.jpg)
ខាងស្តាំជារូបជនរងគ្រោះនៅអតីតមន្ទីរស-២១ បានធ្វើការកែច្នៃខុសស្ថានភាពជាក់ស្តែង ឯខាងឆ្វេងជារូបភាពដើម ។ រូបថត ហ្វេសប៊ុក
ភ្នំពេញ៖ ក្រសួងវប្បធម៌ និងវិចិត្រសិល្បៈនៅថ្ងៃអាទិត្យនេះបានព្រមានចាត់វិធានការច្បាប់ជាតិ និងអន្តរជាតិចំពោះជនជាតិអៀកឡង់ម្នាក់ឈ្មោះ Matt Loughrey ដែលបានយករូបថតជនរងគ្រោះនៅអតីតមន្ទីរស-២១ ទៅកែច្នៃខុសស្ថានភាពជាក់ស្តែង។
ដោយយោងតាមគេហទំព័រសារព័ត៌មាន The Vice ចំណងជើងថា These People Were Arrested by the Khmer Rouge and Never Seen Again ចុះថ្ងៃទី ៩ ខែមេសា ឆ្នាំ ២០២១ ក្រសួងបានចេញសេចក្តីជូនដំណឹងថា នាពេលថ្មីៗនេះ មានការបង្ហោះរូបជនរងគ្រោះនៅអតីតមន្ទីរស-២១ ដោយជនជាតិអៀកឡង់ឈ្មោះ Matt Loughrey ដែលបានយករូបថតទៅកែច្នៃជាពណ៌ធម្មជាតិ និងបានច្នៃឲ្យខុសពីស្ថានភាពជាក់ស្តែងអំឡុងពេលដែលជនរងគ្រោះទទួលរងនូវការគំរាមកំហែងពីសំណាក់ពួកខ្មែរក្រហម។
ក្រសួងបានបញ្ជាក់ថា៖ «ក្រសួងមិនអាចទទួលយកទង្វើបែបអគតិនេះទេ ដ្បិតកិច្ចការដែលឈ្មោះ Matt Loughrey បានធ្វើ គឺប៉ះពាល់យ៉ាងធ្ងន់ធ្ងរចំពោះសេចក្តីថ្លៃថ្នូររបស់ជនរងគ្រោះ ភាពពិតនៃប្រវត្តិសាស្ត្រប្រទេសកម្ពុជា និងបំពានចំពោះសិទ្ធិនៃការប្រើប្រាស់រូបថតរបស់សារមន្ទីរ»។
ក្រសួងបានបន្តថា សារមន្ទីរពុំដែលមានទំនាក់ទំនងជាផ្លូវការណាមួយជាមួយបុគ្គលខាងលើនេះទេ ហើយរាល់ការប្រើប្រាស់ឯកសារចេញពីសារមន្ទីរ ត្រូវគោរពតាមច្បាប់បណ្ណសារឆ្នាំ ២០០៥ និងគោលការណ៍នៃការប្រើប្រាស់បណ្ណសារសារមន្ទីរទួលស្លែង។
ក្រៅពីនេះ ក្រសួងក៏បានអំពាវនាវឲ្យបុគ្គលឈ្មោះ Matt Loughrey និងបណ្តាញសារព័ត៌មាន Vice លុបរូបទាំងអស់នេះចេញពីបណ្តាញព័ត៌មានរបស់ខ្លួន និងសំណូមពរដល់អ្នកស្រាវជ្រាវ វិចិត្រករ និងសាធារណជន កុំប្រើប្រាស់រូបថតក្នុងន័យខុសពីការពិតនៃបរិបទប្រវត្តិសាស្ត្រ ព្រមទាំងគោរពចំពោះជនរងគ្រោះ។
ក្រសួងវប្បធម៌បានសង្កត់ធ្ងន់ថា៖ «ក្រសួងនឹងចាត់វិធានការតាមច្បាប់ជាតិ និងអន្តរជាតិដែលមានជាធរមានក្នុងករណីបុគ្គលឈ្មោះ Matt Loughrey មិនអនុវត្តទៅតាមសេចក្តីណែនាំខាងលើ»។
ក្រោយពីឃើញការបង្ហោះរូបកែច្នៃខុសទ្រង់ទ្រាយដើមនេះមក អ្នកលេងបណ្តាញសង្គម និងអ្នកស្រាវជ្រាវមួយចំនួនក៏បានធ្វើការរិះគន់ផងដែរ។
លោក ហ៊ុយ វណ្ណៈ បានបង្ហោះក្នុងហ្វេសប៊ុករបស់លោកក្នុងនាមជា អ្នកស្រាវជ្រាវលើឧក្រិដ្ឋកម្មខ្មែរក្រហមមួយរូប ដោយបានចាត់ទុកទង្វើរបស់ជនជាតិអៀកឡង់រូបនេះថាជា «ទង្វើមិនដឹងខ្យល់» ដែលខុសឆ្គងខាងសីលធម៌, ជាការធ្វើឲ្យយល់ច្រឡំចំពោះប្រវត្តិសាស្ត្រ និងឧក្រិដ្ឋកម្មខ្មែរក្រហម, និងជាការប្រមាថលេងសើចចំពោះព្រលឹងជនរងគ្រោះ។
លោកបានសរសេរកាលពីម្សិលមិញថា៖ «គុកទួលស្លែងក្នុងសម័យ ប៉ុល ពត គឺមិនមែនជា ហាងកែសម្ភស្ស ឬកន្លែងថតរូបទុកជាអនុស្សាវរីយ៍នោះទេ។ សោកនាដកម្ម ក៏មិនមែនសិល្បៈកម្សាន្តកែអផ្សុកនោះដែរ។ គេគួរតែសិក្សាឲ្យបានស៊ីជម្រៅអំពីភាពតក់ស្លុតចំពោះទារុណកម្ម និងសេចក្តីស្លាប់ចំពោះមុខ «Facing Death»៕
