.jpg)
លោក ជា ចាន់តូ ទេសាភិបាលធនាគារជាតិ ជួបជាមួយលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម។ រូបថត ហ្វេ្រសញូវ
ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់បានចុះហត្ថលេខាលើអនុស្សរណៈយោគយល់គ្នា ( MoU) ស្តីពីការផ្លាស់ប្តូរព័ត៌មានពាក់ព័ន្ធនឹងការសម្អាតប្រាក់ និងហិរញ្ញប្បទានភេវរកម្មជាមួយអង្គភាពស៊ើបការណ៍ហិរញ្ញវត្ថុកម្ពុជា។
កិច្ចព្រមព្រៀងនេះត្រូវបានធ្វើឡើង ខណៈដែលរដ្ឋាភិបាលបានច្រានចោលរបាយការណ៍ដែលថា ការគ្រប់គ្រងធនាគារកម្ពុជា និងលំហូរសាច់ប្រាក់ដ៏ច្រើនលើសលប់របស់កម្ពុជាមិនបានត្រឹមត្រូវល្អដែលផ្តល់ឱកាសដល់ពាណិជ្ជករចិនក្នុងការលាងលុយកខ្វក់ដែលទទួលបានពីសកម្មភាពឧក្រិដ្ឋហើយយកមកទិញអចលនទ្រព្យនៅកម្ពុជា។
អត្រាអំពើពុករលួយខ្ពស់ និងប្រព័ន្ធតុលាការទន់ខ្សោយមានន័យថា ព្រះរាជាណាចក្រកម្ពុជាត្រូវបានស្ថិតនៅក្នុងបញ្ជីខ្មៅលើបញ្ជីសន្ទស្សន៍តាមដានការលាងលុយកខ្វក់ និងហិរញ្ញប្បទានភេរវកម្មសកល។ កាលពីឆ្នាំមុន ប្រទេសកម្ពុជា បានទទួលចំណាត់ថ្នាក់ទី ៩ ជាចំណាត់ថ្នាក់អាក្រក់បំផុតនៅក្នុងពិភពលោក។
ខណៈដែលទទួលបានពិន្ទុទាបនៅលើបញ្ជីភាពងាយរងគ្រោះកាន់តែអាក្រក់ បើប្រៀបធៀបទៅនឹងឆ្នាំ ២០១៦ នោះ ប្រទេសមួយនេះក៏ជាប់ចំណាត់ថ្នាក់ទី ៥ នៅក្នុងពិភពលោកដែលជាចំណាត់ថ្នាក់អាក្រក់ជាងគេនៅក្នុងតំបន់ ហើយកាលពីឆ្នាំមុនប្រទេសកម្ពុជាមានចំណាត់ថ្នាក់ខ្ពស់ជាងប្រទេសឡាវ និងប្រទេសដទៃទៀតចំពោះកង្វះខាតការការពារសន្តិសុខហិរញ្ញវត្ថុ។
អនុស្សរណៈនៃការយោគយល់គ្នាត្រូវបានចុះហត្ថលេខាកាលពីថ្ងៃអង្គារគឺវាបានកើតឡើងតែមួយថ្ងៃបន្ទាប់ពី គណៈកម្មាធិការដដែល ដែលរួមមានទាំងកូនប្រសាប្រុសរបស់លោកនាយករដ្ឋមន្ត្រី ហ៊ុន សែន លោក ឌី វិជ្ជា បានជួបជាមួយអង្គភាពប្រឆាំងអំពើពុករលួយ ដើម្បីរាយការណ៍អំពី «វឌ្ឍនភាព»។
លោក ឱម យ៉ិនទៀង ប្រធាន ACU ថ្លែងតាមរយៈខ្សែអាត់សំឡេងមួយដែលទទួលបានពីកិច្ចប្រជុំកាលពីថ្ងៃចន្ទបានបញ្ជាក់ថា៖ «យើងត្រូវគិតថា យើងកំពុងស្ថិតនៅមាត់ទ្វារ បញ្ជីប្រផេះ ដូច្នេះហើយយើងមានរយៈពេល ១៥ ខែគិតចាប់ពីខែកក្កដាឆ្នាំ ២០១៧ រហូតដល់ខែតុលាឆ្នាំក្រោយ ដើម្បីបង្ហាញអំពីកិច្ចខិតខំប្រឹងប្រែងរបស់យើង... និងដើម្បីកែលម្អចំណុចខ្សោយ»។
យោងតាមសេចក្តីថ្លែងការណ៍របស់អង្គភាពប្រឆាំងអំពើពុករលួយដែលបានចេញផ្សាយបន្ទាប់ពីកិច្ចប្រជុំនោះបានឱ្យដឹងថា៖ «ការបន្តអប់រំទប់ស្កាត់ និងប្រឆាំងអំពើពុករលួយនៅតែជាវិធានការស្នូលក្នុងការកាត់បន្ថយអំពើពុករលួយដើម្បីលើកកម្ពស់សង្គមស្អាតស្អំ»។
ធនាគារជាតិនៃកម្ពុជា ដែលជាសមាជិកគណៈកម្មាធិការនោះមិនបានឆ្លើយតបទៅនឹងសំណួរទាក់ទងទៅនឹងការលាងលុយកខ្វក់របស់ចិន តាមរយៈទីផ្សារអចលនទ្រព្យនៅកម្ពុជាទេនៅក្នុងសប្ដាហ៍នេះ៕NS
