.jpg)
ពិធីបុណ្យទន្លេលើកទី៥ នៅខេត្តកំពង់ឆ្នាំង កាលពីឆ្នាំ ២០១៩។ រូបថត ក្រសួងទេសចរណ៍
ភ្នំពេញៈ ពិធីបុណ្យទន្លេលើកទី៧ ដែលគ្រោងរៀបចំនៅខេត្តកំពង់ធំ នាថ្ងៃទី ១៤ ខែមីនា ឆ្នាំនេះ នឹងត្រូវលើកទៅធ្វើនៅឆ្នាំ ២០២២ វិញ ដោយសារបារម្ភពីការឆ្លងជំងឺកូវីដ ១៩។ នេះបើតាមលោក តុប សុភ័ក អ្នកនាំពាក្យក្រសួងទេសចរណ៍ពីថ្ងៃម្សិលមិញ។
លោក សុភ័ក បានឱ្យដឹងថា តាំងពីឆ្នាំ ២០១៥ មករាជរដ្ឋាភិបាលតាមរយៈក្រសួងទេសចរណ៍បានចាប់ផ្ដើមរៀបចំពិធីបុណ្យទន្លេ ដើម្បីជំរុញកំណើនទេសចរតាមដងទន្លេកម្ពុជាឱ្យក្លាយទៅជាគោលដៅទេសចរណ៍ប្រកបដោយឧត្តមភាព ព្រោះពិធីបុណ្យនេះមានការផ្សព្វផ្សាយពីប្រពៃណី វប្បធម៌ ប្រវត្តិសាស្ត្រ និងតំបន់រមណីយដ្ឋានធម្មជាតិតាមដងទន្លេ រួមទាំងការតាំងពិព័រណ៍ផលិតផលក្នុងស្រុក ដើម្បីទាក់ទាញការចាប់អារម្មណ៍ពីភ្ញៀវជាតិ និងអន្តរជាតិផងដែរ។ ប៉ុន្តែបច្ចុប្បន្នជំងឺកូវីដ ១៩ នៅបង្កហានិភ័យ បើទោះមានការរកឃើញវ៉ាក់សាំងហើយក៏ដោយ។
លោកថា៖ «ដើម្បីចូលរួមបង្ការទប់សង្កាត់ ការឆ្លងរីករាលដាលនៃជំងឺឆ្លងកូវីដ១៩ យើងចាំបាច់ត្រូវលើកពេលរៀបចំពិធីបុណ្យទន្លេលើកទី ៧ នៅឆ្នាំនេះ ដោយប្ដូរទៅឆ្នាំក្រោយវិញ»។
បើតាមលោក សុភ័ក រដ្ឋបាលខេត្តកំពង់ធំគឺជាម្ចាស់ផ្ទះក្នុងការរៀបចំពិធីបុណ្យទន្លេលើកទី៧ នេះ បន្ទាប់ពីពិធីបុណ្យទន្លេលើកទី៦ ធ្វើឡើងពីថ្ងៃទី ១៤ ខែមីនា ឆ្នាំ ២០២០ នៅក្រុងបាត់ដំបង ក្រោមប្រធានបទ «ទន្លេនៃសន្តិភាព ទន្លេនៃវិបុលភាព»។
គួរបញ្ជាក់ថា ខេត្តកំពង់ធំមានតំបន់រមណីយដ្ឋានវប្បធម៌ប្រវត្តិសាស្ត្រសំខាន់ៗចំនួន ៤ រួមមាន តំបន់ប្រាសាទសំបូរព្រៃគុកស្ថិតនៅបណ្តោយស្ទឹងសែនក្នុងភូមិ- ឃុំ-ស្រុកសំបូរ ចម្ងាយ ២៨ គីឡូម៉ែត្រភាគឦសាននៃទីរួមខេត្ត,តំបន់ប្រាសាទគុកនគរ នៅភូមិត្រដក់ពង ឃុំពង្រ ស្រុកតាំងគោក មានចម្ងាយ ៨៦ គីឡូម៉ែត្រពីទីរួមខេត្ត, តំបន់ភ្នំសន្ទុក ស្ថិតនៅភូមិ-ឃុំកកោះ ស្រុកសន្ទុកមានចម្ងាយ ១៧ គីឡូម៉ែត្រពីទីរួមខេត្ត និងតំបន់រមណីយដ្ឋានបឹងសំរឹទ្ធិ ដែលមានទីតាំងស្ថិតនៅក្នុងភូមិដូង ឃុំបល្ល័ង្ក ស្រុកបារាយណ៍ ខេត្តកំពង់ធំ៕
វីដេអូ៖
