.jpg)
ភ្នំពេញៈ ក្រសួងសាធាណការ និងដឹកជញ្ជូន ជូនដំណឹងទៅក្រសួង ស្ថាប័នរដ្ឋ អង្គការ និងស្ថានទូតនានានៅកម្ពុជាមកប្តូរបណ្ណ និងស្លាកលេខសម្គាល់យានជំនិះឲ្យបានមុនថ្ងៃទី ៣០ ខែតុលាខាងមុខ ព្រោះក្រសួងបានកែសម្រួល និងកំណត់លេខកូដសម្គាល់ស្លាកលេខជាថ្មីដើម្បីបង្កភាពងាយស្រួលក្នុងការគ្រប់គ្រងយានជំនិះ។
សេចក្តីជូនដំណឹងរបស់ក្រសួងសាធារណការនាថ្ងៃទី ១៨ ឧសភា បញ្ជាក់ថា កាលពីខែមិថុនា ឆ្នាំ ២០១៩ រាជរដ្ឋាភិបាលបានចេញ អនុក្រឹត្យមួយស្តីពី «ការចុះបញ្ជីផ្តល់បណ្ណសម្គាល់យានជំនិះ និងបំពាក់ស្លាកលេខយានជំនិះ»។ ខែមេសា ឆ្នាំ ២០២០ ក្រសួងសាធារណការ និងដឹកជញ្ជូនក៏បានចេញសេចក្តីប្រកាសមួយស្តីពី «ការកំណត់ប្រភេទលេខសម្គាល់យានជំនិះជាសម្បត្តិរដ្ឋរបស់ក្រសួង ស្ថាប័ន» ផងដែរ។
ក្រសួងប្រាប់ថា៖ «ការចេញអនុក្រឹត្យ និងប្រកាសនេះក្នុងគោលបំណងគ្រប់គ្រងយានជំនិះជាសម្បត្តិរដ្ឋរបស់ក្រសួង ស្ថាប័ន ដើម្បីធានាឲ្យបាននូវសន្តិសុខ សណ្តាប់ធ្នាប់ សុវត្ថិភាព និងសិទ្ធិជាកម្មសិទ្ធិលើយានជំនិះរបស់ក្រសួង ស្ថាប័ន»។ ក្រសួងបញ្ជាក់ទៀតថា៖ «ជាពិសេសដើម្បីបង្កភាពងាយស្រួលក្នុងការគ្រប់គ្រងស្លាកលេខសម្គាល់យានជំនិះ ដោយបានកែសម្រួល និងកំណត់លេខកូដសម្គាល់ស្លាកលេខរបស់ក្រសួង ស្ថាប័នមួយចំនួនជាថ្មីតាមលំដាប់លេខកូដសម្គាល់ចាប់ពីរដ្ឋ 01 ដល់រដ្ឋ 36»។
សេចក្ដីជូនដំណឹងក៏បានប្រាប់ស្ថាប័នទាំងអស់ដែលជាម្ចាស់គ្រប់គ្រងយានជំនិះដូចរៀបរាប់ខាងលើរៀបចំធ្វើបច្ចុប្បន្នភាពបញ្ជីសារពើភ័ណ្ឌយានជំនិះ ដែលកំពុងប្រើប្រាស់នៅអង្គភាពរបស់ខ្លួនរួចបញ្ជូនមកក្រសួងសាធារណការ និងដឹកជញ្ជូន។ ជាមួយគ្នានេះត្រូវបំពេញបែបបទស្នើសុំប្ដូរបណ្ណសម្គាល់យានជំនិះ និងស្លាកលេខសម្គាល់យានជំនិះថ្មីឲ្យបានស្របតាមខ្លឹមសារនៃអនុក្រឹត្យ និងប្រកាសថ្មីនេះនៅអគ្គនាយកដ្ឋានដឹកជញ្ជូនផ្លូវគោកឲ្យបានមុនថ្ងៃទី ៣០ តុលា ឆ្នាំ ២០២០។
លោក ហ៊ាង សុទ្ធាយុត្ដ អ្នកនាំពាក្យក្រសួងសាធារណការថ្លែងថា៖ «ការផ្លាស់ប្ដូរបណ្ណសម្គាល់ និងស្លាកលេខថ្មីនេះទាំងស្ថាប័នរដ្ឋ អង្គការ និងស្ថានទូតត្រូវចំណាយថវិកាបន្តិចបន្តួចទៅលើសេវាសាធារណៈរបស់រដ្ឋ។ ដូច្នេះការចំណាយសេវាសាធារណៈមិនមានការប៉ះពាល់ដល់ក្រសួង ស្ថាប័នទេ។ ក្រសួងស្ថាប័នរដ្ឋក៏មានថវិកាផ្នែករដ្ឋបាលសម្រាប់ចំណាយដែរ។ ដូច្នេះទាំងស្ថាប័នរដ្ឋ និងអង្គការជាតិ អន្តរជាតិ គឺត្រូវចំណាយសេវាសាធារណៈដូចគ្នា»។
ក្រសួងបញ្ជាក់ថា តាមអនុក្រឹត្យ និងប្រកាសខាងលើនេះបានកែសម្រួលលេខកូដសម្គាល់ស្លាកលេខរបស់ក្រសួង ស្ថាប័ន មួយចំនួនដោយត្រូវអនុវត្ដចំពោះយានជំនិះគ្រប់ប្រភេទដូចជាទោចក្រយានយន្ត រថយន្តធុនតូច និងរថយន្តធុនធ្ងន់ មានដូចជា ក្រសួង ស្ថាប័ន ដែលកំពុងប្រើប្រាស់យានជំនិះមានស្លាកលេខសម្គាល់រដ្ឋ 34 រដ្ឋ 37 រហូតដល់ រដ្ឋ 62 និងរដ្ឋ 66។ ស្លាកលេខយានជំនិះកម្មសិទ្ធិរបស់សាលារាជធានី ខេត្ដត្រូវប្ដូរមកលេខកូដសម្គាល់យានជំនិះថ្មី។
ក្រសួងបន្ថែមថាយានជំនិះជាសម្បត្ដិរដ្ឋដែលប្រើប្រាស់ដោយគណៈកម្មាធិការជាតិរៀបចំការបោះឆ្នោតមានស្លាកលេខសម្គាល់ គជប 01 2-0001 ត្រូវប្ដូរមកលេខកូដសម្គាល់យានជំនិះថ្មី គឺ គជប 2-0001។ យានជំនិះជាអង្គការមិនមែនរដ្ឋាភិបាលបរទេសមានស្លាកលេខសម្គាល់ ONG01 2-001 រហូតដល់ ONG199 2-001 ONG202 2-001 ត្រូវប្ដូរមកលេខកូដសម្គាល់យានជំនិះថ្មីគឺ ONG1 2-001 តាមប្រភេទយានជំនិះ។ យានជំនិះជាអង្គការមិនមែនរដ្ឋាភិបាលក្នុងស្រុកមានស្លាកលេខសម្គាល់ ONG200 2-001 ត្រូវប្ដូរមកលេខកូដសម្គាល់យានជំនិះថ្មីគឺ ONG2-001 តាមប្រភេទយានជំនិះ។
សម្រាប់យានជំនិះអង្គការអន្តរជាតិមានស្លាកលេខសម្គាល់ OI 001, OI 0001, OI 2-001 ត្រូវប្ដូរមកលេខកូដសម្គាល់យានជំនិះថ្មី គឺ OI 2-0001 តាមប្រភេទយានជំនិះ។ សម្រាប់យានជំនិះជាឯកអគ្គរាជទូត ឬឯកអគ្គរដ្ឋទូតមានស្លាកលេខសម្គាល់ CMD01 2-001 ត្រូវអនុវត្ដដដែលមិនតម្រូវឲ្យផ្លាស់ប្ដូរទេ។ សម្រាប់យានជំនិះជាប្រធានបេសកកម្មអង្គការសហប្រជាជាតិប្រចាំនៅកម្ពុជា មានស្លាកលេខសម្គាល់ ONU 2-001 ត្រូវប្ដូរមកលេខកូដសម្គាល់យានជំនិះថ្មីគឺ ONU 01-1 ហើយលេខកូដសម្គាល់ស្លាកលេខរបស់បុគ្គលិកត្រូវអនុវត្ដដែលមិនតម្រូវឲ្យផ្លាស់ប្ដូរទេ៕
