The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​វប្បធម៌​កំណត់​ការ​គ្រប់គ្រង​អាជីវកម្ម​កាត់-អ៊ុតសក់ និង​លម្អ​ក្រចក




ក្រសួង​វប្បធម៌​កំណត់​ការ​គ្រប់គ្រង​អាជីវកម្ម​កាត់-អ៊ុតសក់ និង​លម្អ​ក្រចក

Content image - Phnom Penh Post
អ្នក​ធ្វើ​ក្រចក ក្នុង​ហាង​មួយ​ ក្នុង​សង្កាត់បឹង​កេង​កង។ ហេង ជីវ័ន

ក្រសួង​វប្បធម៌​កំណត់​ការ​គ្រប់គ្រង​អាជីវកម្ម​កាត់-អ៊ុតសក់ និង​លម្អ​ក្រចក

ភ្នំពេញ៖ ​លោកស្រី​ ​ភឿង​ សកុណា ​រដ្ឋមន្រ្តី​ក្រសួង​វប្បធម៌​ និង​វិចិត្រ​សិល្បៈ​បាន​ចេញ​សេចក្ដី​ណែនាំ​ដល់​គ្រប់​អង្គភាព​ពាក់ព័ន្ធ​ក្រោម​ឱវាទ​ក្រសួង​វប្បធម៌ ​និង​គ្រប់​រដ្ឋបាល​ថ្នាក់​ក្រោម​ជាតិ ​អនុវត្ត​នីតិវិធី​ និង​ទម្រង់​បែបបទ​នៃ​ការ​គ្រប់គ្រង​អាជីវកម្ម​កាត់សក់​ ​អ៊ុត​សក់​ និង​លម្អ​ក្រចក​ ​ដើម្បី​ងាយ​ស្រួល​ក្នុង​ការ​អនុវត្ត​ការងារ​ និង​ត្រួត​ពិនិត្យ​ ​ក្នុង​ការ​ធានា​បាន​នូវ​ការ​ប្រមូល​កម្រៃ​សេវា​សាធារណៈ​។​

សេចក្ដី​ណែនាំ​នេះ​ធ្វើ​ឡើង​ក្នុង​គោល​បំណង ​ដើម្បី​ឱ្យ​ទទួល​បាន​នូវ​ប្រសិទ្ធភាព ​និង​ប្រសិទ្ធផល​ខ្ពស់​សម្រាប់​ការ​អនុវត្ត​អនុក្រឹត្យ​ស្តីពី​​ការ​បង្កើត​យន្តការ​ច្រក​ចេញ​ចូល​តែ ​១ ​សម្រាប់​ការ​ផ្តល់​សេវា​រដ្ឋបាល​នៅ​រដ្ឋបាល​ថ្នាក់​ក្រោម​ជាតិ​ និង​ស្រប​តាម​សេចក្តី​ប្រកាស​រួម​រវាង​ក្រសួង​វប្បធម៌​ និង​ក្រសួង​សេដ្ឋកិច្ច​ និង​ហិរញ្ញវត្ថុ​ ​ដោយ​​តម្រូវ​ឱ្យ​គ្រប់​សកម្មភាព​អាជីវកម្ម​ដែល​ទាក់ទង​នឹង​សេវាកម្ម​ដូច​ជា ​កាត់​សក់​ រចនា​ម៉ូដ​សក់ ​អ៊ុត​សក់​ ​លម្អ​ក្រចក​ និង​រចនា​ក្រចក​បុរស​នារី​ត្រូវ​មាន​ទីតាំង​ជាក់​លាក់​។

សេចក្ដី​ណែនាំ​នេះ​បាន​ឲ្យ​ដឹង​ថា ​បុគ្គលិក​នៃ​ការិយាល័យ​ច្រកចេញ​ចូល​តែ ​១ ​ត្រូវ​ចុះ​ពិនិត្យ​ដល់​ទីតាំង​​អាជីវកម្ម ​ដើម្បី​ផ្តល់​យោបល់​បច្ចេកទេស​ដល់​ប្រធាន​ការិយាល័យ​មុន​នឹង​ដាក់​សំណុំ​បែបបទ​ស្នើសុំ​ការ​អនុញ្ញាត​អាជីវកម្ម​ដល់​អភិបាល​ក្រុង​ ​ស្រុក​ ខណ្ឌ​ពិនិត្យ​សម្រេច។​ រដ្ឋបាល​ក្រុង​ ស្រុក​ ខណ្ឌ​​ មាន​សិទ្ធិ​ចេញ​បណ្ណ​អនុញ្ញាត​អាជីវកម្ម​នេះ​តាមរយៈ​ការិយាល័យ​ច្រក​ចេញ​ចូល​តែ ​១​ ​ហើយ​ម្ចាស់​អាជីវកម្ម​ត្រូវ​បង្ហាញ​បណ្ណ​អនុញ្ញាត​អាជីវកម្ម​ជា​សាធារណៈ ​ដើម្បី​ឱ្យ​បុគ្គលិក​នៃ​ការិយាល័យ​នេះ​ងាយ​ស្រួល​ក្នុង​ការ​អនុវត្ត​ការងារ​ និង​ត្រួត​ពិនិត្យ​។​

លោកស្រី​ សកុណា ​ថ្លែង​ថា​ ​ក្នុង​ករណី​ដែល​ម្ចាស់​អាជីវកម្ម​មិន​មក​ទទួល​សេវា​សាធារណៈ​ មន្រ្តី​ពាក់​ព័ន្ធ​ត្រូវ​ដាក់​លិខិត​អញ្ជើញ​ជា​ផ្លូវ​ការ​​ទុក​រយៈពេល​ ១៥ ​ថ្ងៃ ​ហើយ​បើ​ម្ចាស់​អាជីវកម្ម​មិន​មក​តាម​ការ​អញ្ជើញ​នេះ​ ​បុគ្គលិក​​នៃ​ការិយាល័យ​ច្រក​ចេញ​ចូល​តែ ​១ ​ត្រូវ​សហការ​ជាមួយ​អាជ្ញាធរ​មាន​សមត្ថកិច្ច​ ដើម្បី​ផ្អាក​អាជីវកម្ម​របស់​គាត់​បណ្តោះ​អាសន្ន​។​

លោក​ ​ឡុង​ ​ប៉ុណ្ណាស៊ីរីវត្ថ​ ​រដ្ឋ​លេខាធិការ​ និង​ជា​អ្នក​នាំពាក្យ​ក្រសួង​វប្បធម៌ និង​វិចិត្រ​សិល្បៈ​បាន​ប្រាប់​ ភ្នំពេញ ​ប៉ុស្តិ៍ ​ម្សិល​មិញ​ថា​ ​នីតិវិធី​នេះ​មាន​យូរ​មក​ហើយ​ ​គ្រាន់​តែ​ក្រសួង​បាន​ចេញ​ជា​ការ​ណែនាំ​ជា​ថ្មី ​ដើម្បី​ឱ្យ​ពួក​គាត់​អនុវត្ត​ទៅ​តាម​ការ​កែ​ទម្រង់​ដោយ​ក្រសួង​ផ្តល់​សិទ្ធិ​អំណាច​ទៅ​ថ្នាក់​ក្រោម​ជាតិ​ក្នុង​ការ​ផ្តល់​សេវា​នេះ ​​ទៅ​កៀក​នឹង​ប្រជា​ពលរដ្ឋ​តែ​ម្តង​។​

លោក​បាន​ថ្លែង​ថា៖ ​«​កំណែ​ទម្រង់​ថ្នាក់​ក្រោម​ជាតិ​បាន​បង្កើត​ឱ្យ​​មាន​ការិយាល័យ​ច្រកចេញ​ចូល​តែ ​១​ ​មាន​ន័យ​ថា​ក្រសួង​មហាផ្ទៃ​ទទួល​កិច្ចការ​នេះ​ក្នុង​គណៈកម្មការ​កំណែ​ទម្រង់។​ ​ដូច​នេះ​គេ​ចាប់​ផ្តើម​ធ្វើ​ការ​បែងចែក​ថា តើ​មុខងារ​អី​ខ្លះ​ដែល​បាន​ផ្តល់​សេវា​​យក​សេវា​តាម​ជំនាញ​មួយៗ​ ដូច​ជា​ពាក់ព័ន្ធ​នឹង​វប្បធម៌​​មាន​ទាក់ទង​នឹង​ផ្លាក​សញ្ញា​ ​ការ​គ្រប់គ្រង​ថែ​ទាំ​រមណីយដ្ឋាន​​ការ​សម្ដែង​សិល្បៈ ​ការ​ប្រគំ​តន្រ្តី​សាធារណៈ​ជា​ដើម​»​។​

លោក​ ​ឡុង​ ​ប៉ុណ្ណាស៊ីរីវត្ថ​ ​បាន​អះអាង​​ថា​ ​សេវាកម្ម​ធ្វើ​សក់​ កាត់​សក់ និង​លម្អ​ក្រចក​នេះ ​កន្លង​មក​អាជ្ញាធរ​មូលដ្ឋាន ​ឬ​ខាង​ពន្ធ​បាន​ទៅ​យក​សេវា ​ឬ​ជា​ភាស៊ី​ពី​ម្ចាស់​អាជីវកម្ម​ទាំង​នោះ​ដោយ​មិន​បាន​ប្រាប់​ពី​នីតិវិធី​ច្បាស់លាស់។​ ដូច​នេះ​ហើយ​បាន​ជា​ក្រសួង​រៀបចំ​ធ្វើ​នីតិវិធី​នេះ ​ដើម្បី​ឱ្យ​ម្ចាស់​អាជីវកម្ម​ដឹង​ពី​តម្លៃ​សេវា​ត្រឹមត្រូវ​ ​ហើយ​ការ​ធ្វើ​បែប​នេះ​ជា​ផ្នែក​មួយ​ក្នុង​ការ​លុប​បំបាត់​អំពើ​ពុក​រលួយ​ផង​ដែរ​។​

អ្នក​នាង​ ​រឿន​ ​ស្រីណុច​ អាយុ ​២៨ ​ជា​ម្ចាស់​ហាង​ធ្វើ​មុខ​ និង​ក្រចក​ស្រីណុច បាន​និយាយ​ថា​ ​នាង​មិន​ដែល​ដឹង​ពី​ការ​ស្នើសុំ​នេះ​ទេ ​ហើយ​ក៏​មិន​ដែល​មាន​អ្នក​ណា​មក​ប្រាប់ ​ឬ​មក​យក​លុយ​សេវា​ពី​ហាង​នាង​ដែរ​។​

នាង​បាន​ឲ្យ​ដឹង​​ថា៖​ «​ខ្ញុំ​នឹង​តាម​ដាន​បន្ថែម​នូវ​ព័ត៌មាន​នេះ​ជា​មុន​សិន នឹង​សម្រេច​ស្នើសុំ​តាម​ច្បាប់​ ​ព្រោះ​ខ្ញុំ​ជួល​ទីតាំង​​គេ ​ដើម្បី​បើក​ហាង​នេះ​ប៉ុណ្ណោះ»។​​​​

លោក​ ​វន់​ ​ពៅ ​ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ​បាន​ឲ្យ​ដឹង​ថា ​អាជ្ញាធរ​គួរ​តែ​លើកលែង​ចំពោះ​អាជីវកម្ម​ណា​ដែល​មាន​ទំហំ​តូចតាច​ពី​ព្រោះ​ហាង​តូចៗ​មិន​មាន​លទ្ធភាព​ក្នុង​ការ​ធ្វើ​បណ្ណ​អាជីវកម្ម​ទេ​។​

លោក​ថ្លែង​ថា​៖ ​«​ខ្ញុំ​យល់​ថា ​ក្នុង​ស្ថានភាព​បែប​នេះ​មិន​គួរ​ណា​តម្រូវ​ឱ្យ​ហាង​កាត់​សក់​ធ្វើ​បណ្ណ​អាជីវកម្ម​ទេ ​វា​ដូច​ជា​ហួស​ហេតុ​ពេក​ ប៉ុន្តែ​ក្រសួង​គួរ​តែ​យក​ពន្ធ​ទៅ​លើ​ហាង​កាត់​សក់​ណា​ធំៗ​ទើប​សមរម្យ​។​ ​សូម្បី​ប្រទេស​ជិត​ខាង​យើង​ក៏​រដ្ឋាភិបាល​គេ​លើកលែង​ការ​យក​ពន្ធ​ចំពោះ​អាជីវកម្ម​តូចៗ​ដែរ​។ ​ពលរដ្ឋ​យើង​កំពុង​ជួប​បញ្ហា​ជីវភាព​ដោយសារ​កូវីដ ​១៩ ​ហើយ​ មក​ឱ្យ​គាត់​ចុះ​បញ្ជី​បង់​ពន្ធ​ទៀត​»​៕

អត្ថបទគួរចាប់អារម្មណ៍

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។

  • ភ្នំពេញៈ ក្រសួង​អប់រំ យុវជន​ និង​កីឡា​កំពុង​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ព្រមទាំង​ដៃគូ​អភិវឌ្ឍន៍ និង​វិស័យ​ឯកជន ដើម្បី​រៀបចំ​តភ្ជាប់​ប្រព័ន្ធ​អ៊ីនធឺណិត​ដល់​គ្រឹះស្ថានសិក្សា​សាធារណៈ​​ក្នុង​រយៈពេល​ ៤ ​ឆ្នាំ​ (​ឆ្នាំ​ ២០២០-២០២៣) ​ដើម្បី​ផ្ដល់​ការរៀន​ និង​ការបង្រៀន​តាមបែប​ឌីជីថល​​ដែល​ការអនុវត្ត​ត្រូវធ្វើ​ឡើងជា​ជំហានៗ​ចាប់ពី​ចុងឆ្នាំ​នេះ​ទៅ​។