ភ្នំពេញៈ ក្រសួងសាធារណការ និងដឹកជញ្ជូនសហការជាមួយវិទ្យាស្ថានបច្ចេកវិទ្យា-កម្ពុជា (តិចណូ) កំពុងរៀបចំកម្មវិធីបណ្ដុះបណ្ដាលថ្នាក់បរិញ្ញាបត្រទាក់ទងនឹងជំនាញសាងសង់ផ្លូវថ្នល់ និងស្ពានដល់កូនខ្មែរឱ្យក្លាយទៅជាវិស្វករ និងលើកកម្ពស់យុវជនកម្ពុជាលើឆាកអន្តរជាតិដើម្បីឆ្លើយតបនឹងបរិបទកម្ពុជា ដែលមានការរីកចម្រើន ខណៈគម្រោងធំៗនៅកម្ពុជាផ្នែកនេះកំពុងពឹងផ្អែកលើធនធានមនុស្សមកពីបរទេស។
លោក វ៉ា ស៊ឹមសុរិយា អ្នកនាំពាក្យក្រសួងសាធារណការ និងដឹកជញ្ជូនបានប្រាប់ ភ្នំពេញ ប៉ុស្តិ៍ ថា នេះគឺជាគំនិតរបស់លោកទេសរដ្ឋមន្ត្រី ស៊ុន ចាន់ថុល ដែលឱ្យក្រុមការងារមួយធ្វើការជាមួយនឹងវិទ្យាស្ថានបច្ចេកវិទ្យាដើម្បីរៀបចំកម្មវិធីសិក្សា (Curriculum) និងរៀបចំថ្នាក់រៀននូវជំនាញផ្លូវថ្នល់ និងស្ពាននេះ។ កន្លងមកនេះស្ថាប័នទាំង ២ បានចុះអនុស្សរណៈយោគយល់គ្នារួចហើយ ប៉ុន្តែមិនទាន់មានការអនុវត្តឱ្យបានពេញលេញនៅឡើយទេ។
លោកថ្លែងថា៖ «យើងត្រូវសហការជាមួយនឹងសាលាតិចណូសិនជាដំបូង ដោយបច្ចុប្បន្ននេះមិនទាន់មានអ្វីដំណើរការទេ យើងបានចុះ MoU ជាមួយនឹងវិទ្យាស្ថានរួចហើយ (មិនចាំឆ្នាំ) ប៉ុន្តែយើងត្រូវសើរើឡើងវិញ។
ពីមុនយើងសហការដោយសារមានគ្រូយើងខ្លះទៅបង្រៀននៅទីនោះ ប៉ុន្តែបច្ចុប្បន្ននេះយើងសុំសហការដំណើរការសិនដើម្បីឱ្យមានជំនាញខាងយើងសិន»។
បើតាមលោក វ៉ា ស៊ឹមសុរិយា កម្ពុជាមិនទាន់មានអ្នកជំនាញក្នុងការសិក្សា ឬសាងសង់គម្រោងស្ពាន និងផ្លូវល្បឿនលឿនទេ ខណៈបច្ចុប្បន្នកម្ពុជាមានលទ្ធភាពក្នុងការសាងសង់តែក្នុងគម្រោងមធ្យមប៉ុណ្ណោះ។ ហេតុដូច្នេះទើបបានលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនដាក់ចេញផែនការយ៉ាងមុតស្រួចដើម្បីធ្វើយ៉ាងណារៀបចំសាលាជំនាញនេះឱ្យកើតឡើងនៅក្នុងឆ្នាំ ២០២១ ខាងមុខនេះ។
លោកបានបញ្ជាក់ថា៖ «សម្រាប់ការសាងសង់សំណង់ខ្ពស់ៗ អ្នកជំនាញកម្ពុជាមានលទ្ធភាពក្នុងការគូរប្លង់ និងសាងសង់បាន ប៉ុន្តែសម្រាប់ការសាងសង់ និងសិក្សាស្ពានឆ្លងទន្លេមេគង្គដែលមានលក្ខណៈធំ ឬផ្លូវ Ex-pressway គឺមិនទាន់មានលទ្ធភាពនោះទេ»។ «យើងតែងស្នើសុំជំនួយពីគេ ហើយយើងជួលវិស្វករគេទៀតក្នុងការសាងសង់ស្ពាន និងផ្លូវល្បឿនលឿននេះ ហើយនៅពេលដែលយើងមានអ្នកជំនាញខ្លួនឯង យើងនឹងកាត់បន្ថយជួលគេយើងប្រើប្រាស់ធនធាននៅក្នុងស្រុករបស់យើង»។
លោក ស៊ុន ចាន់ថុល កាលពីថ្ងៃទី ២៣ ខែធ្នូ បានបញ្ជាក់ថា គោលបំណងក្នុងការបណ្តុះបណ្តាលជំនាញផ្លូវថ្នល់ និងស្ពានដល់យុវជនកម្ពុជានេះ ដើម្បីចូលរួមលើកកម្ពស់សមត្ថភាពកូនខ្មែរឱ្យកាន់តែខ្ពស់ត្រដែតលើឆាកអន្តរជាតិ ស្របតាមគោលនយោបាយអាទិភាពរបស់រាជរដ្ឋាភិបាលគឺមនុស្ស ផ្លូវ ភ្លើង និងទឹក។
ជាមួយគ្នានេះ លោករដ្ឋមន្ត្រីបានជំរុញឱ្យក្រុមការងារចំពោះកិច្ចរបស់ក្រសួងពិនិត្យលទ្ធភាព សហការជាមួយនឹងវិទ្យាស្ថានបច្ចេកវិទ្យាកម្ពុជាដើម្បីដាក់ឱ្យដំណើរការកម្មវិធីបណ្ដុះបណ្ដាលនេះចាប់ពីខែមករា ឆ្នាំ ២០២១ នេះតទៅ។
លោក សុខ គីន ប្រធានប្រតិបត្តិសហព័ន្ធសហជីពកម្មករសំណង់ និងព្រៃឈើកម្ពុជា បានស្វាគមន៍ចំពោះផែនការរបស់ក្រសួងសាធារណការ និងដឹកជញ្ជូន ក្នុងការរៀបចំឱ្យមានវគ្គបណ្តុះបណ្តាលជំនាញផ្លូវថ្នល់ និងស្ពាននេះដល់យុវជនកម្ពុជាឱ្យមានជំនាញច្បាស់លាស់។
លោកបានថ្លែងថា៖ «នៅពេលយុវជនកម្ពុជាមានជំនាញពួកគេនឹងមិនធ្វើចំណាកស្រុកទៅរកការងារធ្វើនៅក្រៅប្រទេសនោះទេ»។ លោកលើកជាឧទាហរណ៍ថា៖ «ដូចយើងដឹងហើយថា សូម្បីតែកម្មករសំណង់មានទាំងជំនាញ ប៉ុន្តែពួកគេមិនមានសញ្ញាបត្របញ្ជាក់ណាមួយដែលគេ ទទួលស្គាល់កម្រិតនេះ ឬកម្រិតនោះដែរ ហើយអ្វីដែលក្រសួងសាធារណការធ្វើនេះ គឺជាអ្វីដែលយើងចង់បានជាយូរមកហើយ»៕