.jpg)
រថយន្តដឹកជ្រូកត្រូវបានសមត្ថកិច្ចឃាត់ទុក។ សហការី
ភ្នំពេញ៖ ក្រសួងកសិកម្ម រុក្ខាប្រមាញ់ និង នេសាទ បានសម្រេចលុបអាជ្ញាប័ណ្ណដឹកជ្រូករស់នាំចូលពីប្រទេសថៃរបស់ក្រុមហ៊ុនដានី ដេង អ៊ីមផត អិចផត (DANY DENG IMPORT EXPORT CO., LTD) បន្ទាប់ពីក្រុមហ៊ុននេះបានប្រព្រឹត្តកំហុសឆ្គងម្ដងហើយម្ដងទៀត ដោយមិនរៀងចាល។ នេះបើយោងតាមមន្ត្រីជាន់ខ្ពស់នៃអគ្គនាយកដ្ឋានសុខភាពសត្វនិងផលិតកម្មសត្វ។
លោកតាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពនិងផលិតកម្មសត្វ នៃក្រសួងកសិកម្ម រុក្ខាប្រមាញ់ និងនេសាទ បានថ្លែងប្រាប់ប្រព័ន្ធផ្សព្វផ្សាយ កាលពីថ្ងៃព្រហស្បតិ៍ សប្ដាហ៍មុន ថា ក្រុមហ៊ុននេះបានប្រព្រឹត្តកំហុសឆ្គងលើចំណុចដដែលៗម្ដងហើយម្ដងទៀត ជុំវិញករណីដឹកជញ្ជូនជ្រូករស់ឆ្លងកាត់ពីខេត្តមួយទៅខេត្តមួយ លើសពីបរិមាណនៃការស្នើសុំ និង គ្មានលិខិតបញ្ជាក់ពីសុខភាពសត្វច្បាស់លាស់ពីសា្ថប័នជំនាញនៃប្រទេសថៃ ដែលជាប្រភពដើមទី នៃការនាំចេញសត្វជ្រូករស់មកក្នុងទីផ្សារកម្ពុជា។
លោក ផាន់ណារ៉ា បានបញ្ជាក់ថា៖ «បើទោះជាក្រសួងបានធ្វើការផាកពិន័យ និងបង្ខំឲ្យធ្វើកិច្ចសន្យាបញ្ឈប់សកម្មភាពដឹកជញ្ជូនជ្រូករស់លើសបរិមាណនៃការស្នើសុំជាច្រើនលើកច្រើនសាក៏ដោយ ក៏ក្រុមហ៊ុននេះនៅតែមិនរៀងចាល។ ជាក់ស្ដែង កាលពីថ្ងៃទី២១ ខែមេសា ឆ្នាំ ២០២០ ក្រុមហ៊ុននេះបានធ្វើកិច្ចសន្យាថានឹងមិនឲ្យមានកំហុសឆ្គងលើករណីហ្នឹងទៀតទេ ប៉ុន្តែនៅថ្ងៃទី០៥ ខែឧសភា ឆ្នាំ២០២០ ក្រុមហ៊ុននេះបានប្រព្រឹត្តកំហុសឆ្គងដដែលនេះម្ដងទៀត។ ដូច្នេះក្រសួងគ្មានជម្រើសអ្វីក្រៅពីលុបអាជ្ញាប័ណ្ណក្រុមហ៊ុននេះមិនឲ្យនាំចូលជ្រូកពីប្រទេសជិតខាងមកក្នុងទីផ្សារកម្ពុជាតទៅទៀត»។
លោក ខូវ ហេង ម្ចាស់ក្រុមហ៊ុន ដានី ដេង អ៊ីមផត អិចផត បានប្រាប់ភ្នំពេញប៉ុស្តិ៍ ដោយទទួលស្គាល់នូវកំហុសឆ្គងទាំងនោះទាំងស្រុង ដោយអះអាងថាវាជាការធ្វេសប្រហែសរបស់អ្នកគ្រប់គ្រង និង បុគ្គលិកផ្នែកដឹកជញ្ជូនរបស់ក្រុមហ៊ុននៃសាខាខេត្តឧត្តរមានជ័យ។ ទោះយ៉ាងណា វាជាបន្ទុកនៃការទទួលខុសត្រូវរួមរបស់ក្រុមហ៊ុនទាំងមូល។
លោកថ្លែងថា៖«ក្រុមហ៊ុនយើងសូមទទួលយកការបង់ផាកពិន័យទៅតាមការកំណត់នៃច្បាប់ ចំពោះកំហុសឆ្គង គ្រប់យ៉ាងដែលក្រុមការងាររបស់ក្រុមហ៊ុនយើងបានប្រព្រឹត្តឡើងដោយអចេតនានេះ។ ក្រុមហ៊ុនយើងសូមឲ្យក្រសួងមេត្តាអនុញ្ញាត ឲ្យក្រុមហ៊ុនយើងខ្ញុំអាចបន្តអាជ្ញាប័ណ្ណ អាជីវកម្មនាំចូលជ្រូករស់ពីប្រទេសថៃឡើងវិញដោយក្ដីអនុគ្រោះ»។
លោក ហេងបានឲ្យដឹងថាក្រុមហ៊ុន មានបុគ្គលិកនិងកម្មករ សរុបជិត៧០នាក់ និងមានអាជីវករលក់សាច់ជ្រូកជាដៃគូលើមុខជំនួញនេះប្រមាណជាង១០០នាក់នៅទូទាំងប្រទេសកម្ពុជា។ ការលុបអាជ្ញាប័ណ្ណនាំចូលជ្រូករស់ពីប្រទេសថៃរបស់ក្រុមហ៊ុននេះ នឹងធ្វើឲ្យបុគ្គលិកនិងកម្មករជិត៧០នាក់នោះបាត់បង់ការងារនិងប្រាក់ចំណូលសម្រាប់ដោះស្រាយជីវភាពរបស់ពួកគេ។
កម្លាំងសមត្ថកិច្ចជំនាញអគ្គនាយកដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម រុក្ខាប្រមាញ់និងនេសាទ កាលពីថ្ងៃទី០៥ ខែឧសភា ឆ្នាំ ២០២០ បានសហការជាមួយកម្លាំងការិយាល័យសុខភាពសត្វ និង ផលិតកម្មសត្វ នៃមន្ទីរកសិកម្ម រុក្ខាប្រមាញ់និងនេសាទខេត្តបន្ទាយមានជ័យ បានបង្ក្រាបចាប់ឃាត់រថយន្តរបស់ក្រុមហ៊ុន ដានី ដេង អ៊ីមផត អិចផត ដែលផ្ទុកសត្វជ្រូករស់ចំនួន៦០ក្បាល ដែលចំនួននេះបានលើសពីលិខិតស្នើសុំ ដែលចេញដោយការិយាល័យសុខភាពសត្វ និង ផលិតកម្មសត្វ ខេត្តឧត្តរមានជ័យចំនួន២០ក្បាល។
ក្រៅពីត្រួតពិនិត្យឃើញដឹកលើសបរិមាណនៃការស្នើសុំ មន្ត្រីជំនាញក៏បានរកឃើញថាក្រុមហ៊ុននេះ បានប្រើប្រាស់លិខិតក្លែងបន្លំអំពីការបញ្ជាក់សុខភាពសត្វពីប្រទេសថៃផងដែរ ដើម្បីសុវត្ថិភាពសម្រាប់អ្នកបរិភោគ ក្រុមមន្ត្រីជំនាញបានសម្រេចនាំរថយន្តដឹកជ្រូកទាំងនោះ មកភ្នំពេញដើម្បីពិសោធ ស្វែងរកជំងឺឆ្លងផ្សេងៗ ប៉ុន្តែត្រូវបានកម្លាំងសមត្ថកិច្ចចម្រុះខេត្តកំពង់ធំ រារាំងនិងស្នើឲ្យសមត្ថកិច្ចនៃអគ្គនាយកដ្ឋានសុខភាពសត្វ និងផលិតកម្មសត្វ នាំយករថយន្តដឹកសត្វជ្រូកនោះ ត្រឡប់ទៅដោះស្រាយនៅខេត្តឧត្តរមានជ័យវិញ។ បន្ទាប់ពីមានបាតុភាពនោះកើតឡើង នៅថ្ងៃទី០៩ ខែឧសភា ឆ្នាំ ២០២០ ក្រសួងកសិកម្ម រុក្ខាប្រមាញ់និងនេសាទ ក៏បានសម្រេចលុបចោលអាជ្ញាប័ណ្ណនាំចូលជ្រូករស់ពីប្រទេសថៃពីក្រុមហ៊ុននេះតែម្ដង។
គួរបញ្ជាក់ថា កាលពីថ្ងៃទី៣០ ខែមេសា ឆ្នាំ២០២០ ក្រសួងកសិកម្ម រុក្ខាប្រមាញ់និងនេសាទ ក៏បានសម្រេចផ្អាកជាបណ្ដោះអាសន្ននូវការនាំចូលសត្វជ្រូករស់ពីប្រទេសថៃរបស់ក្រុមហ៊ុនចាន់ធូមានជ័យ អ៊ីមផត អិចផត និង ក្រុមហ៊ុន ៣-ធីអេច អេហ្រ្គី ឌីវេឡុបម៉ិន ផងដែរ បន្ទាប់ពីរកឃើញនូវកំហុសឆ្គងមួយចំនួនរបស់ក្រុមហ៊ុនទាំង២នេះ ក្នុងការលក់ឬផ្ទេរសិទ្ធិក្នុងការធ្វើអាជីវកម្ម នាំចូលជ្រូករស់ពីប្រទេសថៃ ទៅឲ្យអាជីវករផ្សេងទៀត ផ្ទុយទៅនឹងកិច្ចព្រមព្រៀងនិងសេចក្ដីណែនាំរបស់ក្រសួង និង ការដឹកជញ្ជូនសត្វលើសពីបរិមាណដែលបានស្នើសុំឬអនុញ្ញាតពីក្រសួងជាដើម។
ចំណាត់ការរបស់ក្រសួងកសិកម្ម ក្នុងការលុបអាជ្ញាប័ណ្ណនាំចូលជ្រូកពីប្រទេសថៃរបស់ក្រុមហ៊ុន ដានី ដេង និង ការផ្អាកជាបណ្ដោះអាសន្ននូវការនាំចូលជ្រូករស់ពីប្រទេសថៃរបស់ក្រុមហ៊ុនចាន់ធូមានជ័យ អ៊ីមផត អិចផត និង ក្រុមហ៊ុន ៣-ធីអេច អេហ្រ្គី ឌីវេឡុបម៉ិន ត្រូវបានសមាគមន៍អ្នកចិញ្ចឹមជ្រូកនៅកម្ពុជា ចាត់ទុកថា ជាវិធានការដ៏សំខាន់បំផុតមួយក្នុងការចូលរួមចំណែកធានានូវស្ថិរភាពតម្លៃសត្វជ្រូករស់នៅក្នុងស្រុក និងលើកកម្ពស់ដល់អ្នកចិញ្ចឹមសត្វក្នុងស្រុក។
លោក ស្រ៊ុន ពៅ ប្រធានសមាគមន៍អ្នកចិញ្ចឹមជ្រូកកម្ពុជា បាននិយាយថា នៅពេលនេះ ផលិតកម្មសត្វជ្រូកនៅកម្ពុជា មានជ្រូក២លាន៣សែនក្បាល ដែលអាចផ្គត់ផ្គង់លើទីផ្សារក្នុងស្រុកបានរហូតដល់៨២ភាគរយ ក្នុងមួយឆ្នាំៗ ១៨ភាគរយទៀតគឺជាការនាំចូលពីបណ្ដាប្រទេសជិតខាង។ ប៉ុន្តែបច្ចុប្បន្នការរាតត្បាតនៃជំងឺកូវិដ១៩ បានធ្វើឲ្យតម្រូវការនៃអ្នកបរិភោគមានការថយចុះ ដូច្នេះផលិតកម្មជ្រូកនៅក្នុងស្រុកគឺអាចផ្គត់ផ្គង់បានគ្រប់គ្រាន់
ល្មម។
លោកថ្លែងថា៖«យើងគាំទ្រចំពោះចំណាត់ការរបស់ក្រសួងកសិកម្ម រុក្ខាប្រមាញ់និងនេសាទ ចំពោះក្រុមហ៊ុនទាំង៣ខាងលើនោះ ហើយយើងចង់ឲ្យមានចំណាត់ការបែបនេះទៅលើក្រុមហ៊ុនឬអាជីវករដទៃទៀត ដែលបានប្រព្រឹត្តផ្ទុយលើកិច្ចព្រមព្រៀង និងសេចក្ដីណែនាំរបស់ក្រសួង ដូចគ្នានេះ ដោយគ្មានការលើកលែង»៕
