ស្ត្រីម្នាក់កំពុងត្រូវបានចាក់វ៉ាក់សាំង នៅមន្ទីរពេទ្យមួយ ក្នុងខណ្ឌពោធិ៍សែនជ័យ នៅថ្ងៃទី ២៣ ខែ មីនា ឆ្នាំ២០២១។ ហេង ជីវ័ន
ភ្នំពេញ៖ ថ្ងៃនេះក្រសួងសុខាភិបាលប្រកាសពីករណីឆ្លងជំងឺកូវីដ ១៩ មានចំនួន ២៩ នាក់បន្ថែមទៀត ក្នុងនោះអ្នកដែលឆ្លងក្នុងព្រឹត្តិការណ៍សហគមន៍មានចំនួន ២៧ នាក់ ចំណែកអ្នកដែលបានព្យាបាលជាសះស្បើយ មានរហូតដល់ ៣៤ នាក់។
យោងតាមសេចក្តីប្រកាសរបស់ក្រសួងសុខាភិបាលបានឱ្យដឹងថា ករណីឆ្លងក្នុងព្រឹត្តិការណ៍សហគមន៍ ២០ កុម្ភៈ កើតមាននៅទីក្រុងភ្នំពេញ ចំនួន ២២ នាក់ ខេត្តកោះកុង ៣ នាក់ ខេត្តត្បូង ឃ្មុំម្នាក់ និងខេត្តកណ្តាលម្នាក់។
ចំណែកអ្នកជំងឺ ២ នាក់ ដែលមិនពាក់ព័ន្ធនឹងព្រឹត្តិការណ៍សហគមន៍នេះ ជាអ្នកដំណើរជនជាតិឥណ្ឌូនេស៊ី និងជនជាតិហ្វីលីពីន ដែលបានធ្វើដំណើរមកពីប្រទេសឥណ្ឌូនេស៊ី បន្តជើងហោះហើរ នៅប្រទេសសិង្ហបុរី មកដល់ប្រទេសកម្ពុជាកាលពីថ្ងៃទី ២២ ខែ មីនា ឆ្នាំ ២០២១។
ជាមួយគ្នានេះដែរ ក្រសួងក៏បានព្យាបាលអ្នកជំងឺកូវីដ ១៩ ដែលឆ្លងក្នុងព្រឹត្តិការណ៍សហគមន៍នេះ រហូតជាសះស្បើយចំនួន ៣៣ នាក់ និងបានអនុញ្ញាតឱ្យចេញពីមន្ទីរពេទ្យផងដែរ បន្ទាប់ពីតេស្តមានលទ្ធផលអវិជ្ជមានចំនួន ២ ដង។
គិតត្រឹមព្រឹកថ្ងៃទី ២៤ ខែ មីនា ឆ្នាំ ២០២១ កម្ពុជាមានអ្នកឆ្លងកូវីដ ១៩ សរុប ១ ៨១៧ នាក់ ក្នុងនោះអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ មានចំនួន ១ ២៩៣ នាក់ អ្នកដែលបានជាសះស្បើយ ចំនួន ១ ០៣៣ នាក់ អ្នកជំងឺកំពុងសម្រាកព្យាបាល ចំនួន ៧៧៧ នាក់ និងមានអ្នកស្លាប់ចំនួន ០៥ នាក់៕
.jpg)
