ្ធ ថ្លែងថា៖ «ខ្ញុំមិនទាន់ច្បាស់ទេឥឡូវហ្នឹង សមត្ថកិច្ចគេកំពុងស៊ើបអង្កេត កិច្ចការខ្លះបាន និងកំពុងបន្តជាមួយប្រទេសពាក់ព័ន្ធដើម្បីស៊ើបអង្កេត»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកបានថ្លែងថា រដ្ឋាភិបាលបានខិតខំប្រឹងប្រែងក្នុងការងារបង្ការ ទប់ស្កាត់ បង្ក្រាបបទល្មើសទាំងនោះបានច្រើនហើយ តែវាពុំទាន់មានប្រសិទ្ធភាពគ្រប់គ្រាន់នៅឡើយទេ។
លោកថា៖ «យើងដឹងថា តើរាជរដ្ឋាភិបាលមានប្រព័ន្ធគ្រប់គ្រងកាស៊ីណូ និងប្រព័ន្ធវិស័យអចលនទ្រព្យដែរឬទេ?ដោយសារយើងឃើញថា ជនជាតិចិនមួយចំនួនបានយកលុយចូលមកកម្ពុជាដែលពួកគេអាចធ្វើឲ្យលុយទាំងអស់នោះស្របច្បាប់បានហើយយើងអត់ដឹងថាតើប្រភពលុយទាំងអស់នោះ មានភាពច្បាស់លាស់ដែរឬទេ?»៕
