.jpg)
លោក កើត រិទ្ធិ រដ្ឋមន្ត្រីក្រសួងយុត្តិធម៌ ថ្លែងនាពេលកន្លងមក។ ហេង ជីវ័ន
ភ្នំពេញៈ ក្រសួងយុត្តិធម៌បានផ្សព្វផ្សាយសាលក្រមរដ្ឋប្បវេណីគំរូចំនួន ៤៤ នៅលើគេហទំព័ររបស់ខ្លួនចាប់ពីថ្ងៃទី ៣១ ធ្នូ ឆ្នាំ ២០២០ ដើម្បីឱ្យសាធារណជនអាចសិក្សាស្រាវជ្រាវ និងយកជាគំរូ។ ការផ្សព្វផ្សាយសាលក្រមគំរូនេះធ្វើឡើងដោយមានកិច្ចសហប្រតិបត្តិការជាមួយទីភ្នាក់ងារសហប្រតិបត្តិការអន្តរជាតិនៃប្រទេសជប៉ុនហៅកាត់ថា JICA។ នេះបើតាមសេចក្ដីជូនដំណឹងរបស់ក្រសួងយុត្តិធម៌។
បើតាមគេហទំព័ររបស់ក្រសួងយុត្តិធម៌សាលក្រមរដ្ឋប្បវេណីទាំង ៤៤ នេះ ភាគច្រើនជាសំណុំរឿងកិច្ចសន្យាខ្ចីប្រាក់ និងកិច្ចសន្យាទិញលក់អចលនទ្រព្យ។ លោក ជិន ម៉ាលីន អ្នកនាំពាក្យក្រសួងយុត្តិធម៌ថ្លែងថា សាលក្រមទាំងអស់នេះជាសាលក្រមដែលតុលាការបានចេញហើយអាចយកជាគំរូបាន ហើយមិនប៉ះពាល់ដល់កេរ្តិ៍ឈ្មោះ កិត្តិយស ឬការសម្ងាត់នៃភាគីពាក់ព័ន្ធឡើយ។
និស្សិតអាចយកសាលក្រមនេះជាមូលដ្ឋានក្នុងការសិក្សាស្រាវជ្រាវរបស់ពួកគេ ហើយក៏ជាគំរូសម្រាប់មន្ត្រីអនុវត្តច្បាប់ផងដែរ។ លោកពន្យល់ថា ជាគោលការណ៍ច្បាប់ សាលក្រមត្រូវប្រកាសជាសាធារណៈដោយមិនប៉ះពាល់ដល់ភាគីពាក់ព័ន្ធទេ ប៉ុន្តែមានគោលការណ៍លើកលែងខ្លះ ដូចជាសំណុំរឿងនោះប៉ះពាល់ដល់ជីវិតឯកជន ការសម្ងាត់មួយចំនួនដែលសាលក្រមមិនអាចផ្សព្វផ្សាយបាន។
លោកថ្លែងថា៖ «នេះជាចំណុចនៃការចាប់ផ្ដើមដោយការផ្សព្វផ្សាយសំណុំរឿងរដ្ឋប្បវេណីចំនួន ៤៤ ហើយយើងនឹងផ្សព្វផ្សាយបន្តទៀត ពាក់ព័ន្ធនឹងសំណុំរឿងរដ្ឋប្បវេណីផ្សេងទៀត និងសំណុំរឿងព្រហ្មទណ្ឌ និងសំណុំរឿងផ្សេងទៀតសម្រាប់ជាចំណេះដឹងដល់និស្សិតក្នុងការសិក្សាស្រាវជ្រាវ និងអនុវត្តច្បាប់។ ប៉ុន្តែវាត្រូវការពេលវេលាយូរបន្តិច ព្រោះក្រុមការងារត្រូវការពិនិត្យមើលដើម្បីចៀសវាងការប៉ះពាល់ដល់វិជ្ជាជីវៈ និងការសម្ងាត់កេរ្តិ៍ឈ្មោះ កិត្តិយសបុគ្គល និងភាគីពាក់ព័ន្ធ»។
អ្នកជំនាញផ្នែកច្បាប់លោក សុក សំអឿន បានសាទរចំពោះការផ្សព្វផ្សាយសាលក្រមគំរូនេះ។ លោកថា នេះជាអ្វីដែលមេធាវីបានទាមទារឱ្យមានជាយូរមកហើយដោយសារសាលក្រមគំរូជាពិសេសសាលក្រមរបស់តុលាការកំពូល អាចត្រូវបានប្រើប្រាស់ជាឯកសារយោង សម្រាប់សំណុំរឿងប្រហាក់ប្រហែលគ្នា។
លោកបញ្ជាក់ថា៖ «យើងអត់ចង់ឱ្យថារឿងក្ដីនេះកាត់ផ្សេងដល់រឿងក្ដីប្រហាក់ប្រហែលគ្នាដែរស្រាប់តែកាត់ផ្សឹង យើងអត់ចង់ឱ្យតុលាការធ្វើអ៊ីចឹង។ យើងចង់ឱ្យថា បើយើងបកស្រាយថា រឿងនោះវាឆ្វេង ឱ្យវាឆ្វេងដូចគ្នា។ កុំឱ្យរឿងដូចគ្នា អង្គហេតុដូចគ្នា ស្រាប់តែចៅក្រម ១ ក្រុមបកស្រាយឆ្វេង ចៅក្រម ១ ក្រុមបកស្រាយស្ដាំទៅ វាអត់ត្រូវ។ យើងចង់ឱ្យវាឯកភាពគ្នាតែមួយ មានន័យថា ឱ្យយុត្តិធម៌ បើអ្នកនោះគេកាត់យ៉ាងម៉េច អ្នកដែលមានរឿងដូចគ្នាត្រូវកាត់ទោសដូចគ្នា»។ លោកថា សាលក្រមគំរូបែបនេះមានសារៈសំខាន់ ជាពិសេសសម្រាប់ចៅក្រម ព្រោះវាជាយុទ្ធសាស្ត្រដែលចៅក្រមអាចយោងបាន៕
វីដេអូ៖
