.jpg)
ទិដ្ឋភាពទឹកកខ្វក់ក្នុងប្រឡាយបឹងត្របែក រាជធានីភ្នំពេញពីម្សិល។ ហុង មិនា
ភ្នំពេញៈ ក្រសួងសាធារណការ និងដឹកជញ្ជូនដាក់គោលដៅពន្លឿនការរៀបចំសេចក្ដីព្រាងច្បាប់ស្តីពីទឹកកខ្វក់ និងប្រព័ន្ធលូឱ្យបានចប់សព្វគ្រប់ក្នុងពេលឆាប់ៗ ដោយរំពឹងថាសេចក្តីព្រាងច្បាប់នេះនឹងចូលរួមជួយទប់ស្កាត់ការបង្ហូរទឹកកខ្វក់ និងរៀបចំប្រព័ន្ធលូក្នុងប្រទេសឱ្យបានល្អប្រសើរ ស្របពេលសម្ទុះនៃការអភិវឌ្ឍមានការកើនឡើងខ្លាំង។
កាលពីថ្ងៃទី ៦ ខែមករា ឆ្នាំ ២០២១ លោក កឹម បូរី អនុរដ្ឋលេខាធិការ និងជាអនុប្រធានក្រុមការងារនៃក្រសួងសាធារណការ និងដឹកជញ្ជូនបានដឹកនាំកិច្ចប្រជុំពិភាក្សាបន្តលើសេចក្តីព្រាងច្បាប់ស្តីពី ទឹកកខ្វក់ និងប្រព័ន្ធលូ ដោយមានការចូលរួមពីថ្នាក់ដឹកនាំ ប្រធាននាយកដ្ឋាន អនុប្រធាននាយកដ្ឋាន និងមន្ត្រីក្រុមការងារជំនាញបច្ចេកទេសពាក់ព័ន្ធជាច្រើនរូប។
ថ្លែងក្នុងឱកាសនោះលោក កឹម បូរី បានលើកឡើងថា អង្គប្រជុំបានជជែកពិភាក្សាលើមាត្រា ៣០ (២៧ ថ្មី) នៃសេចក្តីព្រាងច្បាប់នេះដើម្បីកែសម្រួល និងកំណត់យកឃ្លាប្រយោគពាក្យពេចន៍ឱ្យបានច្បាស់លាស់ និងគ្រប់ជ្រុងជ្រោយស៊ីជម្រៅបន្ថែមទៀតចៀសវាងការបកស្រាយខុសនៅពេលអនុវត្ត។
លោកបានថ្លែងថា៖ «យើងបានអាក់ខានប្រជុំពិនិត្យលើសេចក្តីព្រាងច្បាប់នេះមួយរយៈកន្លងមកដើម្បីចូលរួមជាមួយរាជរដ្ឋាភិបាលក្នុងការទប់ស្កាត់ការរីករាលដាលនៃជំងឺកូវីដ ១៩ ហើយដើមឆ្នាំថ្មីនេះ ក្រុមការងារយើងនឹងសិក្សាលើសេចក្តីព្រាងច្បាប់នេះបន្តទៀត»។
ជាមួយនេះដែរលោកបានណែនាំឱ្យក្រុមការងារទទួលបន្ទុករៀបចំសេចក្តីព្រាងច្បាប់នេះកែប្រែនីតិវិធីនៃការប្រជុំធ្វើយ៉ាងណាឱ្យការរៀបចំសេចក្ដីព្រាងច្បាប់នេះមានសម្ទុះទៅមុខកាន់តែលឿន។ លោកបានជំរុញឱ្យមានការប្រជុំឱ្យបានញឹកញាប់ ហើយរក្សាទុកចំណុចណាដែលមិនទាន់ឯកភាពគ្នាជូនថ្នាក់ដឹកនាំ លេខាធិការដ្ឋានដើម្បីសម្រេច។
លោក ប៉ាល់ ចន្ទតារា អ្នកនាំពាក្យក្រសួងសាធារណការ និងដឹកជញ្ជូនបានប្រាប់ ភ្នំពេញ ប៉ុស្តិ៍ កាលពីម្សិលមិញថា រយៈពេល ២ អាណត្តិមកហើយ ដែលរដ្ឋាភិបាលបានសម្រេចឱ្យមានការពិភាក្សា ដើម្បីបង្កើតច្បាប់នេះឡើង។ លោកបន្តថា សម្រាប់ឆ្នាំថ្មីនេះ ក្រសួងសង្ឃឹមថា ស្ថាប័នពាក់ព័ន្ធ អ្នកច្បាប់ និងសង្គមស៊ីវិលចូលរួមបន្ថែមទៀត ដើម្បីឱ្យច្បាប់នេះចេញជារូបរាងឡើង។
លោកបានអះអាងថា ការដែលកម្ពុជាចាំបាច់ឱ្យមានច្បាប់នេះគឺដើម្បីអនុវត្តឱ្យបានត្រឹមត្រូវពីការគ្រប់គ្រងទឹកកង្វក់ ខណៈបញ្ហាទឹកកខ្វក់ និងបញ្ហាប្រព័ន្ធលូនៅកម្ពុជាកំពុងប្រឈមហានិភ័យ ជាពិសេសស្របពេលកម្ពុជាមានការអភិវឌ្ឍយ៉ាងខ្លាំងក្លានូវវិស័យសំណង់ និងហេដ្ឋារចនាសម្ព័ន្ធ។
លោករៀបរាប់ថា៖ «ដំណាក់កាលនេះយើងរៀបចំជាលក្ខណៈផ្ទៃក្នុងពីក្រុមបច្ចេកទេសនៅក្នុងក្រសួងសិន ហើយបន្តរៀបចំប្រជុំ និងទទួលធាតុចូលពីបណ្តាស្ថាប័នពាក់ព័ន្ធទៀត។ សេចក្តីព្រាងច្បាប់នេះ រៀបចំយ៉ាងណាឱ្យមានលក្ខណៈអាចទទួលយកបាន និងល្អដូចប្រទេសអភិវឌ្ឍន៍មួយចំនួនដើម្បីធ្វើការគ្រប់គ្រងប្រព័ន្ធទឹកកខ្វក់ និងប្រព័ន្ធនៅក្នុងប្រទេស ព្រោះប្រទេសគេ គេមានប្រព័ន្ធគ្រប់គ្រងទឹកកខ្វក់ តែនៅប្រទេសយើងមានតែអគ្គនាយកដ្ឋានតែមិនទាន់មានច្បាប់នេះ»។
លោក ហែម ឧត្តម អ្នកជំនាញផ្នែកបរិស្ថានបានសាទរចំពោះការបង្កើតច្បាប់ស្តីពីទឹកកខ្វក់ និងប្រព័ន្ធលូដែលលោកយល់ថា ច្បាប់នេះគួរតែត្រូវបានបង្កើតតាំងពីយូរមកហើយ ដែលបញ្ហានេះ។ លោកថា បច្ចុប្បន្នប្រព័ន្ធគ្រប់គ្រងទឹកកង្វក់ និងប្រព័ន្ធលូដែលកម្ពុជាបន្តប្រើប្រាស់គឺត្រូវបានបន្សល់ទុកតាំងពីសម័យបារាំងមកម្ល៉េះ ហើយការធ្វើឱ្យប្រសើរឡើងនូវប្រព័ន្ធទាំងនោះ គឺតិចតួចបំផុត។
លោកបារម្ភថា នៅពេលមិនមានការគ្រប់គ្រងបញ្ហាទឹកកខ្វក់ ឬប្រព័ន្ធលូនេះ គឺប៉ះពាល់ធ្ងន់ធ្ងរដល់បរិស្ថាន ព្រោះទឹកដែលក្រហូរចេញពីក្នុងតំបន់ ឬទឹកកង្វក់ដែលលាយឡំជាមួយនឹងទឹកប្រើប្រាស់ដោយមិនត្រូវបានសម្អាត និងធ្វើឱ្យប៉ះពាល់សុខភាពមនុស្ស។
លោកបានបន្តថា៖ «ដូចនៅភ្នំពេញ នៅពេលបែបនេះ យើងឃើញនៅពេលមានទឹកជំនន់ម្តងៗគឺទឹកហូរយឺត ព្រោះវាក៏ជាបញ្ហារួមផ្សំដែរ។ រដ្ឋាភិបាលគួរតែយកសេចក្តីព្រាងច្បាប់នេះ មកជជែកឡើងវិញអាចធ្វើបានឆាប់ៗ ហើយធ្វើប្រកបដោយមានការជជែក គិតគូរដិតដល់អំពីបច្ចុប្បន្នភាពនៃបញ្ហាប្រឈមផ្សេង»។
លោក ហែម ឧត្តម ក៏សង្ឃឹមថា នៅពេលច្បាប់នេះចេញជាធរមានសមត្ថកិច្ចក៏នឹងបែងចែងការគ្រប់គ្រងពីថ្នាក់ក្រោមដល់ថា្នក់លើ ជាពិសេសក្រសួងមានសមត្ថកិច្ចក្នុងការគ្រប់គ្រងបញ្ហានេះឱ្យបានដាច់ស្រេច ចៀសវាងមានការប្រទាំងប្រទើសគ្នា ដែលធ្វើឱ្យបញ្ហាទឹកកខ្វក់ និងប្រព័ន្ធលូនេះ បន្តមានភាពស្មុគស្មាញ៕
វីដេអូ៖
