មន្ត្រីបាញ់អាល់កុលសម្លាប់មេរោគ មុននឹងអនុញ្ញាតអោយចូលមណ្ឌលសុខភាពចាក់អង្រែក្រោម កាលពីម្សិលមិញ។ ហេង ជីវ័ន
ភ្នំពេញ៖ ក្រសួងសុខាភិបាលបានឱ្យដឹងនៅព្រឹកថ្ងៃព្រហស្បតិ៍នេះថា អ្នកឆ្លងវីរុសកូវីដ ១៩ ចំនួន ៣៦ នាក់ ត្រូវបានរកឃើញបន្ថែមទៀត ដែលក្នុងនោះអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ មានចំនួន ៣៥ នាក់ ដែលធ្វើឱ្យតួលេខសរុបនៃអ្នកឆ្លងក្នុងព្រឹត្តិការណ៍នេះ បានកើនឡើងជាង ១ ០០០ នាក់។
នៅថ្ងៃនេះដែរ ក្រសួងក៏បានប្រកាសពីការព្យាបាលអ្នកជំងឺកូវីដ ១៩ ជាសះស្បើយរហូតដល់ ៥៨ នាក់ ដែលក្នុងនោះ ៥៤ នាក់ជាអ្នកជំងឺក្នុងព្រឹត្តិការណ៍សហគមន៍លើកទី៣ នេះ។
សេចក្តីជូនដំណឹងរបស់ក្រសួងសុខាភិបាលបានបន្តថា អ្នកដែលឆ្លងថ្មីនេះ កើតមាននៅក្នុងខេត្តកណ្តាលចំនួន ២១ នាក់ និងរាជធានីភ្នំពេញចំនួន ១៤ នាក់។ ចំណែកអ្នកវិជ្ជមានកូវីដ ១៩ ម្នាក់ទៀត ជាអ្នកដំណើរមកពីប្រទេសហ្វីលីពីន មកដល់កម្ពុជានៅថ្ងៃទី ៣ ខែ មីនា ឆ្នាំ ២០២១។
គិតត្រឹមម៉ោង ៧ ព្រឹកថ្ងៃទី ១៨ ខែ មីនា ឆ្នាំ ២០២១ នេះ កម្ពុជាមានអ្នកមានវិជ្ជមានវីរុសកូវីដ ១៩ សរុបចំនួន ១ ៥៤១ នាក់ ក្នុងនោះអ្នកដែលឆ្លងក្នុងព្រឹត្តិការណ៍សហគមន៍មានរហូតដល់ ១ ០២៥ នាក់ ឯអ្នកដែលបានព្យាបាលជាសះស្បើយមានចំនួន ៨៩៨ នាក់ និងអ្នកកំពុងសម្រាកព្យាបាលមានចំនួន ៦៤០ នាក់ និងស្លាប់ម្នាក់៕
.jpg)
