ភ្នំពេញៈ ក្រសួងសាធារណការ និងដឹកជញ្ជូន និងអគ្គលេខាធិការនៃអគ្គលេខាធិការដ្ឋាន គណៈកម្មាធិការជាតិសុវត្ថិភាពចរាចរណ៍ផ្លូវគោក និងស្ថាប័នពាក់ព័ន្ធនឹងចាប់ផ្ដើមបន្តធ្វើយុទ្ធនាការអប់រំផ្សព្វផ្សាយស្តីពីសុវត្ថិភាពចរាចរណ៍ផ្លូវគោកតាមបណ្ដារាជធានី-ខេត្ដទាំង ២៥ ជាថ្មីទៀតនៅពាក់កណ្តាលខែកក្កដា បន្ទាប់ពីត្រូវបានផ្អាកដោយសារតែការងើបឡើងវិញនៃជំងឺកូវីដ១៩។
នេះបើយោងតាមលោកស្រី មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) ថ្លែងប្រាប់ភ្នំពេញប៉ុស្ដិ៍កាលពីម្សិលមិញ។
លោកស្រីឲ្យដឹងថា កាលពីថ្ងៃទី ២៣ ដល់ថ្ងៃទី ២៦ ខែមិថុនា ក្រសួងសាធារណការ និងអគ្គលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក មន្ទីរសាធារណការ និងដឹកជញ្ជូនខេត្តលេខាធិការដ្ឋានអនុគណៈកម្មការសុវត្ថិភាពចរាចរណ៍ផ្លូវគោកខេត្ត និងសហភាពសហព័ន្ធយុវជនកម្ពុជាក្នុងវិស័យសាធារណការ និងដឹកជញ្ជូនបានធ្វើយុទ្ធនាការអប់រំផ្សព្វផ្សាយស្តីពីសុវត្ថិភាពចរាចរណ៍ផ្លូវគោកនៅក្នុងខេត្តចំនួន ៤ គឺខេត្តមណ្ឌលគិរី រតនគិរី ស្ទឹងត្រែង និងខេត្តព្រះវិហារ ដើម្បីបង្កើនការយល់ដឹងដល់ប្រជាពលរដ្ឋដែលជាអ្នកប្រើប្រាស់ផ្លូវឱ្យចូលរួមគោរពច្បាប់ចរាចរណ៍ផ្លូវគោក និងកាត់បន្ថយគ្រោះថ្នាក់ចរាចរណ៍។
លោកស្រីថ្លែងថា៖ «យើងនឹងបន្តអនុវត្ដយុទ្ធនាការនេះបន្ដទៀត។ ប៉ុន្ដែដោយសារតែឥឡូវករណីអ្នកឆ្លងជំងឺកូវីដ១៩ មានការងើបឡើងវិញបន្តិច តាមរយៈការនាំចូលពីក្រៅដូច្នេះយើងរង់ចាំមើលស្ថានភាពជំងឺនេះស្ងប់បន្តិចទៀតសិនទើបយើងបន្តចុះអនុវត្ដយុទ្ធនាការនេះទៀត»។
លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក ក្រសួងសាធារណការ និងជាប្រធានផ្នែកអប់រំផ្សព្វផ្សាយនៃអគ្គលេខាធិការដ្ឋាន គ.ស.ច.គ បានបញ្ជាក់កាលពីម្សិលមិញថា តាមរយៈយុទ្ធនាការនេះ ក្រុមការងារបានរៀបចំ កម្មវិធីសំណេះសំណាលជាមួយប្រជាពលរដ្ឋព្រមទាំងមានការសួរ និងឆ្លើយសំណួរ អំពីសុវត្ថិភាពចរាចរណ៍ផ្លូវគោក ដើម្បីទទួលបានមួកសុវត្ថិភាព និងមានការពន្យល់ណែនាំដល់យុវជនឱ្យរៀនប្រើប្រាស់កម្មវិធីអប់រំស្តីពីច្បាប់ចរាចរណ៍ផ្លូវគោក (Cambodia Driving Rules) ដែលជាកម្មវិធីមួយដ៏ងាយស្រួលសម្រាប់បងប្អូនប្រជាពលរដ្ឋអាចធ្វើការរៀនសូត្រអំពីច្បាប់ស្តីពីចរាចរណ៍ផ្លូវគោក និងអាចប្រឡងសាកល្បងសមត្ថភាពរបស់ខ្លួន។
លោក ព្រំ វន្ថា ថ្លែងថា នៅពេលការឆ្លងជំងឺកូវីដ១៩នេះមានភាពធូរស្បើយ ក្រុមការងារនឹងបន្តចុះអនុវត្ដយុទ្ធនាការនេះតាមបណ្ដាខេត្ដគោលដៅផ្សេងទៀត។ ខេត្ដគោលដៅដែលនឹងបន្តអនុវត្ដនោះមានខេត្ដ កណ្ដាល តាកែវ កំពត និងខេត្ដកែប។
លោកថ្លែងថា៖ «ផែនការសកម្មភាពរបស់យើងគឺការអនុវត្ដយុទ្ធនាការក្នុងរយៈពេល ១ ឆ្នាំ ២០២០ នេះគឺយើងចុះអនុវត្ដឱ្យបានទាំង ២៥ រាជធានី-ខេត្ដ។ អ្វីដែលយើងគ្រោងចុះទៅបន្តទៀតនេះ គឺចុះទៅក្នុងសប្ដាហ៍ទី ២ នៃខែកក្កដាខាងមុខដើម្បីបន្ដអនុវត្ដយុទ្ធនាការក្នុង ៤ ខេត្ដខាងលើនេះ»។
លោក វន្ថា ថ្លែងថា តាមរយៈយុទ្ធនាការកាលពីថ្ងៃទី ២៣ ដល់ថ្ងៃទី ២៦ ខែមិថុនា ក្នុងខេត្ដទាំង ៤ ខាងលើពលរដ្ឋជិត ៥០០ នាក់ បានចូលរួមក្នុងការអប់រំផ្សព្វផ្សាយ និងទទួលបានមួកសុវត្ថិភាពពីក្រុមការងារអនុវត្ដយុទ្ធនាការនេះផងដែរ។
លោកបន្តថា៖ «យុទ្ធនាការនេះ យើងធ្វើឡើងដើម្បីពញ្ញាក់ស្មារតីដល់អ្នកប្រើប្រាស់ផ្លូវទាំងអស់ជាពិសេសអ្នកប្រើប្រាស់ទោចក្រយានយន្តឱ្យពួកគាត់យកចិត្តទុកដាក់ និងចូលរួមគោរពច្បាប់ស្តីពីចរាចរណ៍ផ្លូវគោកសំដៅឲ្យពួកគាត់ចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោកឱ្យនៅកម្រិតទាប»។
លោក គឹម បញ្ញា នាយកប្រចាំប្រទេសកម្ពុជានៃអង្គការបង្ការរបួសអាស៊ី (AIP Foundation) បានថ្លែងកាលពីម្សិលមិញថា ការអនុវត្ដយុទ្ធនាការនេះគឺជាគោលដៅដូចដែលក្រសួង ស្ថាប័នពាក់ព័ន្ធ និងអង្គការ AIP Foundation កំពុងបន្តអនុវត្ដនៅក្នុងឆ្នាំ ២០២០ នេះ។
លោកបានថ្លែងថា៖ «តាមរយៈយុទ្ធនាការនេះ យើងក៏ចង់ផ្ដល់សារជូនទៅដល់ប្រជាពលរដ្ឋ ចំពោះការបង្កើនតម្លៃនៃការផាកពិន័យ គឺមានការឡើងខ្ពស់ ដើម្បីឱ្យពលរដ្ឋមានការយល់ដឹងថែមទៀត ចំពោះរឿងនេះព្រោះពេលនេះ យើងបានអនុវត្ដតែអនុក្រឹត្យមួយចំនួននៃការផាកពិន័យនោះប៉ុណ្ណោះ ហើយទៅថ្ងៃមុខទៀត សមត្ថកិច្ចនឹងធ្វើការពិន័យពេញលេញ ដូច្នេះប្រជាពលរដ្ឋរបស់យើងគួរតែទទួលបានព័ត៌មានពីតម្លៃនៃការផាកពិន័យថ្មីទាំងនេះ»។
ទោះជាយ៉ាងណាក្តីលោក បញ្ញា បញ្ជាក់ថាចំពោះចំនួនករណីគ្រោះថ្នាក់ចរាចរណ៍នាពេលបច្ចុប្បន្នមានការថយចុះឬយ៉ាងណានោះ គឺលោកពិបាកក្នុងការប្រៀបធៀប ខណៈបញ្ហាជំងឺកូវីដ ១៩ បានធ្វើឱ្យការធ្វើចរាចររបស់ពលរដ្ឋ និងទេសចរមានការថយចុះ ប៉ុន្ដែលោកបានលើកទឹកចិត្ដឲ្យក្រសួង និងភាគីពាក់ព័ន្ធបន្ដអនុវត្ដយុទ្ធនាការបែបនេះ ឱ្យបានខ្លាំងឡើងថែមទៀត។
លោកបញ្ជាក់ឱ្យដឹងដែរថាកាលពីថ្ងៃទី ២៧ ខែមិថុនា AIP Foundation ក៏បានចាប់ផ្ដើមអនុវត្តយុទ្ធនាការអប់រំផ្សព្វផ្សាយស្តីពីសុវត្ថិភាពចរាចរណ៍ផ្លូវគោកនៅតាមផ្លូវជាតិសំខាន់ៗមួយចំនួន ដូចជាផ្លូវជាតិលេខ ៤ ផ្លូវជាតិលេខ ៦ និងផ្លូវជាតិលេខ ១ ផងដែរ។ លោកបន្ដថា AIP Foundation នឹងបន្តអនុវត្ដយុទ្ធនាការនេះនៅតាមផ្លូវជាតិតាមបណ្ដាខេត្ដសំខាន់ៗមួយចំនួនទៀត ឱ្យបានលើសពី ៧០ លើក ក្នុងឆ្នាំ ២០២០៕