ភ្នំពេញ: រដ្ឋមន្ដ្រីក្រសួងវប្បធម៌ និងវិចិត្រសិល្បៈលោកស្រី ភឿង សកុណា បានលើកឡើងថា អ្នកជំនាញក្រសួងវប្បធម៌កំពុងបន្តទាមទារយកវត្ថុបុរាណដែលកម្ពុជាបានបាត់បង់ក្នុងសង្គ្រាមពីសហរដ្ឋអាមេរិកបន្ថែមទៀត ប៉ុន្ដែមិនទាន់ដឹងច្បាស់ពីចំនួនវត្ថុបុរាណដែលបាត់ទេ ខណៈកាលពីឆ្នាំមុនអាមេរិកធ្លាប់បានប្រគល់រូបសំណាកចំនួន ៤២ មកឲ្យប្រទេសកម្ពុជាវិញ។
លោកស្រី ភឿង សកុណា បានថ្លែងប្រាប់ភ្នំពេញប៉ុស្ដិ៍ពីថ្ងៃម្សិលមិញថា ក្រុមការងារក្រសួងវប្បធម៌ និងវិចិត្រសិល្បៈបាន និងកំពុងសហការជាមួយអ្នកជំនាញការផ្នែកច្បាប់ និងសមត្ថកិច្ចរបស់សហរដ្ឋអាមេរិកដើម្បីជួយសម្របសម្រួលឲ្យកម្ពុជាទទួលបានវត្ថុបុរាណសំខាន់ៗដែលបានបាត់បង់កាលពីសម័យសង្គ្រាមនៅតំបន់ប្រាសាទកោះកេរ និងតំបន់ប្រាសាទអង្គរវត្ត ក៏ដូចជាតាមតំបន់ប្រាសាទបុរាណមួយចំនួនទៀត។
លោកស្រីបានបញ្ជាក់ថា៖ «នៅឆ្នាំ ២០១៩ យើងទទួលបានរូបសំណាកវត្ថុបុរាណចំនួន ៤២ រូបសំណាកពីសហរដ្ឋអាមេរិក ហើយយើងកំពុងតែធ្វើការបន្ដទៅទៀត ដើម្បីទាមទារយកឲ្យបានច្រើនបំផុតនូវអ្វីដែលយើងបានបាត់បង់ដែលមាននៅសហរដ្ឋអាមេរិក។ ការងារនេះយើងកំពុងធ្វើការងារយ៉ាងជិតស្និទ្ធជាមួយក្រុមការងារស្ថានទូតអាមេរិកប្រចាំកម្ពុជា ដើម្បីស្វែងរក ឬតាមរកវត្ថុបុរាណខ្មែរដែលបានបាត់បង់ទៅជាយូរឆ្នាំហើយ ប៉ុន្ដែយើងនៅមិនទាន់បានដឹងពីចំនួនច្បាស់លាស់ទេ យើងដឹងថានៅមានច្រើនទៀត»។
ជាមួយគ្នានេះលោកស្រី ភឿង សកុណា ធ្លាប់បានថ្លែងក្នុងកិច្ចពិភាក្សា «ស្ត្រីក្នុងការការពារវប្បធម៌» ដែលរៀបចំដោយស្ថានទូតអាមេរិកប្រចាំកម្ពុជានៅសារមន្ទីរជាតិកាលពីថ្ងៃទី ១៣ ខែមីនា ដែរថាតាំងពីឆ្នាំ ២០០១ មកទល់បច្ចុប្បន្ននេះ សហរដ្ឋអាមេរិកបានជួយផ្នែកវប្បធម៌ដល់កម្ពុជាអស់ទឹកប្រាក់ចំនួន ៤,៥ លានដុល្លារហើយ។
លោកស្រីបានបន្តថា ជំនួយទាំងអស់នេះបានជួយលើកិច្ចការជួសជុលប្រាសាទរួមមាន ប្រាសាទបាខែង ប្រាសាទបន្ទាយស្រី និងប្រាសាទព្រះវិហារជាដើម។ ម្យ៉ាងទៀតការបង្កើតសារមន្ទីរភ្នំដា នៅស្រុកអង្គរបុរី ខេត្តតាកែវក៏ជាជំនួយបានមកពីមូលនិធិរបស់ស្ថានទូតអាមេរិកដែរ។
លោកស្រី សកុណា បានបន្ថែមថា ក្រៅពីការងារនោះមូលនិធិរបស់ស្ថានទូតអាមេរិកបានផ្ដោតលើការថែរក្សាផ្នែកខាងសម្លៀកបំពាក់របស់ជនរងគ្រោះនៅក្នុងសារមន្ទីរទួលស្លែងក៏ដូចជា ការបង្កើតការរៀបចំចងក្រងអត្ថបទពាក់ព័ន្ធនឹងរបបប្រល័យពូជសាសន៍ ប៉ុល ពត ថែមទៀត។
លោកស្រីបានបន្តថាការចូលរួមរបស់សហរដ្ឋអាមេរិកក្នុងការជួយថែរក្សាបេតិកភណ្ឌជាតិ និងឯកសារនានាទាក់ទងនឹងប្រវត្ដិសាស្ត្រកម្ពុជាគឺជាផ្នែកមួយនៃការជួយយកចិត្ដទុកដាក់ពង្រឹងចំណងមិត្ដភាពរវាងប្រទេសទាំង ២ ឲ្យកាន់តែរឹងមាំទ្វេដង។
លោកស្រី Emily Zeeberg អ្នកនាំពាក្យស្ថានទូតអាមេរិកប្រចាំកម្ពុជាកាលពីម្សិលមិញមិនទាន់បានឆ្លើយតបតាមរយៈអ៊ីមែលភ្នំពេញប៉ុស្ដិ៍នៅឡើយទេ ជុំវិញការលើកឡើងរបស់លោកស្រី ភឿង សកុណា នេះ។
ប៉ុន្ដែលោក W.Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជាធ្លាប់បានថ្លែងក្នុងកិច្ចពិភាក្សា «ស្ត្រីក្នុងការការពារវប្បធម៌» ដែលរៀបចំដោយស្ថានទូតអាមេរិកប្រចាំកម្ពុជាកាលពីថ្ងៃទី ១៣ ខែមីនា ថាសហរដ្ឋអាមេរិក-កម្ពុជា បានចុះហត្ថលេខាលើអនុស្សរណៈនៃការយោគយល់គ្នារៀងរាល់ ៥ ឆ្នាំម្តង ចាប់តាំងពីឆ្នាំ ២០០៣ ដែលមានគោលបំណងការពារ និងទប់ស្កាត់ការលួចវត្ថុបុរាណ។
លោកបានបន្តថា សហរដ្ឋអាមេរិកបានគាំទ្រដល់កម្ពុជាក្នុងកិច្ចខិតខំប្រឹងប្រែងរបស់ខ្លួនដើម្បីការធ្វើមាតុភូមិនិវត្តន៍វត្ថុបុរាណដែលមិនអាចកាត់ថ្លៃបាន និងត្រូវបានគេលួចយកចេញពីប្រទេសខ្លួន។ ស្ថានទូតអាមេរិកបន្តគាំទ្រស្មារតីនៃអនុស្សរណៈយោគយល់ និងដើម្បីធានាថា អាមេរិក-កម្ពុជា ឈានដល់លទ្ធផលនៃផែនការសកម្មភាពល្អជាមួយគ្នា៕