ភ្នំពេញៈ ក្រសួងយុត្តិធម៌នឹងរៀបចំឱ្យមានវគ្គបណ្តុះបណ្តាលស្តីពីក្រមព្រហ្មទណ្ឌ និងក្រមនីតិវិធីព្រហ្មទណ្ឌនៃព្រះរាជាណាចក្រកម្ពុជាដល់អ្នកសារព័ត៌មានជាតិ និងអន្តរជាតិនៅដើមខែក្រោយដើម្បីស្វែងយល់ពីចំណាត់ការនីតិវិធីនានារបស់អយ្យការ និងតុលាការកម្ពុជាក្នុងដំណើរការសំណុំរឿងព្រហ្មទណ្ឌ។
សេចក្តីជូនដំណឹងរបស់ក្រសួងយុត្តិធម៌ចុះថ្ងៃទី ២៨ ខែឧសភា បានលើកឡើងថាកម្មវិធីនេះនឹងរៀបចំឡើងជាភាសាខ្មែរដោយមានកិច្ចសហការជាមួយក្លិបអ្នកកាសែតកម្ពុជា (CCJ) នៅថ្ងៃទី ២ ខែមិថុនាវេលាម៉ោង ៩ ព្រឹកដល់ម៉ោង ១២ ថ្ងៃត្រង់នៅទីស្តីការក្រសួង។ ក្រសួងបញ្ជាក់ថា៖ «វគ្គស្វែងយល់អំពីក្រមព្រហ្មទណ្ឌ និងនីតិវិធីក្រមព្រហ្មទណ្ឌក្នុងគោលបំណងផ្តល់នូវមូលដ្ឋានគ្រឹះខ្លះៗទាក់ទងនឹងទិដ្ឋភាពក្រមព្រហ្មទណ្ឌដល់អ្នកសារព័ត៌ជាតិ និងអន្តរជាតិដើម្បីស្វែងយល់ពីនីតិវិធីរបស់តុលាការ»។ តែក្រសួងបញ្ជាក់ថាវគ្គស្វែងយល់នេះមិនមែនជាសន្និសីទកាសែត ឬជាវេទិកាសម្រាប់សួរដេញដោលទាក់ទងនឹងសំណុំរឿងជាក់ស្ដែងណាមួយនោះទេ។
មន្ត្រីទទួលបន្ទុកកិច្ចការសម្របសម្រួលលោក កាន់ សាវី ថ្លែងថាវគ្គសិក្សានេះជាលើកទីមួយហើយដើម្បីពង្រឹងមូលដ្ឋានដល់អ្នកសារព័ត៌មានទាក់ទងនឹងក្រមព្រហ្មទណ្ឌកម្ពុជា។
បើតាមសេចក្ដីជូនដំណឹងប្រសិនអ្នកសារព័ត៌មានជាតិ និងអន្តរជាតិមានបំណងចង់ចូលរួមក្នុងវគ្គស្វែងយល់នេះអាចចុះឈ្មោះជាមុនឲ្យបានមុនម៉ោង ៥ ល្ងាចថ្ងៃទី ៣១ ខែ ឧសភា ដោយទាក់ទងទៅកាន់មន្ត្រីទំនាក់ទំនងលោក កាន់ សាវី ដែលមានលេខទូរស័ព្ទ ០៦១ ៧៦៧ ៧៧៨ និង លោក ញឹម សុធា តាមរយៈលេខទូរស័ព្ទ ០១៦ ៩៧៤ ៤៤៤ តាមរយៈអ៊ីមែល info@moj.gov.kh ឬ info.moicambodia@gmail.com ឬក៏អាចចុះឈ្មោះតាមរយៈក្លិបអ្នកកាសែតកម្ពុជាក៏បាន៕
