.jpg)
សំណង់នៅតាមផ្លូវ ៦០ ម៉ែត្រក្នុងខណ្ឌមានជ័យ រាជធានីភ្នំពេញ។ ហ៊ាន រង្សី
ភ្នំពេញ: ក្រសួងរៀបចំដែនដី នគរូបនីយកម្ម និងសំណង់បានតែងតាំងមន្ត្រីអធិការកិច្ចចំនួន ៣៦២ នាក់ ដើម្បីចុះតាមដានអង្កេត ស្រាវជ្រាវ ត្រួតពិនិត្យ ប្រមូលភ័ស្តុតាង និងជំរុញការអនុវត្តច្បាប់ស្តីពីសំណង់នៅទូទាំងប្រទេស។ សង្គមស៊ីវិលគាំទ្រចំណាត់ការនេះប៉ុន្ដែស្នើអនុវត្តច្បាប់ឲ្យមានតម្លាភាព និងយុត្តិធម៌ ដោយចៀសវាងប្រព្រឹត្តអំពើពុករលួយ។
តាមសេចក្ដីប្រកាសស្ដីពី «ការតែងតាំងមន្ត្រីអធិការកិច្ចសំណង់» ដែលលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចុះហត្ថលេខានៅថ្ងៃទី ៤ ខែកញ្ញា ដែលភ្នំពេញ ប៉ុស្ដិ៍ទទួលបានពីម្សិលមិញបញ្ជាក់ថា សម្រេចតែងតាំងមន្ត្រីចំនួន ៣៦២ រូបដើម្បីចុះតាមដានអង្កេត ស្រាវជ្រាវ ត្រួតពិនិត្យ ប្រមូលភ័ស្តុតាង និងជំរុញការអនុវត្តច្បាប់ស្តីពីសំណង់។
សេចក្តីប្រកាសបន្តថា មន្ត្រីរួមមានទាំងថ្នាក់ជាតិ និងថ្នាក់ក្រោមជាតិនៅតាមមន្ទីរទាំង ២៥ រាជធានី-ខេត្ត ដែលត្រូវបំពេញភារកិច្ចដូចមានកំណត់ក្នុងច្បាប់សំណង់ និងប្រកាសអន្តរក្រសួងលេខ ១១៨ ចុះថ្ងៃទី ២ ខែ សីហា ឆ្នាំ ២០១៩ ស្តីពីនីតិវិធី និងបែបបទនៃការធ្វើអធិការកិច្ចសំណង់។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ពីម្សិលមិញមិនអាចទាក់ទងសុំការបញ្ជាក់បន្ថែមជុំវិញករណីនេះបានទេ ដោយទូរស័ព្ទលោកគ្មានអ្នកទទួល។
លោក អ៊ូ ដាវី ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបាត់ដំបងបានថ្លែងពីម្សិលមិញថា ការធ្វើអធិការកិច្ចសំណង់ គឺធ្វើឡើង ដើម្បីគ្រប់គ្រងការអភិវឌ្ឍអចលនវត្ថុឲ្យមានប្រសិទ្ធភាព គុណភាព សុវត្ថិភាព សណ្តាប់ធ្នាប់សង្គម និងបរិស្ថានសម្រាប់ការរស់នៅតាមរយៈការបង្ការ និងទប់ស្កាត់រាល់អំពើខុសច្បាប់ស្តីពីនគរូបនីយកម្ម និងសំណង់។
លោកបញ្ជាក់ថា៖ «យើងចាប់ផ្ដើមអនុវត្តចាប់ពីថ្ងៃ (ថ្ងៃទី៤ ខែកញ្ញា) ចាប់តាំងពីថ្ងៃចុះហត្ថលេខារបស់ឯកឧត្តមឧបនាយករដ្ឋមន្ត្រីតទៅ ហើយខ្ញុំក៏អត់អាចបញ្ជាក់អ្វីបន្ថែមលើសពីនេះបានដែរ»។
លោក សារិន វណ្ណា ប្រធានមន្ទីររៀបចំដែនដី រាជធានីភ្នំពេញបានថ្លែងកាលពីម្សិលមិញថា បើយោងតាមច្បាប់ស្តីពីសំណង់ មន្ត្រីអធិការកិច្ចសំណង់ទាំងអស់មានសិទ្ធិត្រួតពិនិត្យ បញ្ឈប់ ដកហូតលិខិតអនុញ្ញាត ឬអាជ្ញាប័ណ្ណពាក់ព័ន្ធជាបណ្តោះអាសន្ន ក៏ដូចជាពិន័យអន្តរការណ៍ក្នុងករណីអ្នកកាន់កាប់លិខិតអនុញ្ញាត ឬអាជ្ញាប័ណ្ណនោះប្រព្រឹត្តខុសច្បាប់ស្ដីពីសំណង់។
លោកថា បន្ថែមលើនេះ មន្ត្រីមានសិទ្ធិអំណាចក្នុងការចាប់យកវត្ថុតាង និងកសាងសំណុំរឿងនៃបទល្មើសសំណង់ និងចាត់វិធានការផ្សេងៗនៅក្នុងក្របខ័ណ្ឌនៃការអនុវត្តច្បាប់។ ក្នុងនោះរួមមាន សំណង់ដែលសាងសង់រួចរាល់ សំណង់កំពុងសាងសង់ គម្រោងសំណង់ និងការសុំច្បាប់ជាដើម។
លោកបញ្ជាក់ថា៖ «មន្ត្រីអធិការកិច្ច គឺដាច់ខាតត្រូវតែមានសិទ្ធិហើយ បើមន្ត្រីទាំងអស់នេះគ្មានសិទ្ធិ យើងធ្វើការងារគ្រប់គ្រង ត្រួតពិនិត្យបទល្មើសម៉េចកើត។ ជារួមគឺយើងមានសិទ្ធិកសាងសំណុំរឿងនៃបទល្មើសសំណង់ និងចាត់វិធានការផ្សេងៗដោយអនុវត្តតាមច្បាប់»។
លោក សួ ឆ្លូញ មន្ត្រីទំនាក់ទំនងនៃសហព័ន្ធសហជីពកម្មករសំណង់ និងព្រៃឈើកម្ពុជាបានគាំទ្រចំណាត់ការនេះ ប៉ុន្ដែលោកជំរុញឲ្យមន្ត្រីអធិការកិច្ចត្រូវតែអនុវត្តឲ្យមានតម្លាភាព និងយុត្តិធម៌។ ម្យ៉ាងទៀតលោកមានការព្រួយបារម្ភពីការប្រព្រឹត្តអំពើពុករលួយក្នុងអំឡុងពេលចុះអនុវត្តការងារ។
លោកបញ្ជាក់ថា៖ «ខ្ញុំចង់ឲ្យមានភាគីពាក់ព័ន្ធដូចជា អង្គការសង្គមស៊ីវិល ដៃគូអភិវឌ្ឍន៍ និងក្រសួងការងារ បណ្ដុះបណ្ដាល និងវិជ្ជាជីវៈចូលរួមក្នុងប្រតិបត្តិការនេះដែរ ព្រោះយើងបារម្ភពីភាពងាយស្រួលក្នុងការប្រព្រឹត្តអំពើពុករលួយ។ កន្លងមកយើងធ្លាប់ឃើញក្រុមអធិការកិច្ចក្រសួងចុះទៅការដ្ឋានសំណង់ខុសច្បាប់ហើយម្ចាស់សំណង់ដាក់លុយសូកប៉ាន់ ក្រុមមន្ត្រីគ្មានអ្វីតវ៉ា ក៏ត្រឡប់ទៅវិញអស់។ អ៊ីចឹងខ្ញុំក៏ចង់ឲ្យបង្ហាញរបាយការណ៍ដែលបានពីការចុះប្រតិបត្តិការនេះ»។
ច្បាប់សំណង់ដែលបានសម្រេចដាក់ឲ្យប្រើប្រាស់ជាផ្លូវការកាលពីថ្ងៃទី ៣ ខែ វិច្ឆិកា ឆ្នាំ ២០១៩ មានទាំងអស់ ២២ ជំពូក និង ១១១ មាត្រា។ ច្បាប់នេះ ធ្វើឡើងក្នុងគោលបំណងពង្រឹងគុណភាព សន្ដិសុខ សុវត្ថិភាពសំណង់ ការពារទ្រព្យសម្បត្តិ និងសុខុមាលភាពរបស់ម្ចាស់សំណង់ អ្នកប្រើប្រាស់សំណង់ និងសាធារណជន។ ច្បាប់ថ្មីនេះក៏នឹងបង្កើនគណនេយ្យភាព និងប្រសិទ្ធភាពក្នុងការប្រកបការងារ និងការប្រកបវិជ្ជាជីវៈក្នុងវិស័យសំណង់ ព្រមទាំងបង្កើនការជឿទុកចិត្តរបស់វិនិយោគិនក្នុងវិស័យសំណង់ផងដែរ៕
