ភ្នំពេញៈ ក្រសួងសាធារណការ និងដឹកជញ្ជូនបានប្រកាសដាក់ឲ្យប្រើប្រាស់ជាផ្លូវការនូវប្រព័ន្ធទូរស័ព្ទ Hotline «១២៧៥» ដើម្បីផ្តល់ភាពងាយស្រួលដល់ពលរដ្ឋក្នុងការសាកសួរព័ត៌មាន និងប្រឹក្សាយោបល់ពាក់ព័ន្ធនឹងវិស័យសាធារណការ និងដឹកជញ្ជូនតាមរយៈមណ្ឌលប្រឹក្សាយោបល់លើសេវាសាធារណៈឲ្យកាន់តែមានប្រសិទ្ធភាពខ្ពស់។
យោងតាមសេចក្ដីជូនដំណឹងចុះថ្ងៃទី ២៥ ខែសីហា ឆ្នាំ ២០២០ ដែលភ្នំពេញប៉ុស្តិ៍ទទួលបានពីម្សិលមិញ ក្រសួងសាធារណការ និងដឹកជញ្ជូនបានគូសបញ្ជាក់ថា៖ «ប្រព័ន្ធទូរស័ព្ទនេះនឹងជួយសម្រួលដល់បងប្អូនប្រជាពលរដ្ឋក្នុងការហៅចូលដោយឥតគិតថ្លៃដើម្បីសាកសួរព័ត៌មានដោះស្រាយបញ្ហាសុំជំនួយបច្ចេកទេស និងប្រឹក្សាយោបល់ឲ្យកាន់តែមានប្រសិទ្ធភាព ជុំវិញសេវាសាធារណៈ និងប្រព័ន្ធស្វ័យប្រវត្តិកម្មចុះបញ្ជីយានជំនិះ ការប្រឡងយកបណ្ណបើកបរ ត្រួតពិនិត្យ លក្ខណៈបច្ចេកទេសយានជំនិះការផ្ទេរកម្មសិទ្ធិយានជំនិះ ចុះបញ្ជីអាជីវកម្ម កម្មវិធីយល់ដឹងអំពីទ្រឹស្តីនៃការបើកបរ និងកម្មវិធីថែទាំផ្លូវជាដើម»។
ទន្ទឹមនឹងនេះលោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់ប្រាប់ភ្នំពេញប៉ុស្តិ៍កាលពីម្សិលមិញថា ថ្វីដ្បិតតែប្រព័ន្ធទូរស័ព្ទ Hotline«១២៧៥» ត្រូវបានដាក់ឲ្យដំណើរការជាផ្លូវការកាលពីថ្ងៃអង្គារ ប៉ុន្តែប្រព័ន្ធនេះទើបតែទទួលបានការហៅចូលពីពលរដ្ឋនាព្រឹកថ្ងៃពុធនេះ (ម្សិលមិញ) ប៉ុណ្ណោះ ដោយមានមន្ត្រី ៣ នាក់ជាអ្នកសម្របសម្រួល និងដោះស្រាយនូវចម្ងល់របស់ពលរដ្ឋ។
លោកបានបន្តថា ចម្ងល់របស់ពលរដ្ឋដែលបានខលចូលក្នុងប្រព័ន្ធទូរស័ព្ទ Hotline នេះភាគច្រើនបានផ្ដោតលើចំណុចសំខាន់មួយចំនួនក្នុងនោះមានទាក់ទងជំនួយបច្ចេកទេស និងការប្រឹក្សាយោបល់លើសេវាសាធារណៈ និងប្រព័ន្ធស្វ័យប្រវត្តិកម្មចុះបញ្ជីយានជំនិះ ការត្រួតពិនិត្យលក្ខណៈបច្ចេកទេសយានជំនិះ ការផ្ទេរកម្មសិទ្ធិយានជំនិះ និងការប្រឡងយកបណ្ណបើកបរ រួមទាំងការស្នើសុំឲ្យមានដំណោះស្រាយជាបន្ទាន់ចំពោះភាពរាំងស្ទះនៃការផ្ដល់សេវាសាធារណៈដែលពួកគាត់បានស្នើសុំកន្លងមកនៅមិនទាន់បានឆ្លើយតប។
លោកបានបញ្ជាក់ថា៖ «តាមរយៈប្រព័ន្ធទូរស័ព្ទ Hotline ១២៧៥ នេះមន្ត្រីជំនាញរបស់យើង ៣ រូបបានសម្របសម្រួលដំណោះស្រាយភ្លាមៗចំពោះចម្ងល់របស់ប្រជាពលរដ្ឋទាំងនោះបានយ៉ាងមានប្រសិទ្ធភាព និងប្រកបដោយតម្លាភាពបំផុត ព្រោះប្រព័ន្ធនេះបានកត់ត្រានូវកិច្ចសន្ទនាទាំងអស់រវាងអ្នកខលចូល និងមន្ត្រីរបស់យើង»។
លោក សុទ្ធាយុត្តិ ក៏បានប្រាប់ឲ្យដឹងផងដែរថា ដោយមានកិច្ចសហប្រតិបត្តិការពីក្រសួងប្រៃសណីយ៍ និងទូរគមនាគមន៍ ប្រព័ន្ធទូរស័ព្ទ Hotline ១២៧៥ នេះមិនគ្រាន់តែកត់ត្រានូវកិច្ចសន្ទនាទាំងអស់រវាងអ្នកហៅចូល និងមន្ត្រីដែលចាំទទួលការហៅចូលប៉ុណ្ណោះទេ ថែមទាំងអាចកំណត់អត្តសញ្ញាណ និងទីតាំងរបស់អ្នកហៅចូលផងដែរ។
ជុំវិញករណីនេះនាយកប្រតិបត្តិអង្គការ សម្ព័ន្ធគណនេយ្យភាពសង្គមកម្ពុជា លោក សន ជ័យ បានថ្លែងថាការឆ្លើយតប ឬ ការសម្របសម្រួលភ្លាមៗចំពោះក្ដីចម្ងល់របស់ពលរដ្ឋតាមប្រព័ន្ធ Hotline គឺជាការវិវត្តថ្មីមួយនៃប្រព័ន្ធបច្ចេកវិទ្យា Digital។ ប៉ុន្តែប្រសិទ្ធភាពនៃការឆ្លើយតបចំពោះបញ្ហា និងដំណោះស្រាយបានល្អកម្រិតណានោះ គឺត្រូវរង់ចាំការពិនិត្យមើលការអនុវត្តរបស់មន្ត្រីផ្នែកផ្ដល់សេវាសាធារណៈលើវិស័យនេះជាមុនសិន។
លោកថា៖ «យ៉ាងណាក៏ដោយជាជំហានដំបូងខ្ញុំសូមលើកទឹកចិត្តដល់ពលរដ្ឋចូលរួមប្រើប្រាស់ប្រព័ន្ធនេះ ដើម្បីទទួលបានការប្រឹក្សាយោបល់ និងដំណោះស្រាយពីមន្ត្រីជំនាញជុំវិញក្ដីកង្វល់ទាក់ទងនឹងសេវាសាធារណៈលើវិស័យសាធារណការនេះ។ ខ្ញុំសង្ឃឹមថាមន្ត្រីជំនាញផ្នែកផ្ដល់សេវាសាធារណៈលើវិស័យសាធារណការនឹងខិតខំបំពេញតួនាទីរបស់ខ្លួនក្នុងការឆ្លើយតបចំពោះតម្រូវការរបស់ប្រជាពលរដ្ឋប្រកបដោយប្រសិទ្ធភាព និងតម្លាភាព»៕