.jpg)
លោកអង្គ វង្សវឌ្ឍានា រដ្ឋមន្ត្រីក្រសួងយុត្តិធម៌។ ហុង មិនា
ភ្នំពេញៈ ក្រសួងយុត្តិធម៌បានបញ្ចេញប្រតិកម្មចំពោះការផ្សព្វផ្សាយព័ត៌មានដោយគ្មានមូលដ្ឋានច្បាប់របស់ស្ថានទូតសហរដ្ឋអាមេរិកនៅភ្នំពេញដែលមានចរិតជាការបំភ្លៃនិងបំភាន់ការយល់ដឹងដល់សាធារណៈចំពោះករណីសំណុំរឿងព្រហ្មទណ្ឌដែលមានជនត្រូវចោទឈ្មោះ កឹម សុខា ហើយទទូចឲ្យបញ្ឈប់ការបកស្រាយដោយបំភាន់ និងលាបពណ៌នយោបាយទៅលើការអនុវត្តច្បាប់ដែលជារដ្ឋអធិបតេយ្យរបស់កម្ពុជា។
យោងតាមសេចក្ដីថ្លែងការណ៍របស់អ្នកនាំពាក្យក្រសួងយុត្តិធម៌បានឲ្យដឹងថា៖ «ការណ៍ដែលស្ថានទូតសហរដ្ឋអាមេរិកនៅភ្នំពេញលើកឡើងថា លោក កឹម សុខា បានជាប់ក្នុងការឃុំឃាំងជិត ១៨ ខែមកហើយ គឺជាការអះអាងដោយកុហក និងបំភ័ន្តសាធារណជន និងខ្វះភាពយល់ដឹងលើទិដ្ឋភាពច្បាប់ និងនីតិវិធីរបស់តុលាការកម្ពុជា ដោយហេតុថា តាមផ្លូវច្បាប់ជនត្រូវចោទឈ្មោះ កឹម សុខា ត្រូវបានដាក់ឲ្យស្ថិតក្នុងរបបនៃការដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ និងមិនស្ថិតក្រោមរបបនៃការឃុំខ្លួនបណ្ដោះអាសន្ននោះឡើយ»។
ប្រតិកម្មនេះបានកើតឡើងក្រោយថ្ងៃទី ១៥ ខែកុម្ភៈ ឆ្នាំ ២០១៩ បន្ទាប់ពីស្ថានទូតសហរដ្ឋអាមេរិកបានផ្សព្វផ្សាយនូវការអត្ថាធិប្បាយមួយតាមទំព័រហ្វេសប៊ុកផ្លូវការរបស់ខ្លួនដែលមានអត្ថន័យ «តើអ្នកមានដឹងទេថាលោក កឹម សុខា បានជាប់ក្នុងការឃុំឃាំងជិត ១៨ ខែមកហើយ?វាមានរយៈពេល ៥៣០ ថ្ងៃនៃការជាប់ឃុំ។ គាត់ជាមនុស្សស្អាតស្អំដែលត្រូវបានឃុំខ្លួនដោយអយុត្តិធម៌ ក្រោមការចោទប្រកាន់មិនពិត។ មិនមានភ័ស្តុតាងណាមួយប្រឆាំងនឹងគាត់ឡើយ ហើយក៏មិនទាន់មានការកំណត់បើកសវនាការកាត់ទោសគាត់ដែរ។ គ្មានភ័ស្តុតាង គ្មានសវនាការកាត់ទោស គ្មានយុត្តិធម៌។ តើអ្នកកំពុងមើលឃើញរូបភាពរួម»។
សេចក្ដីថ្លែងការណ៍ដដែលនេះក៏បានឲ្យដឹងពីចំណាត់ការបន្តរបស់តុលាការដោយយោងតាមក្រមនីតិវិធីព្រហ្មទណ្ឌជាធរមាននៃព្រះរាជាណាចក្រកម្ពុជា ចៅក្រមស៊ើបសួរត្រូវបានផ្ដល់ពេលវេលាចាំបាច់នានា សម្រាប់ការស៊ើបសួរ និងការស្រាវជ្រាវប្រមូលភ័ស្ដុតាងឲ្យបានគ្រប់គ្រាន់មុននឹងសម្រេចដោយឆន្ទានុសិទ្ធិ និងដោយឯករាជ្យក្នុងការបិទបញ្ចប់ការស៊ើបសួររបស់ខ្លួន ដែលអាចជាការសម្រេចលើកលែងការចោទប្រកាន់ ឬការសម្រេចបញ្ជូនរឿងទៅជំនុំជម្រះនៅក្នុងដំណាក់កាលនីតិវិធីបន្ទាប់។
សេចក្តីថ្លែងការណ៍បានឲ្យដឹងថា៖ «ដូច្នេះតាមច្បាប់របស់កម្ពុជា ស្ថាប័នដែលមានសមត្ថកិច្ចក្នុងការសម្រេចថា ជនត្រូវចោទឈ្មោះ កឹម សុខា ជាមនុស្សស្អាតស្អំ ឬពិតជាមានកំហុសទាក់ទងនឹងការចោទប្រកាន់អំពីការឃុបឃិតគ្នាជាមួយបរទេសដើម្បីផ្តួលរំលំរដ្ឋអំណាចស្របច្បាប់នៅកម្ពុជា គឺមានតែស្ថាប័នតុលាការ នៃព្រះរាជាណាចក្រកម្ពុជាប៉ុណ្ណោះ។ តុលាការត្រូវធ្វើការសម្រេចដោយឯករាជ្យដោយផ្អែកលើអង្គច្បាប់ ព្រមទាំងអង្គហេតុ និងភ័ស្តុតាងដែលតុលាការប្រមូលបាន ហើយពុំមែនផ្អែកលើការអត្ថាធិប្បាយណាមួយរបស់ស្ថានទូតសហរដ្ឋអាមេរិកនោះឡើយ»។
សេចក្តីថ្លែងការណ៍បានឲ្យដឹងថាអាជ្ញាធរមានសមត្ថកិច្ចបានរកឃើញភ័ស្តុតាងដ៏រឹងមាំជាច្រើន និងគ្រប់គ្រាន់ដែលបង្ហាញថាឈ្មោះ កឹម សុខា មានជាប់ពាក់ព័ន្ធនឹងផែនការសម្ងាត់ ដោយឃុបឃិតគ្នាជាមួយបរទេសក្នុងការផ្តួលរំលំរដ្ឋអំណាចស្របច្បាប់នៅកម្ពុជាតាមបែបបដិវត្តន៍ពណ៌ ហើយឈ្មោះ កឹម សុខា បាននិយាយដោយផ្ទាល់មាត់ដោយខ្លួនឯងអំពីផែនការនេះ តាមរយៈវីដេអូឃ្លីបដែលត្រូវបានផ្សព្វផ្សាយដោយ CBN (Cambodian Broadcasting Network) ដែលមានមូលដ្ឋាននៅប្រទេសអូស្ត្រាលី។
ជនត្រូវចោទ កឹម សុខា ត្រូវបានចៅក្រមស៊ើបសួរសម្រេចឃុំខ្លួនជាបណ្តោះអាសន្ន កាលពីថ្ងៃទី ៥ ខែកញ្ញា ឆ្នាំ ២០១៧ ប៉ុន្តែ នៅថ្ងៃទី ៩ ខែកញ្ញា ឆ្នាំ ២០១៨ ចៅក្រមស៊ើបសួរក៏បានសម្រេចដោះលែងជនត្រូវចោទរូបនេះ ឱ្យនៅក្រៅឃុំវិញ ដោយជំនួសមកវិញនូវវិធានការនៃការសម្រេចដាក់ឱ្យស្ថិតនៅក្រោមការត្រួតពិនិត្យតាមផ្លូវតុលាការ។
សេចក្តីថ្លែងការណ៍នោះបានឲ្យដឹងថា៖ «អ្នកនាំពាក្យក្រសួងយុត្តិធម៌សំដែងនូវការសោកស្តាយជាខ្លាំងចំពោះស្ថានទូតសហរដ្ឋអាមេរិកប្រចាំកម្ពុជា ដែលផ្សាយព័ត៌មានដោយគ្មានមូលដ្ឋានច្បាប់ មានចរិតបំភ្លៃ និងបំភ័ន្តការយល់ដឹងរបស់សាធារណមតិលើករណីសំណុំរឿងព្រហ្មទណ្ឌលោក កឹម សុខា ហើយទម្លាក់កំហុសដោយអសុទ្ធចិត្តលើស្ថាប័ន អនុវត្តច្បាប់កម្ពុជាដែលបានអនុវត្តតួនាទី សមត្ថកិច្ចរបស់ខ្លួនដោយឯករាជ្យត្រឹមត្រូវតាមច្បាប់ និងនីតិវិធីជាធរមានរបស់ព្រះរាជាណាចក្រកម្ពុជា»។
«អ្នកនាំពាក្យក្រសួងយុត្តិធម៌សូមអំពាវនាវដ៏ទទូចដល់ស្ថានទូតសហរដ្ឋអាមេរិកនៅភ្នំពេញ សូមបញ្ឈប់ការបកស្រាយដោយបំភ័ន្ត និងលាបពណ៌នយោបាយ ទៅលើការអនុវត្តច្បាប់របស់ស្ថាប័នមានសមត្ថកិច្ច និងតុលាការ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា ការធ្វើអត្ថាធិប្បាយរបស់ស្ថានទូតអាមេរិកប្រចាំកម្ពុជាបានជ្រៀតជ្រែកកិច្ចការផ្ទៃក្នុងកម្ពុជា រំលោភទៅលើការអនុវត្តច្បាប់របស់អាជ្ញាធរកម្ពុជា និងបំភ័ន្តអន្តរជាតិ និងព្យាយាមធ្វើឲ្យខូចទំនាក់ទំនងរវាងប្រទេស កម្ពុជា និងសហរដ្ឋអាមេរិក។
លោកថ្លែងថា៖ «ការលើកឡើងរបស់គាត់ អាចនឹងធ្វើឲ្យមានការយល់ច្រឡំខ្លះពីសាធារណៈមតិ មហាជន និងមតិអន្តរជាតិ មួយចំនួន ក៏ប៉ុន្តែវាមិនអាចបិទបាំងទោសកំហុសលោក កឹម សុខា និងធ្វើឲ្យប៉ះពាល់ដល់នីតិវិធី របស់តុលាការកម្ពុជាបានទេ។ មិនអាចស្លឹកចេកមួយធាងបិទបាំងដំរីយ៉ាងធំនោះទេ។ អាមេរិកនិយាយដូចនេះដោយសារតែករណីលោក កឹម សុខា មានជាប់ពាក់ព័ន្ធនឹងខ្លួន»។
លោកថា រហូតដល់ពេលនេះសហរដ្ឋអាមេរិកនៅមិនទាន់បានឆ្លើយនឹងសំណួររបស់លោកនាយករដ្ឋមន្ត្រីថា សហរដ្ឋអាមេរិកពិតជាបាននៅពីក្រោយខ្នងលោក កឹម សុខា ដែរឬទេ?ហើយការលើកឡើងរបស់លោក កឹម សុខា ពិតមែនឬក៏ជាការភូតភរ ហើយថាប្រសិនបើសហរដ្ឋអាមេរិកថាខ្លួនស្អាតស្អំ និងមិនជាប់ពាក់ព័ន្ធលោក កឹម សុខា ពួកគេគួរតែធ្វើការបកស្រាយឲ្យបានច្បាស់។
លោក ឡៅ ម៉ុងហៃ អ្នកវិភាគនយោបាយបានអះអាងថា៖ «ស្ថានទូតអាមេរិកនិយាយការពិត ខណៈដែលក្រសួងយុត្តិធម៌កម្ពុជាបានដកស្រង់ខ្លឹមសារច្បាប់ដែលក្នុងករណីឃុំខ្លួនលោក កឹម សុខា មិនបានឆ្លុះបញ្ចាំងពីការពិត»។
ចំណែកលោក មាស នី អ្នកវិភាគនយោបាយម្នាក់ទៀត ក៏បានថ្លែងដែរថា រហូតមកទល់ពេលនេះតុលាការនៅមិនទាន់បានរកឃើញថា តើស្ថាប័នឬ បុគ្គលណាមួយ ដែលបានធ្វើការជាមួយលោក កឹម សុខា ដើម្បីផ្តួលរំលំរាជរដ្ឋាភិបាលកម្ពុជា។
លោកថា៖ «បើតុលាការហ៊ាននិយាយថា អាមេរិកនៅពីក្រោយ លុះណាតែតុលាការមានភ័ស្តុតាងគ្រប់គ្រាន់ដើម្បីយកមកកាត់ទោសលោក កឹម សុខា។ យើងចោទប្រកាន់អាមេរិក អាមេរិកនឹងធ្វើការការពារខ្លួនគេហើយ»៕
