The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​យុត្តិធម៌​បន្ត​ការពារ​ច្បាប់​បី​ដែល​រង​ការ​រិះគន់

ក្រសួង​យុត្តិធម៌​បន្ត​ការពារ​ច្បាប់​បី​ដែល​រង​ការ​រិះគន់

ជំនួប​គណៈកម្មការ​សភា​និង​ក្រុម​មន្ត្រី​ក្រសួង​យុត្តិធម៌​ពី​ម្សិលមិញ​។
ជំនួប​គណៈកម្មការ​សភា​និង​ក្រុម​មន្ត្រី​ក្រសួង​យុត្តិធម៌​ពី​ម្សិលមិញ​។ ផា លីណា

ក្រសួង​យុត្តិធម៌​បន្ត​ការពារ​ច្បាប់​បី​ដែល​រង​ការ​រិះគន់

ភ្នំពេញៈ រដ្ឋមន្រ្តី​ក្រសួង​យុត្តិធម៌ បាន​ធ្វើការ​បកស្រាយ​ជាថ្មី​ទៀត​ដោយ​ការពារ​ថា ច្បាប់​ចំនួន ៣ ពាក់ព័ន្ធ​នឹង​វិស័យ​តុលាការ ដែល​ទើប​ចូល​ជា​ធរមាន នៅ​ដើម​ឆ្នាំ ២០១៥ នេះ គឺ​ផ្តល់​សិទ្ធិ​អំណាច​ដល់​ក្រសួង​យុត្តិធម៌ ត្រឹមតែ​ការ​ចាត់ចែង និង​ត្រួតពិនិត្យ​ការងារ​រដ្ឋបាល ហិរញ្ញវត្ថុ និង​ការ​គ្រប់គ្រង​ទូទៅ​តែ​ប៉ុណ្ណោះ មិនមែន​លូកលាន់​ចូល​ទៅក្នុង​សិទ្ធិ​ធ្វើការ​សម្រេច​រឿងក្តី​របស់​ចៅក្រម​ដូច​ការ​រិះគន់​នានា​នោះ​ឡើយ​។

ច្បាប់​ទាំង​បី ដែល​ត្រូវ​បាន​អនុម័ត​យ៉ាង​លឿន ដោយ​រដ្ឋសភា​ឯកបក្ស ដែល​រង​ការ​រិះគន់​យ៉ាងខ្លាំង​នោះ រួមមាន​ច្បាប់​ស្តីពី​ការ​រៀបចំ​អង្គការ​តុលាការ ច្បាប់​ស្តីពី​លក្ខន្តិកៈ​ចៅក្រម និង​ព្រះរាជអាជ្ញា និង​ច្បាប់​ស្តីពី​ការ​រៀបចំ និង​ការ​ប្រព្រឹត្ត​ទៅ​នៃ​ឧត្តម​ក្រុមប្រឹក្សា​នៃ​អង្គចៅក្រម។

ថ្លែង​នៅក្នុង​សន្និសីទ​សារព័ត៌មាន​កាលពី​ម្សិលមិញ ក្រោយ​ជំនួប​បិទ​ទ្វារ​មួយ រវាង​គណៈកម្មការ​ទី ៦ នៃ​រដ្ឋសភា និង​រដ្ឋមន្រ្តី​ក្រសួង​យុត្តិធម៌ អនុរដ្ឋលេខាធិការ និង​ជា​អ្នក​នាំពាក្យ​ក្រសួង លោក ជិន ម៉ាលីន បាន​ឲ្យ​ដឹង​ថា ក្នុង​ការពិភាក្សា​នេះ លោក អង្គ វង្សវឌ្ឍានា រដ្ឋមន្រ្តី​ក្រសួង​យុត្តិធម៌ បាន​ឆ្លើយ​ទៅកាន់​គណៈកម្មការ​សភា ពាក់ព័ន្ធ​នឹង​មតិ​រិះគន់​របស់​សង្គម​ស៊ីវិល និង​សាធារណជន​មួយ​ចំនួន ដែល​ថា ច្បាប់​ពាក់ព័ន្ធ​តុលាការ​ចំនួន​ ៣​ ដែល​កំពុង​ត្រូវ​បាន​អនុវត្ត​នេះ​មិន​បាន​ផ្តល់​សិទ្ធិ​ដល់​ក្រសួង ក្នុង​ការ​ជ្រៀតជ្រែក​ការងារ​របស់​តុលាការ​នោះ​ទេ តែ​ក្រសួង​មាន​សិទ្ធិ​អំណាច​ចាត់ចែង​ការងារ​រដ្ឋបាល ហិរញ្ញវត្ថុ និង​ការ​គ្រប់គ្រង​ទូទៅ រីឯ​ការ​សម្រេច​សេចក្តី​ក្នុង​រឿងក្តី​របស់​តុលាការ​គឺ​វា​អាស្រ័យ​លើ​ចៅក្រម។

លោក​ថ្លែង​ថា៖ «ការងារ​អនុវត្ត​នីតិវិធី និង​ការ​សម្រេច​សេចក្តី គឺជា​សិទ្ធិអំណាច​របស់​តុលាការ រដ្ឋមន្រ្តី​ក្រសួង​យុត្តិធម៌​មិន​មាន​សិទ្ធិ​លូកដៃ​ទេ ហើយ​រយៈពេល​កន្លងមក​នេះ យើង​មាន​ធ្វើ​សិក្ខាសាលា​ក្នុង​ការ​ផ្សព្វផ្សាយ​ច្បាប់​នេះ ដោយ​មាន​ការ​ចូលរួម​ពី​ភាគី​ពាក់ព័ន្ធ​។ យើង​សង្កេត​ក្រោយ​មក ការ​រិះគន់​បាន​ថយចុះ​ពី​ខាង​សង្គម​ស៊ីវិល ហើយ​ខាង​អាមេរិក​គេ​ក៏​បង្ហោះ​លើ​វេបសាយសាទរ​ច្បាប់​នេះ​ផង​ដែរ»។

ពាក់ព័ន្ធ​នឹង​ការ​លើក​ឡើង​នេះ សមាជិក​គណៈកម្មការ​ទី​៦ និង​ជា​តំណាងរាស្ត្រ​មកពី​គណបក្ស​ប្រឆាំង លោក អ៊ុំ សំអាន បាន​ថ្លែង​ថា បើ​ទោះបី​ជា​ប្រធាន​គណៈកម្មការ​នេះ ដែល​មកពី​គណបក្ស​ប្រជាជន បាន​គាំទ្រ​នូវ​ការ​អនុវត្ត​ច្បាប់​នេះ​ក្តី តែ​លោក និង​តំណាងរាស្ត្រ គណបក្ស​សង្គ្រោះជាតិ មិន​បាន​គាំទ្រ​ទាំង​ស្រុង​នោះ​ទេ ដោយ​លោក គិត​ថា ច្បាប់​នេះ បាន​ផ្តល់​សិទ្ធិ​អំណាច​ហួស​ព្រំដែន ទៅ​ដល់​រដ្ឋមន្រ្តី​ក្រសួង​យុត្តិធម៌ គ្របដណ្តប់​ទៅលើ​តុលាការ។

លោក​បញ្ជាក់​ថា​៖ «ខ្ញុំ​គិត​ថា ច្បាប់​ទាំងនេះ គប្បី​មាន​ការ​ធ្វើ​វិសោធនកម្ម ដើម្បី​កាត់បន្ថយ​នូវ​សិទ្ធិ​អំណាច​របស់​រដ្ឋមន្រ្តី កុំ​ឲ្យ​លូកលាន់​ទៅលើ​តុលាការ​។ បើ​យើង​ពិនិត្យ​មើល​ច្បាប់​ទាំងនេះ​ឲ្យ​ច្បាស់ គឺ​រដ្ឋមន្រ្តី មាន​សិទ្ធិ​ពិនិត្យ​លើ​សេចក្តី​សម្រេច​របស់​តុលាការ និង​រាយការណ៍​ទៅ​ឧត្តម​ក្រុមប្រឹក្សា​នៃ​អង្គចៅក្រម ដែល​ការងារ​នេះ គប្បី​ជា​បន្ទុក​របស់​រដ្ឋបាល​តុលាការ​តែ​ប៉ុណ្ណោះ»។

ចំណែក​ប្រធាន​ផ្នែក​ស៊ើបអង្កេត​នៃ​សមាគម​ការពារ​សិទ្ធិមនុស្ស​អាដហុក​លោក នី ចរិយា យល់​ឃើញ​ថា ការ​លើក​ឡើង​របស់​ក្រសួង​យុត្តិធម៌​នេះ គឺ​គ្រាន់តែ​ជា​លេស​ដើម្បី​លាក់បាំង​ការពិត​តែ​ប៉ុណ្ណោះ។

លោក​ថា៖ «​ជាក់ស្តែង តួនាទី​របស់​រដ្ឋមន្រ្តី​ក្រសួង​យុត្តិធម៌ ដែល​ជា​សេនាធិការ​របស់​នាយករដ្ឋមន្រ្តី និង​ជា​សមាជិក​នៃ​ឧត្តម​ក្រុមប្រឹក្សា​អង្គចៅក្រម ដែល​ជា​ស្ថាប័ន​ត្រួតពិនិត្យ​ការងារ​របស់​ចៅក្រម គឺ​បាន​បង្ហាញ​ពី​ភាព​មិន​ឯករាជ្យ នៃ​ស្ថាប័ន​តុលាការ​រួច​ទៅ​ហើយ​»។

បើ​តាម​លោក​ម៉ាលីន ក្នុង​ជំនួប​កាលពី​ម្សិលមិញ រដ្ឋមន្រ្តី​ក្រសួង​យុត្តិធម៌ ក៏​បាន​លើក​ឡើង​ពី​គម្រោង​បង្កើត សាលាឧទ្ធរណ៍​តាម​តំបន់​ចំនួន​៧​ដើម្បី​ជួយ​សម្រួល​ការ​ធ្វើ​ដំណើរ និង​ការ​ផ្តល់​សេវា​យុត្តិធម៌​កៀកជិត​ទៅ​នឹង​ប្រជាពលរដ្ឋ​ផង​ដែរ ប៉ុន្តែ​ជា​ជំហាន​ដំបូង គឺ​នឹង​មាន​ការ​បង្កើត​សាលាឧទ្ធរណ៍​តាម​តំបន់តែ​ចំនួន​៣ ប៉ុណ្ណោះ គឺ​នៅ​ខេត្ត​ត្បូង​ឃ្មុំ ខេត្ត​បាត់ដំបង និង​ខេត្ត​ព្រះសីហនុ។

លោក ម៉ាលីន បាន បន្ថែម​ថា៖ « គម្រោង​នេះ​នឹង​ធ្វើ​ឡើង​នៅពេល​ឆាប់ៗ​នេះ តែ​យើង​ក៏​ត្រូវការ​ធនធាន​មនុស្ស និង​ហិរញ្ញវត្ថុ​បន្ថែម​ទៀត​ផង​ដែរ»៕

អត្ថបទគួរចាប់អារម្មណ៍