.jpg)
គ្រូពេទ្យចាក់វ៉ាក់សាំងស៊ីណូវ៉ាក់អោយកម្មករ កាលពីថ្ងៃទី ៧ មេសា។ ហ៊ាន រង្សី
ភ្នំពេញ៖ ក្រសួងសុខាភិបាល បានរៀបចំយន្តការក្នុងការស្នើសុំចាក់វ៉ាក់សាំងដោយស្ម័គ្រចិត្តជូនដល់ជនបរទេសដែលកំពុងរស់នៅ ឬកំពុងបម្រើការងារនៅក្នុងប្រទេសកម្ពុជា ដែលក្រសួងការងារ និងបណ្តុះបណ្តាលវិជ្ជាជីវៈ និងអាជ្ញាធរមូលដ្ឋានរាជធានី-ខេត្ត ត្រូវទទួលខុសត្រូវរៀបចំបញ្ជីឈ្មោះជនបរទេស។
លោក ម៉ម ប៊ុនហេង រដ្ឋមន្រ្តីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ បានចេញសេចក្ដីជូនដំណឹងកាលពីល្ងាចថ្ងៃព្រហស្បតិ៍ ទី ០៨ ខែ មេសា ឆ្នាំ ២០២១ ពីយន្តការស្នើសុំចាក់វ៉ាក់សាំងបង្ការជំងឺកូវីដ ១៩ ដោយស្ម័គ្រចិត្តសម្រាប់ជនបរទេសនៅប្រទេសកម្ពុជា។
លោកបានបញ្ជាក់ថា ជនបរទេសទាំងនេះជាអ្នកដែលមិនស្ថិតនៅក្រោមឆ័ត្រអង្គការសហប្រជាជាតិ អង្គការអន្តរជាតិ អង្គការទ្វេភាគីស្ថាប័នហិរញ្ញវត្ថុអន្តរជាតិ ស្ថានទូតនៅកម្ពុជា ឬអង្គការស្របច្បាប់ក្នុងស្រុក ដែលមានការសម្របសម្រួលដោយក្រសួងការបរទេស និងសហប្រតិបត្តិការអន្តរជាតិ។
លោក ម៉ម ប៊ុនហេង ឱ្យដឹងតាមរយៈសេចក្តីជូនដំណឹងនេះថា៖ «ក្រសួងការងារទទួលខុសត្រូវរៀបចំបញ្ជីឈ្មោះជនបរទេស ដែលកាន់ទិដ្ឋាការធម្មតាប្រភេទ (E) និងមានប័ណ្ណការងារ ចេញដោយក្រសួងនេះ»។
លោកថា ជនបរទេសទាំងនេះត្រូវមានឯកសារតម្រូវសម្រាប់ស្នើសុំចាក់វ៉ាក់សាំង គឺលិខិតឆ្លងដែនមានសុពលភាព, ទិដ្ឋាការដែលមានសុពលភាព, ប័ណ្ណការងារ (work permits) ដែលចេញដោយក្រសួងការងារ និងបណ្តុះបណ្តាលវិជ្ជាជីវៈ។
ចំពោះអាជ្ញាធរមូលដ្ឋានរាជធានី-ខេត្ត-ក្រុង ទាំងអស់នៅក្នុងព្រះរាជាណាចក្រកម្ពុជា ត្រូវទទួលខុសត្រូវរៀបចំបញ្ជីឈ្មោះជនបរទេសផ្សេងទៀត ដែលមិនស្ថិតក្នុង ប្រភេទ (ក) រួមមាន ពលរដ្ឋខ្មែរដែលកាន់លិខិតឆ្លងដែនបរទេស (មានទិដ្ឋាការពិសេសប្រភេទ K) ជនបរទេសដែលបានរៀបការជាមួយពលរដ្ឋខ្មែរ ជនបរទេសចូលនិវត្តន៍ ជនបរទេសស្នាក់នៅស្របច្បាប់រយៈពេលវែង៕
