.jpg)
ចរាចរណ៍កំពុងកកស្ទះនៅម្តុំស្ពានអាកាសក្បាលថ្នល់កាលពីថ្ងៃទី ១០ ខែឧសភា។ ហ៊ាន រង្សី
ភ្នំពេញៈ ក្រសួងសាធារណការ និងដឹកជញ្ជូនកាលពីថ្ងៃទី ១ ខែកក្កដា ឆ្នាំ ២០២០ បានប្រកាសពន្យារពេលការផ្ទេរកម្មសិទ្ធិយានយន្តដែលរកម្ចាស់ដើមមិនឃើញរយៈពេល ៣ ខែបន្ថែមទៀត គឺគិតចាប់ពីដើមខែនេះរហូតដល់ចុងខែកញ្ញាដោយសារនៅមានពលរដ្ឋជាច្រើនបន្តទៅស្នើសុំផ្ទេរកម្មសិទ្ធិយានយន្ត។
លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូនប្រាប់ភ្នំពេញប៉ុស្ដិ៍ពីថ្ងៃទី ១ ខែកក្កដាថា ដោយយោងតាមតម្រូវការច្រើនរបស់ប្រជាពលរដ្ឋ ក្រសួងបានសម្រេចអនុញ្ញាតពន្យារពេល ការផ្ទេរកម្មសិទ្ធិយានយន្តដែលរកម្ចាស់ដើមមិនឃើញនេះ ៣ ខែបន្ថែមទៀត។
លោកថ្លែងថា៖ «គឺយើងចាប់រាប់ពីដើមខែ កក្កដានេះរហូតដល់ចុងខែកញ្ញា ឆ្នាំ ២០២០។ ការសម្រេចនេះ យើងមានគោលការណ៍ពីថ្នាក់ដឹកនាំក្រសួងរួចរាល់អស់ហើយ ក្រៅពីការជូនដំណឹងជាសាធារណៈនៅលើហ្វេសប៊ុករបស់ក្រសួងនេះ យើងក៏នឹងផ្សព្វផ្សាយតាមរយៈលិខិតជូនដំណឹងតាមក្រោយបន្ថែមទៀត»។
លោក សុទ្ធាយុត្តិ បានឱ្យដឹងថាក្នុងរយៈពេល ៦ ខែ ឆ្នាំ ២០២០ នេះមានម្ចាស់យានយន្តដែលមានយានយន្តជាប្រភេទធុនតូច (លក្ខណៈគ្រួសារ) និងយានយន្តប្រភេទឡានដឹកទំនិញចំនួន ១១ ៦៥០ គ្រឿងបានមកផ្ទេរកម្មសិទ្ធិយានយន្ត។
កាលពីថ្ងៃទី ១២ ខែមីនា ឆ្នាំ ២០២០ ក្រសួងសាធារណការបានចេញសេចក្ដីណែនាំ ១ ស្ដីពីការផ្ទេរកម្មសិទ្ធិយានយន្តដែលរកម្ចាស់មិនឃើញ ដោយបានប្រាប់ដល់អគ្គនាយកដ្ឋាន និងមន្ទីរនៅតាមរាជធានី-ខេត្ដត្រូវអនុវត្ដត្រឹមថ្ងៃទី៣០ ខែមិថុនា ឆ្នាំ ២០២០។
រដ្ឋមន្ដ្រីក្រសួងសាធារណការលោក ស៊ុន ចាន់ថុល ក្នុងពេលលោកដឹកនាំមន្ដ្រីជំនាញចុះត្រួតពិនិត្យការដ្ឋានសាងសង់ផ្លូវជាតិលេខ ៥ កាលពីថ្ងៃទី ២៧ ខែឧសភាឆ្នាំ ២០២០ បានអំពាវនាវដល់ប្រជាពលរដ្ឋដែលមានយានយន្តហើយផុតសុពលភាពបណ្ណបើកបរ និងឆៀកត្រូវនាំគ្នាទៅបន្តសុពលភាព ដើម្បីកុំឲ្យមានការផាកពិន័យ និងចៀសវាងបញ្ហាគ្រោះថ្នាក់ចរាចរណ៍។
លោករដ្ឋមន្ដ្រីឲ្យដឹងថា ក្នុងចំណោមរថយន្តជាង ៧០ ម៉ឺនគ្រឿងមានរថយន្តជាង ៣០ ម៉ឺនគ្រឿងមិនទាន់បានមកធ្វើឆៀក ហើយមានបណ្ណបើកបររបស់ម្ចាស់យានយន្តខ្លះបានហួសកំណត់រហូតដល់ ៨ ឆ្នាំ នៅមិនទាន់បានមកបន្ត។ លោកបន្ដថា ចំពោះបណ្ណបើកបរជាង ១ លានបណ្ណក្នុងនោះមានជាង ៤៤ ម៉ឺនបណ្ណស្មើនឹង ៤៦ ភាគរយផុតសុពលភាពហើយ។
ទាក់ទងនឹងការសម្រួលដល់ការផ្ទេរកម្មសិទ្ធិយានយន្តដល់ប្រជាពលរដ្ឋនេះបច្ចុប្បន្នក្រសួងសាធារណការ និងដឹកជញ្ជូន និងក្រសួងសេដ្ឋកិច្ច និងហិរញ្ញវត្ថុកំពុងពន្លឿនការកែសម្រួលនីតិវិធីលើប្រកាសអន្តរក្រសួងស្តីពី «បែបបទ និងនីតិវិធីនៃការផ្ទេរកម្មសិទ្ធិយានយន្ត» និងការបង់ពន្ធប្រថាប់ត្រា នៅកន្លែងតែមួយតាមប្រព័ន្ធស្វ័យប្រវត្តិកម្ម បច្ចេកវិទ្យាទំនើប ដើម្បីធ្វើឲ្យមានភាពងាយស្រួល និងដើម្បីពន្លឿនដល់ការផ្ដល់សេវានេះដល់ប្រជាពលរដ្ឋឲ្យបានលឿន៕
