ភ្នំពេញៈ លោក យក់ ប៊ុនណា អ្នកនាំពាក្យក្រសួងមុខងារសាធារណៈជំរុញឲ្យមន្ត្រីបម្រើសេវាសាធារណៈទូទាំងប្រទេសចូលរួមបំពេញការងារឲ្យបានល្អ និងប្រកបដោយភាពស្មោះត្រង់ ស្របពេលដែលក្រសួងនឹងជំរុញបន្ថែមទៀតក្នុងការដំឡើងប្រាក់បៀវត្សរ៍ដល់មន្ត្រីរាជការ ខណៈមន្ត្រីប្រព្រឹត្តមិនសមរម្យត្រូវប្រឈមនឹងទោសទណ្ឌតាមច្បាប់។
ការថ្លែងរបស់លោកបែបនេះបានធ្វើឡើងក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងមុខងារសាធារណៈ» កាលពីម្សិលមិញនៅទីស្តីការគណៈរដ្ឋមន្ត្រីដែលរៀបចំដោយអង្គភាពអ្នកនាំពាក្យរាជរដ្ឋាភិបាល និងមានអ្នកចូលរួមប្រមាណ ៣០ នាក់។
លោក យក់ ប៊ុនណា បានថ្លែងថាក្រសួងមុខងារសាធារណៈជាទូទៅមិនធ្វើការជំនួសក្រសួងស្ថាប័នណានោះទេ ប៉ុន្តែគឺជាស្ថាប័នដែលជួយរួមចំណែកក្នុងការរៀបចំគោលនយោបាយ គោលការណ៍ និងជាអ្នកជំរុញតាមដាន ពិនិត្យមើលវឌ្ឍនភាពនៃការលើកកម្ពស់គុណភាពសេវាសាធារណៈនៅថ្នាក់ជាតិ និងថ្នាក់ក្រោមជាតិ។
លោកបានបន្តថា ដូច្នេះស្របពេលដែលក្រសួងនឹងជំរុញបន្ថែមក្នុងការដំឡើងប្រាក់បៀវត្សរ៍ដល់មន្ត្រីរាជការទូទាំងប្រទេសនោះគឺមន្ត្រីបម្រើសេវាសាធារណៈខ្លួនឯងផ្ទាល់ គួរតែប្រឹងប្រែងបំពេញការងារឲ្យបានសកម្ម និងប្រកបដោយភាពស្មោះត្រង់។
លោកបានបញ្ជាក់ថា៖ «កុំបានប្រាក់បៀវត្សរ៍បានការដំឡើងប្រាក់បៀវត្សរ៍ហើយយើងអត់ខំប្រឹង ហើយនៅដដែលគឺអត់បានទេ។ ព្រោះយើងត្រូវគិតថាយើងម្នាក់ៗក្នុងនាមមន្ត្រីរាជការ ដែលធ្វើការក្នុងវិស័យសាធារណៈត្រូវតែរួមចំណែកសំខាន់ក្នុងការផ្តល់សេវាសាធារណៈ។ បើនិយាយពីរឿងផ្តល់សេវាសាធារណៈគឺសម្រាប់ទាំងអស់គ្នារួមទាំងមន្ត្រីផង»។
បន្ថែមពីនេះលោកក៏ចង់ឲ្យមន្ត្រីគ្រប់ជាន់ថ្នាក់គួរផ្លាស់ប្តូរឥរិយាបថ ជាមន្ត្រីដែលមានលក្ខណៈគ្រប់គ្រង ឬត្រួតត្រាមកចាត់ទុកខ្លួនឯងជាអ្នកផ្តល់សេវា ឬជាអ្នកបម្រើរាស្ត្រដ៏ស្មោះត្រង់ និងចូលរួមគោរពពេលវេលាឲ្យបានត្រឹមត្រូវក្នុងន័យធ្វើយ៉ាងណាឲ្យការផ្តល់សេវាជូនពលរដ្ឋដែលមានជាង ៥០០ សេវា ប្រកបដោយប្រសិទ្ធភាព។
ទន្ទឹមនឹងការជំរុញឲ្យមន្ត្រីរាជការខិតខំបម្រើសេវានេះលោក យក់ ប៊ុនណា ក៏បានលើកជាឧទាហរណ៍មួយចំនួនផងដែរ ដោយលោកលើកឡើងថា មានមន្ត្រីសាធារណៈមួយចំនួនបានប្រឈមមុខនឹងច្បាប់ និងត្រូវបានបញ្ចប់ មុខតំណែងជាហូរហែចំពោះទង្វើ និងអាកប្បកិរិយាមិនល្អ។ លោកព្រមានដែរថា យន្តការនេះនៅតែបន្ត ប្រសិនបើមន្ត្រីរាជការនៅតែប្រព្រឹត្តកំហុស។
តាមរបាយការណ៍សន្និបាតរបស់ក្រសួងមុខងារសាធារណៈឆ្នាំ ២០១៩ បានឲ្យដឹងថា តាមរយៈការដាក់ចេញកម្មវិធីគ្រប់គ្រងមន្ត្រីរាជការតាមប្រព័ន្ធព័ត៌មានវិទ្យា កម្ពុជាមានមន្ត្រីរាជការស៊ីវិលសរុប ២១៨ ៤៨២ នាក់ក្នុងនោះថ្នាក់ជាតិមានប្រមាណ ៤៥ ៥៩៩ នាក់ និងថ្នាក់ក្រោមជាតិមានប្រមាណ ១៧២ ៨៨៣ នាក់។
លោក សន ជ័យ នាយកប្រតិបត្តិសម្ព័ន្ធគណនេយ្យភាពសង្គមកម្ពុជាបានលើកឡើងថា នៅពេលដែលកម្ពុជាមានការវិវឌ្ឍថ្មីៗនៃការរីកចម្រើនសកម្មភាពសេដ្ឋកិច្ចគឺនឹងធ្វើឲ្យសេវាសាធារណៈមិនមែនសំដៅតែទៅលើការទទួលបានសេវាធ្វើសំបុត្រកំណើត សំបុត្រអាពាហ៍ពិពាហ៍ និងសុំច្បាប់ផ្សេងៗនោះទេ។ ក៏ប៉ុន្តែការផ្តល់សេវាទាំងនេះនឹងត្រូវសំដៅលើបញ្ហាធំៗដែលពាក់ព័ន្ធនឹងបញ្ហាផ្សេងៗទៀត ដូចជា ដីធ្លី ការសាងសង់ ការចុះបញ្ជីយានយន្ត និងផ្នែកសុខាភិបាលជាដើម។
លោកបានបន្តថា ដើម្បីធ្វើឲ្យសេវាសាធារណៈទាំងនេះមានភាពល្អប្រសើរ រដ្ឋាភិបាលគួរមើលលើសេវាណាដែលមានអាទិភាព និងបន្ថយភាពស្មុគស្មាញនៃការផ្តល់សេវាជុំវិញបញ្ហាទាំងនោះ ដើម្បីធ្វើឲ្យប្រាកដថា ការផ្តល់សេវាសាធារណៈរបស់មន្ត្រីរាជការប្រព្រឹត្តទៅបានល្អ។
លោកបញ្ជាក់ថា៖ «បើប្រព័ន្ធនៃការផ្តល់សេវាមួយដែលមានភាពស្មុគស្មាញវាអាចនឹងធ្វើឲ្យមានឱកាសបន្ទច់បង្អាក់នៅក្នុងការផ្តល់សេវាដែលធ្វើឲ្យប្រជាពលរដ្ឋបង្ខំចិត្តបង់លុយក្រៅផ្លូវការដើម្បីទទួលបានសេវាទាំងនោះ។ កន្លងមកយើងដឹងហើយសូម្បីតែការសុំច្បាប់សាងសង់មួយវាជាបញ្ហាចម្បង បញ្ហាប្រឈមដែលធ្វើឲ្យមានការលើកឡើងថា សំណង់ខុសច្បាប់ វាកើតឡើងដោយសារតែនីតិវិធីសុំច្បាប់សាងសង់មានការស្មុគស្មាញ និងពិបាកដែលបង្កជាអំពើពុករលួយ»៕