.jpg)
បុរសម្នាក់កំពុងបើកមើលគេហទំព័រក្រសួងយុត្តិធម៌ដែលទើបចាប់ផ្តើមបើកដំណើរការ។ រូបថត ហ៊ាន រង្សី
ភ្នំពេញៈ ក្រសួងយុត្ដិធម៌កាលពីថ្ងៃចន្ទម្សិលមិញបានជូនដំណឹងស្ដីពីការដាក់ឱ្យដំណើរការសាកល្បងគេហទំព័រ (Website) ផ្លូវការរបស់ក្រសួងដែលជាការបូកបន្ថែមលើគេហទំព័រហ្វេសប៊ុក និងតេឡេក្រាមដែលមានស្រាប់ដើម្បីផ្សព្វផ្សាយព័ត៌មានពីវិស័យយុត្ដិធម៌ឱ្យបានទូលំទូលាយ ពិសេសសមិទ្ធផលការងារកំណែទម្រង់ច្បាប់ប្រព័ន្ធយុត្ដិធម៌ទៅដល់សាធារណជន។
លោក ជិន ម៉ាលីន អ្នកនាំពាក្យក្រសួងយុត្តិធម៌បានថ្លែងកាលពីម្សិលមិញថា គោលដៅនៃការដាក់ដំណើរការវេបសាយនេះគឺជាការគួបផ្សំបន្ថែមទៅលើគេហទំព័រហ្វេសប៊ុក និងបណ្ដាញសង្គមផ្សេងៗដែលក្រសួងយុត្ដិធម៌មាននាពេលបច្ចុប្បន្ន។ វេបសាយនេះបង្កើតឡើងក៏ដើម្បីបង្កើនប្រសិទ្ធភាពក្នុងការផ្សព្វផ្សាយនូវព័ត៌មានផ្សេងៗពាក់ព័ន្ធទៅនឹងវិស័យយុត្ដិធម៌ ជាពិសេសពាក់ព័ន្ធទៅដល់សមិទ្ធផលការងារកំណែទម្រង់ច្បាប់ និងប្រព័ន្ធយុត្ដិធម៌របស់ក្រសួងយុត្ដិធម៌។
លោកបញ្ជាក់ថា៖ «វេបសាយនេះក៏ចូលរួមក្នុងការអប់រំ និងផ្សព្វផ្សាយច្បាប់ទៅដល់សាធារណជនឱ្យបានជ្រាបផងដែរ។ វេបសាយនេះទៅថ្ងៃមុខនឹងមានការផ្សព្វផ្សាយទៅលើសាលក្រម សាលដីកា គំរូរបស់តុលាការ ដើម្បីឱ្យសាធារណជនបានជ្រាបបានយល់ ហើយក្រុមនិស្សិតបញ្ញវន្តក៏អាចមានមូលដ្ឋានក្នុងការស្រាវជ្រាវ»។
សេចក្តីជូនដំណឹងស្តីពីការដាក់ឱ្យដំណើរការសាកល្បង គេហទំព័ររបស់ក្រសួងយុត្តិធម៌កាលពីម្សិលមិញបានឲ្យដឹងថា ក្រុមការងារអភិវឌ្ឍគេហទំព័រក្រសួងយុត្តិធម៌បានដាក់ឱ្យដំណើរការសាកល្បងនូវគេហទំព័រផ្លូវការរបស់ក្រសួងតាមរយៈតំណភ្ជាប់ www.moj.gov.kh។ សេចក្ដីជូនដំណឹងបញ្ជាក់ថា៖ «អាស្រ័យដូចបានជម្រាបជូនខាងលើសូមសាធារណជនមេត្តាជ្រាប ហើយក្រុមការងារយើងខ្ញុំរីករាយរង់ចាំទទួលយោបល់កែលម្អនានាពីបងប្អូន»។
លោក ម៉ាលីន នៅក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងយុត្តិធម៌» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលកាលពីថ្ងៃទី ២៥ ខែ មីនា ឆ្នាំ ២០២០ បានថ្លែងថា ក្រសួងយុត្ដិធម៌គឺជាស្ថាប័ននៃអំណាចនីតិប្រតិបត្ដិដែលគ្រប់គ្រងដោយរាជរដ្ឋាភិបាល។ ក្រសួងនេះជាស្ថាប័នមានភារកិច្ចសំខាន់រៀបចំតាក់តែងច្បាប់ រៀបចំក្របខ័ណ្ឌគោលនយោបាយសម្រាប់តុលាការអនុវត្ដ និងតាមដានការអនុវត្ដច្បាប់ និងការអនុវត្ដគោលនយោបាយដែលបានដាក់ចេញទៅនោះ។
លោកពន្យល់ថា៖ «បានន័យថា រៀបចំច្បាប់ហើយដាក់ឱ្យអនុវត្ដ ហើយតាមដានមើលថា តើការអនុវត្ដនោះបានគ្រប់ជ្រុងជ្រោយមានប្រសិទ្ធភាពដែរឬអត់? បើមិនបានគ្រប់ជ្រុងជ្រោយមិនមានប្រសិទ្ធភាពទេដោយសារមូលហេតុអ្វី? ដោយសារច្បាប់នោះមិនល្អ ដោយសារនៅខ្វះខាតច្បាប់ អ៊ីចឹង ត្រូវធ្វើច្បាប់ថ្មី ឬមួយក៏ត្រូវកែសម្រួលច្បាប់ចាស់ ឬមួយក៏លុបច្បាប់ចាស់ចោលជាដើមទាំងនេះគឺជាការងាររបស់ក្រសួងយុត្ដិធម៌មិនមែនទៅសម្រេចក្ដីឱ្យអ្នកណាឈ្នះអ្នកណាចាញ់ ឬក៏បង្គាប់តុលាការឱ្យសម្រេចបែបនេះបែបនោះទេ»។
លោក ម៉ាលីន បានបញ្ជាក់ថាក្នុងរយៈពេលប្រមាណ ៤ ខែកន្លងទៅនេះពាក់ព័ន្ធទៅនឹងសេវាយុត្តិធម៌ដែលផ្ដល់ដោយតួអង្គតុលាការដែលក្រសួងយុត្ដិធម៌បានធ្វើកំពុងធ្វើ និងបន្តធ្វើទៅមុខទៀតនោះរួមមាន ការរៀបចំក្របខ័ណ្ឌច្បាប់ដូចជាក្រមព្រហ្មទណ្ឌ ក្រមនីតិវិធីព្រហ្មទណ្ឌ ក្រមរដ្ឋប្បវេណី និងក្រមនីតិវិធីរដ្ឋប្បវេណីច្បាប់ស្ដីពីការរៀបចំអង្គការចាត់តាំងតុលាការ ច្បាប់ស្ដីពី លក្ខន្តិកៈ ចៅក្រម និងព្រះរាជអាជ្ញា និងច្បាប់សម្រាប់រៀបចំ និងការប្រព្រឹត្ដទៅនៃឧត្ដមក្រុមប្រឹក្សានៃអង្គចៅក្រមជាដើមដែលទាំងនេះគឺជាច្បាប់គោល។
លោកបានឲ្យដឹងថា ក្រៅពីនេះក្រសួងមានភារកិច្ចត្រូវរៀបចំច្បាប់មួយចំនួនទៀតដើម្បីអាចឱ្យតុលាការបំពេញតួនាទីភារកិច្ចរបស់ខ្លួនបានពេញលេញ និងគ្រប់ជ្រុងជ្រោយ ហើយមានប្រសិទ្ធភាព។
លោក ម៉ាលីន បញ្ជាក់ថា៖ «បច្ចុប្បន្ននេះក្រសួងកំពុងរៀបចំច្បាប់ លក្ខន្តិកៈ ចំនួន ៣ គឺ លក្ខន្តិកៈ ក្រឡាបញ្ជី លក្ខន្តិកៈ សាការី និងលក្ខន្តិកៈ អាជ្ញាសាលា។ ក្រសួងក៏កំពុងពិនិត្យមើលច្បាប់ និងលក្ខន្តិកៈពាក់ព័ន្ធនឹងមេធាវីផងដែរ ដែលច្បាប់នេះមានហើយ ប៉ុន្ដែជាច្បាប់ចាស់ត្រូវការធ្វើបច្ចុប្បន្នភាព និងទំនើបកម្មឱ្យស្របទៅតាមបរិបទនាពេលបច្ចុប្បន្ននេះ។ ជាទិសដៅទៅមុខទៀត ក្រសួងនឹងសម្រេចនូវច្បាប់ លក្ខន្តិកៈទាំងនេះឱ្យបាននៅក្នុងអាណត្ដិនេះ»៕
