.jpg)
លោក ជិន ម៉ាលីន ថ្លែងក្នុងសន្និសីទព័ត៌មាន នាពេលកន្លងទៅ។ ហេង ជីវ័ន
ភ្នំពេញ៖ ក្រុមការងារបច្ចេកទេសរៀបចំគោលនយោបាយដោះស្រាយវិវាទក្រៅប្រព័ន្ធតុលាការនៃក្រសួងយុត្ដិធម៌ កំពុងស្នើគោលការណ៍រៀបចំសិក្ខាសាលាលើកចុងក្រោយជុំគ្នាជាមួយភាគីពាក់ព័ន្ធទាំងអស់ ដើម្បីពិនិត្យ ពិភាក្សាចុងក្រោយ លើឯកសារទស្សនាទាននៃការរៀបចំបបង្កើតគោលនយោបាយនេះ។ នេះបើតាមលោក ជិន ម៉ាលីន។
លោក ជិន ម៉ាលីន រដ្ឋលេខាធិការក្រសួងយុត្តិធម៌ និងជាប្រធានក្រុមការងារបច្ចេកទេសរៀបចំគោលនយោបាយដោះស្រាយវិវាទក្រៅប្រព័ន្ធតុលាការ កាលពីម្សិលមិញដឹកនាំកិច្ចប្រជុំជាមួយក្រុមការងារបច្ចេកទេស ដើម្បីពិនិត្យ និងពិភាក្សាលើឯកសារទស្សនាទាន ស្ដីពីការដោះស្រាយវិវាទក្រៅប្រព័ន្ធតុលាការនៅកម្ពុជាតាមប្រព័ន្ធអនឡាញ។
លោក ជិន ម៉ាលីន ថ្លែងប្រាប់ ភ្នំពេញ ប៉ុស្ដិ៍ នៅថ្ងៃនេះថា៖ «យើងនឹងរៀបចំសិក្ខាសាលាលើកទី៦ នាពេលខាងមុខ ដែលជាសិក្ខាសាលាចុងក្រោយបញ្ចប់ ដើម្បីពិភាក្សាទៅលើឯកសារទស្សនាទាននេះ។ កាលបរិច្ឆេទនៃការរៀបចំសិក្ខាសាលាលើកទី៦ ពេលណាជាក់លាក់ គឺយើងមិនទាន់កំណត់ទេ។ ប៉ុន្ដែ គឺយើងនឹងធ្វើក្នុងពេលឆាប់ៗខាងមុខនេះហើយ គឺក្រោយពីបានការឯកភាពគោលការណ៍ណែនាំពីឯកឧត្ដមរដ្ឋមន្រ្ដី»។
លោកបានបញ្ជាក់ថា សិក្ខាសាលាលើកទី៦ នាពេលខាងមុខនេះ គឺនឹងប្រមូលគ្រប់ភាគីពាក់ព័ន្ធទាំងអស់មកជុំគ្នា ដើម្បីពិនិត្យ ពិភាក្សា ចុងក្រោយទៅលើឯកសារទស្សនាទាននៃការរៀបចំបង្កើតគោលនយោបាយដោះស្រាយវិវាទក្រៅប្រព័ន្ធតុលាការនេះ។
បើតាមលោក ជិន ម៉ាលីន សិក្ខាសិលាពិគ្រោះយោបល់ចុងក្រោយលើកទី៦ លើឯកសារទស្សនាទានដែលរៀបចំឡើងនាពេលឆាប់ៗខាងមុខនេះ នឹងមានការចូលរួមពីគ្រប់ភាគីពាក់ព័ន្ធរួមមាន អន្តរក្រសួងពាក់ព័ន្ធ ស្ថាប័នតុលាការ គណៈមេធាវី គ្រឹះស្ថានអប់រំ ដៃគូអភិវឌ្ឍន៍ អង្គការសង្គមស៊ីវិលជាតិ និងអន្តរជាតិ មុននឹងដាក់ជូនថ្នាក់ដឹកនាំក្រសួងយុត្តិធម៌ពិនិត្យ និងសម្រេច។
លោកបានឱ្យដឹងថា សិក្ខាសាលា ៥ លើកកន្លងមក គឺក្រុមការងារបច្ចេកទេសបានធ្វើដាច់ដោយឡែកពីគ្នាជាមួយភាគីពាក់ព័ន្ធក្នុងនោះរួមមាន សិក្ខាសាលាមួយជាមួយក្រុមអ្នកជំនាញនៃក្រសួងយុត្ដិធម៌ សិក្ខាសាលាជាមួយក្រុមមេធាវីវិជ្ជាជីវៈ សិក្ខាសាលាជាមួយអន្តរក្រសួង ស្ថាប័នរដ្ឋដែលពាក់ព័ន្ធ និងសិក្ខាសាលាមួយជាមួយដៃគូអភិវឌ្ឍ និងសង្គមស៊ីវិល។
លោកបានថ្លែងថា ការរៀបចំបង្កើតយន្តការដោះស្រាយវិវាទក្រៅប្រព័ន្ធតុលាការ គឺជាផ្នែកមួយនៃយន្តការដែលមានចរិតលក្ខណៈជាយុទ្ធសាស្ដ្រក្នុងការកែទម្រង់ប្រព័ន្ធយុត្តិធម៌ ដែលនឹងត្រូវយកមកប្រើ នៅពេលយុទ្ធនាការដោះស្រាយបញ្ហា ការកកស្ទះសំណុំរឿងនៅតាមសាលាដំបូងរាជធានី-ខេត្ដត្រូវបានបញ្ចប់។
បើតាមលោក ជិន ម៉ាលីន រដ្ឋមន្ដ្រីក្រសួងយុត្ដិធម៌ លោក កើត រិទ្ធ ក្រោយឡើងកាន់តំណែងបានផ្ដោតសំខាន់ និងដាក់កម្មវិធីអាទិភាពសម្រាប់ក្រសួងលើការកែទម្រង់ប្រព័ន្ធយុត្ដិធម៌ គឺការរៀបចំយន្តការដោះស្រាយវិវាទក្រៅប្រព័ន្ធតុលាការនេះ។
លោក កើត រិទ្ធ រដ្ឋមន្ត្រីក្រសួងយុត្តិធម៌កាលពីថ្ងៃទី ២៦ ខែ មិថុនា ឆ្នាំ ២០២០ បានសម្រេចបង្កើតក្រុមការងារបច្ចេកទេសរៀបចំគោលនយោបាយនេះ ដោយបានតែងតាំងលោក ជិន ម៉ាលីន ជាប្រធានក្រុមការងារ។ ការបង្កើតគោលនយោបាយនេះ គឺជាការអនុវត្តនូវកម្មវិធីកំណែទម្រង់ច្បាប់ និងប្រព័ន្ធយុត្តិធម៌ដោយបង្ខិតសេវាយុត្តិធម៌ឱ្យទៅជិតប្រជាពលរដ្ឋ និងកាត់បន្ថយការកកស្ទះសំណុំរឿងនៅតាមសាលាដំបូងរាជធានី-ខេត្ដ។
រាជរដ្ឋាភិបាលកាលពីថ្ងៃទី ២៩ ខែមករា ឆ្នាំនេះ បានសម្រេចលើកកម្រិត គោលនយោបាយ «ភូមិ-ឃុំ-សង្កាត់ មានសុវត្ថិភាព» ជាគោលនយោបាយជាតិ ក្នុងនោះការដោះស្រាយវិវាទនៅមូលដ្ឋានក្រៅប្រព័ន្ធតុលាការប្រកបដោយគុណភាព និងប្រសិទ្ធភាព៕
