.jpg)
លោក យក់ ប៊ុនណា អ្នកនាំពាក្យក្រសួងមុខងារសាធារណៈ ថ្លែងក្នុងសន្និសីទសារព័ត៌មានកាលពីឆ្នាំ ២០២០។ ហ៊ាន រង្សី
ភ្នំពេញ៖ ក្រសួងមុខងារសាធារណៈតម្រូវឱ្យបេក្ខជន ដែលបានដាក់ពាក្យសុំសិទ្ធិប្រឡងចូលបម្រើការងារក្នុងក្របខ័ណ្ឌមន្ត្រីរាជការនៅតាមក្រសួងស្ថាប័នចំនួន ៦ ត្រូវចាក់វ៉ាក់សាំងការពារជំងឺកូវីដ ១៩ ទាំង ២ លើកឱ្យបានរួចហើយ។
នៅក្នុងសេចក្តីជូនដំណឹង ដែលចុះហត្ថលេខាដោយលោក អែវ ប៊ុនថុល រដ្ឋលេខាធិការ និងជាប្រធានគណៈកម្មការរៀបចំប្រឡងនៃក្រសួងមុខងារសាធារណៈកាលពីថ្ងៃទី ៤ ខែ ឧសភា ឆ្នាំ ២០២១
បញ្ជាក់ថា ក្រសួងស្ថាប័នចំនួន ៦ រួមមានក្រសួងមុខងារសាធារណៈក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចក្រសួងកសិកម្ម រុក្ខាប្រមាញ់ និងនេសាទ ក្រសួងពាណិជ្ជកម្ម ក្រសួងធនធានទឹក និងឧតុនិយម និងរដ្ឋលេខាធិការដ្ឋាន អាកាសចរស៊ីវិល សម្រាប់ឆ្នាំ ២០២១។
សេចក្តីជូនដំណឹងបញ្ជាក់ថា នៅថ្ងៃប្រឡងបេក្ខជនទាំងអស់ត្រូវភ្ជាប់មកជាមួយនូវកាតសម្គាល់ដែលសាមីខ្លួនបានទទួលវ៉ាក់សាំង។
ក្នុងករណីដែលបេក្ខជនមិនអាចទទួលវ៉ាក់សាំងការពារជំងឺកូវីដ ១៩ បាន ត្រូវមានលិខិតបញ្ជាក់ជាផ្លូវការពីមន្ទីរសុខាភិបាលរាជធានី-ខេត្ត។
បើតាមសេចក្តីជូនដំណឹងនេះ ក្នុងករណីបេក្ខជនណាដែលមិនមានប័ណ្ណទទួលវ៉ាក់សាំងការពារជំងឺកូវីដ ១៩ ឬលិខិតបញ្ជាក់របស់មន្ទីរសុខាភិបាលរាជធានី-ខេត្ត គណៈកម្មការរៀបចំការប្រឡងមិនអនុញ្ញាតឱ្យបេក្ខជននោះចូលរួមប្រឡងឡើយ។
គណៈកម្មការរៀបចំការប្រឡងនឹងធ្វើការបិទផ្សាយបញ្ជីឈ្មោះបេក្ខជន ដើម្បីទុកសិទ្ធិឱ្យតវ៉ាក្នុងករណី ដែលមិនមានឈ្មោះប្រឡងនៅពេលដែលព្រឹត្តិការណ៍សហគមន៍ថ្ងៃ ២០ កុម្ភៈ ត្រូវបានបិទបញ្ចប់។
លោក យក់ ប៊ុនណា អ្នកនាំពាក្យក្រសួងមុខងារសាធារណៈប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែឧសភានេះថា ចំពោះក្រសួងមុខងារសាធារណៈតម្រូវឱ្យបេក្ខជនត្រូវចាក់វ៉ាក់សាំងការពារជំងឺកូវីដ ១៩ នេះ ដោយសារបច្ចុប្បន្នជំងឺនេះ កំពុងតែមានការរីករាលដាលនៅក្នុងប្រទេស។
មន្ត្រីរាជការទាំងអស់ដែលជាអ្នកបម្រើសេវាសាធារណៈត្រូវតែចាក់វ៉ាក់សាំងប្រឆំាងជំងឺកូវីដ ១៩ ដើម្បីការពារខ្លួនទប់ទល់ទៅនឹងការឆ្លងផង និងកុំឱ្យឆ្លងទៅអ្នកដទៃផងដែរ។
លោក យក់ ប៊ុនណា ថ្លែងថា៖ «គាត់ត្រូវចាក់ទាំងអស់គ្នាជាសុវត្ថិភាពការងារ និងការការពារសុវត្ថិភាពសាធារណៈផងដែរ»។
លោក យក់ ប៊ុណ្ណា បញ្ជាក់ថា ការចាក់វ៉ាក់សាំងការពារខ្លួន គឺជារឿងចំាបាច់បំផុតសម្រាប់មនុស្សគ្រប់គ្នាជាពិសេសមន្ត្រីសាធារណៈ ព្រោះពួកគេជាអ្នកធានានិរន្តរភាពការងារ និងទំនាក់ទំនងជាមួយអ្នកស្វែងរកសេវាសាធារណៈច្រើន។
លោកនាយករដ្ឋមន្ត្រី ហ៊ុន សែន បានថ្លែងកាលពីថ្ងៃទី ៦ ខែមេសាថា មន្ត្រីរាជការទាំងអស់ត្រូវតែបំពេញកាតព្វកិច្ចចាក់វ៉ាក់សាំងជំងឺកូវីដ ១៩ សូម្បីតែមន្ដ្រីរាជការដែលត្រូវជ្រើសរើសថ្មី មន្ដ្រីកិច្ចសន្យា គឺត្រូវមានលក្ខខណ្ឌមួយតម្រូវជាចំាបាច់ គឺចាក់វ៉ាក់សាំងរួចហើយ ទើបអនុញ្ញាតឲ្យចូលក្របខ័ណ្ឌ ឬប្រឡងចូលក្របខ័ណ្ឌ។
លោក ហ៊ុន សែន យល់ឃើញថា បើមិនដូចនេះទេ វ៉ាក់សាំងដែលតម្រូវឲ្យចាក់ក្នុងរង្វង់ពី ១០ ទៅ ១៣ លាន នាក់ នឹងក្លាយជាអត់ន័យ ដោយសារមនុស្សមួយចំនួនមិនទទួលយក។
លោកមានប្រសាសន៍ថា៖ «យើងត្រូវគិតពីផលប្រយោជន៍រួមរបស់ជាតិ អំពីសុខភាពសាធារណៈ លើកលែងតែករណីមួយគត់ គឺគ្រូពេទ្យបញ្ជាក់ថា បុគ្គលនេះមិនអាចចាក់វ៉ាក់សាំងបានទេ»៕
