ភ្នំពេញ៖ ក្រសួងសុខាភិបាលប្រកាសបន្តរកឃើញអ្នកឆ្លងកូវីដ ១៩ ក្នុងព្រឹត្ដិការណ៍សហគមន៍ ២០ កុម្ភៈ មានចំនួន ២៦២ នាក់ទៀត ដែលភាគច្រើនបំផុតជាអ្នករស់នៅរាជធានីភ្នំពេញ ខណៈមានអ្នកជាសះស្បើយចំនួន ៧៤ នាក់។ នេះបើតាមក្រសួងប្រកាសនៅថ្ងៃនេះ។
យោងតាមសេចក្ដីប្រកាសរបស់ក្រសួងសុខាភិបាលនៅមុននេះបន្តិចបានបង្ហាញថា ក្នុងចំណោមអ្នកឆ្លងទាំង ២៦២ នាក់ គឺសុទ្ធតែជាករណីឆ្លងក្នុងសហគមន៍នៃព្រឹត្តិការណ៍ ២០ កុម្ភៈ។ ក្នុងនោះរាជធានីភ្នំពេញមាន ២៣២ នាក់, ព្រះសីហនុ ១២ នាក់,កណ្តាល ៤ នាក់, ព្រៃវែង ២ នាក់, ពោធិ៍សាត់ ២ នាក់, សៀមរាប ២ នាក់, តាកែវ ២ នាក់, កំពង់ចាម ២ នាក់, ត្បូងឃ្មុំ ១ នាក់, កំពង់ស្ពឺ ១ នាក់, កំពង់ធំ ១ នាក់ និងស្វាយរៀង ១ នាក់។
សម្រាប់អ្នកដែលបានព្យាបាលជាសះស្បើយទាំង ៧៤ នាក់វិញ ក្នុងនោះមាន ២ នាក់ ជាអ្នកដំណើរចូលមកកម្ពុជា គឺបុរសជនជាតិឥណ្ឌូនេស៊ី អាយុ ៣៦ ឆ្នាំ មានអាសយដ្ឋានស្នាក់នៅ ក្នុងក្រុងប៉ោយប៉ែត ខេត្ដបន្ទាយមានជ័យ ជាអ្នកដំណើរមកពីឥណ្ឌូនេស៊ីមកដល់កម្ពុជាកាលពីថ្ងៃទី ១៦ ខែ មីនា ឆ្នាំ ២០២១ និងបុរសជនជាតិឥណ្ឌា អាយុ ២៨ ឆ្នាំ មានអាសយដ្ឋានស្នាក់នៅ រាជធានីភ្នំពេញ ជាអ្នកធ្វើដំណើរមកពីប្រទេសឥណ្ឌា មកដល់កម្ពុជានៅថ្ងៃទី ៤ ខែ មេសា ឆ្នាំ ២០២១។ ពួកគេទាំង ២ នាក់នេះ ត្រូវបានព្យាបាលជាសះស្បើយ ដោយទទួលបានលទ្ធផលតេស្ដអវិជ្ជមានវីរុសកូវីដ ១៩ ចំនួន ២ លើក ត្រូវបានអនុញ្ញាតឱ្យចេញពីមន្ទីរព្យាបាល។
ចំណែកករណីជាសះស្បើយចំនួន ៧២ នាក់ទៀត គឺជាអ្នកពាក់ព័ន្ធទៅនឹងព្រឹត្ដិការណ៍សហគមន៍ ២០ កុម្ភៈ ក្នុងខេត្ដព្រះសីហនុ កែប កោះកុង ស្វាយរៀង និងរាជធានីភ្នំពេញ។
យោងតាមតួលេខរបស់ក្រសួងសុខាភិបាល គិតត្រឹមព្រឹកថ្ងៃទី ១៦ មេសា ២០២១ នេះ ចំនួនអ្នកស្លាប់ដោយសារវីរុសកូវីដ ១៩ កើនដល់ ៣៨ នាក់ហើយ ក្នុងនោះ ស្រី ១៦ នាក់។
គិតត្រឹមថ្ងៃដដែលនេះ អ្នកឆ្លងកូវីដ ១៩ សរុបមានចំនួន ៥ ៤៨០ នាក់ ក្នុងនោះឆ្លងព្រឹត្តិការណ៍សហគមន៍ ២០ កុម្ភៈ ចំនួន ៤ ៩៣៨ នាក់។ ចំណែកអ្នកដែលបានព្យាបាលជាសះស្បើយមានចំនួន ២ ៣៩៣ នាក់ និងកំពុងសម្រាកព្យាបាលចំនួន ៣ ០៤៤ នាក់៕