.jpg)
លោក កើត រិទ្ធ ក្នុងសន្និសីទកាសែតកាលពីម្សិលមិញ។ ហេង ជីវ័ន
ភ្នំពេញៈ ក្រសួងយុត្តិធម៌បានប្រកាសបើកយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត ខណៈសំណុំរឿងព្រហ្មទណ្ឌដែលកំពុងចាត់ការសរុបមានចំនួនជិត ៤ ម៉ឺនសំណុំរឿងក្នុងនោះមានសំណុំរឿងគ្រឿងញៀន ៦ ២៦០ ករណីដែលនឹងត្រូវដោះស្រាយក្នុងយុទ្ធនាការនេះ។ ក្រសួងយុត្ដិធម៌រំពឹងថា យុទ្ធនាការនេះអាចនឹងកាត់បន្ថយការកកស្ទះសំណុំរឿងបានប្រមាណពី ៥០ ទៅ ៧០ ភាគរយក្នុងការអនុវត្ដយុទ្ធនាការរយៈពេល ៦ ខែ។
លោក កើត រិទ្ធ រដ្ឋមន្ដ្រីក្រសួងយុត្ដិធម៌បានថ្លែងបែបនេះនៅក្នុងសន្និសីទសារព័ត៌មានស្ដីពីការប្រកាសបើកយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្តកាលពីថ្ងៃចន្ទម្សិលមិញ។
លោកថ្លែងថា ក្នុងរយៈពេល ២ ឆ្នាំកន្លងមកនេះរាជរដ្ឋាភិបាលបានដាក់ចេញនូវយុទ្ធនាការប្រយុទ្ធប្រឆាំងនឹងបទល្មើសនានា ជាពិសេសគឺយុទ្ធនាការប្រយុទ្ធប្រឆាំងបទល្មើសគ្រឿងញៀនខុសច្បាប់ និងយុទ្ធនាការប្រយុទ្ធប្រឆាំងបទល្មើសធនធានធម្មជាតិ និងបទល្មើសព្រៃឈើ។ ការអនុវត្ដយុទ្ធនាការនេះបានទទួលលទ្ធផលជោគជ័យជាបន្តបន្ទាប់ និងមានការសាទរពីគ្រប់មជ្ឈដ្ឋាន។
លោកថ្លែងថា៖ «ទន្ទឹមនឹងជោគជ័យនៃយុទ្ធនាការនេះ សំណុំរឿងព្រហ្មទណ្ឌមានការកើនឡើងជាច្រើននៅតាមសាលាដំបូងរាជធានី ខេត្ដ ហើយចំនួនអ្នកជាប់ឃុំនៅតាមពន្ធនាគារក៏មានការកើនឡើងជាច្រើនដែលបង្កឲ្យមានភាពចង្អៀតណែនផងដែរជាពិសេសការកើនឡើងជាច្រើននៃសំណុំរឿង និងអ្នកជាប់ឃុំនៅក្នុងយុទ្ធនាការ ប្រយុទ្ធប្រឆាំងគ្រឿងញៀន»។
ក្នុងយុទ្ធនាការប្រយុទ្ធប្រឆាំងគ្រឿងញៀនចាប់ពីចុងឆ្នាំ ២០១៦ រហូតដល់ថ្ងៃទី ៣០ ខែ មេសា ឆ្នាំ ២០២០ ឃើញថា សំណុំរឿងគ្រឿងញៀនមានជិត ៣ ម៉ឺនសំណុំរឿងមានអ្នកជាប់ពាក់ព័ន្ធនឹងសំណុំរឿងគ្រឿងញៀននេះជិត ៦ ម៉ឺននាក់ត្រូវបានចាប់ខ្លួនក្នុងនោះមានមួយចំនួនគឺជាអ្នកប្រើប្រាស់គ្រឿងញៀន ត្រូវបានបញ្ជូនទៅមណ្ឌលអប់រំកែប្រែ និងមួយចំនួនទៀតគឺជាជនល្មើសគ្រឿងញៀនត្រូវចាប់បញ្ជូនទៅតុលាការដើម្បីចាត់ការតាមនីតិវិធីច្បាប់ និងរឹបអូសគ្រឿងញៀនសរុបបាន ១ ៦៥៩ គីឡូក្រាម។
លោករដ្ឋមន្ដ្រីបញ្ជាក់ថា៖ «តាមរយៈយុទ្ធនាការនេះ និងយុទ្ធនាការផ្សេងៗទៀតនៃការប្រយុទ្ធប្រឆាំងនឹងបទល្មើសគឺយើងឃើញមានការកើនឡើងសំណុំរឿងនៅតាមសាលាដំបូងរាជធានីខេត្ដ។ បើយើងផ្ទៀងផ្ទាត់សំណុំរឿងនៅតាមសាលាដំបូងរាជធានី-ខេត្ត សំណុំរឿងដែលកំពុងចាត់ការដែលមិនមែនជាសំណុំរឿងដែលចាត់ការរួចមានសាលក្រម មានសាលដីកាស្ថាពរ និងមិនរាប់បញ្ចូលសំណុំរឿងដែលបានកាត់សេចក្ដីរួចហើយបញ្ជូនទៅតុលាការជាន់ខ្ពស់មានជិត ៤ ម៉ឺនសំណុំរឿង (៣៩ ១៥២ សំណុំរឿង) និងមានអ្នកជាប់ឃុំសរុប ១២ ៦៥១ នាក់ (អ្នកជាប់ឃុំនៅក្នុងសំណុំរឿងគ្រឿងញៀន មាន ៦ ៩០០ នាក់)»។
លោករដ្ឋមន្ដ្រីថ្លែងថា គ្រាន់តែនៅសាលាដំបូងរាជធានីភ្នំពេញ សំណុំរឿងដែលនៅសល់មិនទាន់ចាត់ការរួចពីឆ្នាំ ២០១៩ មានរហូតដល់ ១២ ០០០ សំណុំរឿងហើយសំណុំរឿងដែលចូលថ្មីមានជាមធ្យមប្រមាណពី ៧០០ រឿងទៅ ៩០០ រឿងក្នុង ១ ខែដែលធ្វើឲ្យសាលាដំបូងរាជធានីភ្នំពេញក្នុងស្ថានភាពបច្ចុប្បន្នមិនអាចឆ្លើយតបដោះស្រាយបញ្ហាប្រឈមនេះបានដោយខ្លួនឯងនោះទេ។ លោកថា សាលាដំបូងមួយចំនួនទៀតនៅតាមបណ្ដាខេត្ដក៏ជួបនូវបញ្ហាប្រឈមដូចគ្នានេះដែរ ជាពិសេសខេត្ដដែលមានបទល្មើសគ្រឿងញៀនច្រើន។
លោកបញ្ជាក់៖ «ខ្ញុំជម្រាបជូនថា សាលាដំបូងរាជធានីភ្នំពេញបានខិតខំធ្វើការងារ ដោយយកចិត្តទុកដាក់ និងប្រកបដោយស្មារតីទទួលខុសត្រូវខ្ពស់។ ទិន្នន័យដែលទទួលបានចៅក្រម ១ រូបចាត់ការសំណុំរឿងបានរហូតទៅដល់ ១២៩ រឿងក្នុង ១ ឆ្នាំជាមធ្យម។ នេះជាទិន្នផលមួយខ្ពស់ជាងគេក្នុងចំណោមសាលាដំបូងរាជធានី ខេត្ដផ្សេងទៀត។ ចៅក្រម ១ រូបចាត់ការរឿងបានខ្ទង់ ១៣០ រឿង គឺច្រើនណាស់ គាត់ខិតខំណាស់ ប៉ុន្ដែទោះបីខំប្រឹងយ៉ាងណាក៏ដោយដោយសារតែសំណុំរឿងមានការកើនឡើងច្រើន សមត្ថភាពរបស់ចៅក្រម មិនអាចឆ្លើយតបទៅនឹងការកើនឡើងនៃសំណុំរឿងនាពេលបច្ចុប្បន្ននេះបានទេទាំងផ្នែកធនធានមនុស្ស មធ្យោបាយ និងសម្ភារ»។
លោករដ្ឋមន្ដ្រីថ្លែងទៀតថា ផ្អែកតាមផែនការ និងផ្អែកតាមទិន្នន័យសំណុំរឿងដែលទទួលបានពីសាលាជម្រះក្ដី និងដោយមានការចូលរួមគាំទ្រដោយសុឆន្ទៈពីគ្រប់តួអង្គ និងស្ថាប័នអនុវត្ដច្បាប់ទាំងអស់ដែលមានការពាក់ព័ន្ធ ក្រសួងយុត្ដិធម៌រំពឹងទុកថា យុទ្ធនាការនេះនឹងអាចកាត់បន្ថយការកកស្ទះសំណុំរឿងនៅតាមសាលាដំបូងរាជធានី-ខេត្ដបានប្រមាណចាប់ពី ៥០-៧០ ភាគរយនៅក្នុងរយៈពេល ៦ ខែនៃយុទ្ធនាការដែលនឹងអាចជួយឲ្យស្ថាប័នតុលាការមានសមត្ថភាពកាន់តែប្រសើរឡើងជាងមុនក្នុងការផ្ដល់សេវាយុត្ដិធម៌ក៏ដូចជាការដោះស្រាយសំណុំរឿងឲ្យបានឆាប់រហ័សស្របតាមច្បាប់ជាធរមាន។
បើតាមលោក កើត រិទ្ធ ដើម្បីបង្កើនប្រសិទ្ធភាពក្នុងការដោះស្រាយសំណុំរឿង ដែលកកស្ទះនៅតាមសាលាដំបូងរាជធានី-ខេត្ដ ក្រសួងយុត្ដិធម៌បានដាក់ចេញនូវសេចក្ដីណែនាំផ្លូវច្បាប់ សម្រាប់អនុវត្ដនូវគោលការណ៍មួយចំនួន ក្នុងនោះមាន ១- គោលការណ៍នៃការចោទប្រកាន់គឺក្រសួងយុត្ដិធម៌ លើកទឹកចិត្ដឲ្យព្រះរាជអាជ្ញា ប្រើវិធីចោទប្រកាន់តាមរយៈការបញ្ជូនរឿងដោយផ្ទាល់ទៅចៅក្រម ដើម្បីជំនុំជម្រះសម្រាប់បទមជ្ឈិមដែលច្បាប់អនុញ្ញាតឲ្យធ្វើចៀសវាងការអនុវត្ដជាទូទៅសម្រាប់បញ្ជូនរឿងទៅចៅក្រមស៊ើបសួរចំពោះសំណុំរឿងដែលពុំចាំបាច់។
២- គោលការណ៍នៃការឃុំខ្លួនបណ្តោះអាសន្ន ក្រសួងលើកទឹកចិត្ដឲ្យចៅក្រមស៊ើបសួរ ប្រើប្រាស់វិធានការដាក់ឲ្យស្ថិតក្រោមការត្រួតពិនិត្យតាមផ្លូវតុលាការ ជំនួសឲ្យការឃុំខ្លួនជាបណ្ដោះអាសន្ន ចំពោះបទមជ្ឈិមមួយចំនួន ដែលការឃុំខ្លួនពុំមែនជាការចាំបាច់។ ៣- គោលការណ៍នៃការព្យួរទោស លើកទឹកចិត្ដឲ្យចៅក្រមជំនុំជម្រះប្រើប្រាស់គោលការណ៍នៃការដាក់ទោសចំពោះបទមជ្ឈិមមិនធ្ងន់ធ្ងរ ដោយមានការព្យួរទោសជាពិសេសព្យួរទោសសាកល្បងដោយមានភ្ជាប់នូវកាតព្វកិច្ចមួយចំនួនសម្រាប់ទណ្ឌិតអនុវត្ដ។ ជាមួយគ្នានេះលោករដ្ឋមន្ដ្រីក្រសួងយុតិ្តធម៌ថ្លែងថា លោកស្វាគមន៍រាល់អង្គការសង្គមស៊ីវិលដែលចង់ចូលរួមសហការក្នុងផ្នែកណាមួយនៃការអនុវត្ដយុទ្ធនាការនេះ។
លោក ស៊ឹង សែនករុណា មន្ត្រីជាន់ខ្ពស់ផ្នែកស៊ើបអង្កេតនៃសមាគមការពារសិទ្ធិមនុស្ស អាដហុក (ADHOC) បានសាទរចំពោះការបើកផ្លូវឲ្យមានការសហការជាមួយអង្គការសង្គមស៊ីវិលលើការងារនេះ ហើយអង្គការលោកនឹងត្រៀមលក្ខណៈសហការលើសំណុំរឿងណាដែលពាក់ព័ន្ធក្នុងយុទ្ធនាការនេះ។
លោកថ្លែងថា៖ «ខាងសង្គមស៊ីវិល យើងក៏មានសំណុំរឿងមួយចំនួនកំពុងស្ថិតនៅតុលាការដែលមិនទាន់បានចាត់ការដែរ។ យើងនឹងចូលរួមជាមួយក្រសួងយុត្ដិធម៌ចំពោះករណីណាដែលសមាគមអាដហុកបានដាក់មេធាវីការពារតាមផ្លូវច្បាប់នេះ បើមានបញ្ហាអ្វីមួយ មិនប្រក្រតី យើងនឹងសរសេររបាយការណ៍ ឬផ្ដល់ព័ត៌មានដល់ក្រសួងដើម្បីមានវិធានការទៅលើដំណើរការនៃសំណុំរឿងនោះពិសេសចំពោះអ្នកដែលពាក់ព័ន្ធប្រព្រឹត្ដមិនត្រឹមត្រូវតាមផ្លូវច្បាប់»។
ក្នុងការអនុវត្ដយុទ្ធនាការនេះ ក្រសួងយុត្ដិធម៌បានដាក់ចេញនូវអភិក្រមចំនួន ២ ដើម្បីធានាឲ្យបាននូវភាពម៉ឺងម៉ាត់ សុចរិតភាព និងភាពត្រឹមត្រូវ។ អភិក្រមទី ១ គឺយុទ្ធនាការនេះត្រូវអនុវត្ដដោយផ្អែកលើមូលដ្ឋានច្បាប់ ជាពិសេសចំណាត់ការដោះស្រាយសំណុំរឿងត្រូវមានភាពម៉ឺងម៉ាត់ និងត្រូវអនុវត្ដឲ្យបានត្រឹមត្រូវស្របតាមច្បាប់ និងនីតិវិធីជាធរមាន។
បន្ថែមលើច្បាប់ និងបទដ្ឋានគតិយុត្តជាធរមាន ក្រសួងយុត្ដិធម៌បានដាក់ចេញនូវសេចក្ដីណែនាំផ្នែកផ្លូវច្បាប់ដើម្បីធានាដល់ការអនុវត្ដអភិក្រមនេះផងដែរ។ អភិក្រមទី ២- យុទ្ធនាការនេះត្រូវអនុវត្ដដោយផ្អែកលើមូលដ្ឋាននៃយុត្ដិធម៌សុចរិតភាព និងភាពត្រឹមត្រូវដោយមិនត្រូវឲ្យមានជាដាច់ខាតនូវស្ថានភាព «ត្រីងៀតឆ្លៀតពង» នៅក្នុងយុទ្ធនាការនេះ៕
វីដេអូ៖
