ភ្នំពេញៈ រដ្ឋមន្ដ្រីក្រសួងយុត្ដិធម៌ លោក កើត រិទ្ធ ក្នុងជំនួបពិភាក្សាជាមួយលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) ថ្ងៃទី ១៥ ឧសភាស្នើសុំសហការក្នុងយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្តដែលយុទ្ធនាការនឹងត្រូវប្រកាសបើកនាព្រឹកថ្ងៃនេះ។
សេចក្ដីជូនដំណឹងរបស់ក្រសួងយុត្ដិធម៌បញ្ជាក់ថា លោក កើត រិទ្ធ និងសហការីបានចូលជួបពិភាក្សាជាមួយលោក ឱម យ៉ិនទៀង អំពីយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្ត។
ក្រសួងបញ្ជាក់ថា៖ «យុទ្ធនាការនេះធ្វើឡើងក្នុងគោលបំណងដោះស្រាយការកកស្ទះសំណុំរឿងដែលមាននៅតាមសាលាដំបូងរាជធានី-ខេត្ដក៏ដូចជា ដើម្បីចូលរួមចំណែកដោះស្រាយការចង្អៀតណែននៃអ្នកជាប់ឃុំនៅតាមពន្ធនាគារ ព្រមទាំងលើកកម្ពស់សមត្ថភាពស្ថាប័នតុលាការក្នុងការផ្ដល់សេវាយុត្ដិធម៌ជូនប្រជាពលរដ្ឋឲ្យបានកាន់តែប្រសើរតាមរយៈការពន្លឿនចំណាត់ការសំណុំរឿង»។
លោក ជិន ម៉ាលីន អ្នកនាំពាក្យក្រសួងយុត្ដិធម៌ថ្លែងពីម្សិលមិញថា៖ «កិច្ចសហការ និងការគាំទ្រពីគ្រប់ភាគីពាក់ព័ន្ធទាំងអស់នឹងបញ្ជាក់លម្អិតនៅក្នុងសន្និសីទសារព័ត៌មាន [ព្រឹកថ្ងៃនេះ] ថា តើសហការយ៉ាងម៉េចគាំទ្រយ៉ាងម៉េចក្នុងយុទ្ធនាការនេះ»។
លោក ឱម យ៉ិនទៀង ប្រាប់ពីម្សិលមិញថា លោកវាយតម្លៃខ្ពស់រាល់គ្រប់ចំណុចនៃខ្លឹមសារដែលរដ្ឋមន្ត្រីថ្មី វ័យក្មេង ក្រសួងយុត្តិធម៌ រ៉ាប់រងភារកិច្ចដ៏ធ្ងន់ធ្ងរនេះបានរៀបចំយ៉ាងឈ្លាសវៃស្របតាមគតិយុត្ត និងបច្ចេកទេស ដើម្បីគាំទ្រ និងជួយតុលាការរាជធានី-ខេត្តក្នុងការដោះស្រាយការកកស្ទះសំណុំរឿង។
លោកថា៖ «ការពិតទៅពិតមែនតែនេះជាយុទ្ធសាស្ត្រជួយដល់តុលាការក្នុងការដោះស្រាយការកកស្ទះសំណុំរឿង តែខ្លឹមសារជ្រាលជ្រៅជាងនេះទៅទៀតគឺជាការពង្រឹងនូវគុណភាពរបស់តុលាការ។ មានន័យថា មិនមែនត្រូវតែដោះស្រាយសំណុំរឿងគិតតែពីលឿន ហើយមិនគិតអំពីនីតិវិធី មិនគិតអំពីយុត្តិធម៌ មិនគិតពីភាពស្អាតស្អំនោះឡើយ។ លឿន ត្រឹមត្រូវ យុត្តិធម៌ និងមិនពុករលួយ គឺជាស្នូលជាខ្លឹមនៃគំនិតកែទម្រង់របស់ឯឧត្តមរដ្ឋមន្ត្រី (ក្រសួងយុត្ដិធម៌)»។
លោកថ្លែងថា៖ «ចង់លឿនតែមិនស្អាត ឬចង់តែស្អាតតែមិនព្រមលឿន គឺជាជំងឺ ២ យ៉ាងដែលយុទ្ធនាការរបស់ឯកឧត្ដម កើត រិទ្ធ ចង់ព្យាបាលឲ្យបានជាស្រឡះពីវិស័យ យុត្តិធម៌កម្ពុជាដែលសម្តេចអគ្គមហាសេនាបតីតេជោ ហ៊ុន សែន បានត្រួសត្រាយនៅក្នុងយុទ្ធសាស្ត្រចតុកោណរបស់លោកយ៉ាងច្បាស់លាស់»។
លោកថា ACU នឹងចែករំលែកព័ត៌មានសម្ងាត់ដល់រដ្ឋមន្ត្រីជួយក្រសួងស្រាវជាវស៊ើបអង្កេត៕