ភ្នំពេញៈ លោកទេសរដ្ឋមន្ត្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូនបានថ្លែងថា ក្រសួងកំពុងពិចារណាជាមួយភាគីពាក់ព័ន្ធ និងក្រុមហ៊ុនរ៉ូយ៉ាល់គ្រុបដើម្បីបិទខ្សែរថភ្លើងពីស្ថានីយរាជាយស្ម័យយានភ្នំពេញទៅព្រលានយន្តហោះភ្នំពេញអន្តរជាតិ ដោយសារបច្ចុប្បន្នពុំសូវមានអ្នកធ្វើដំណើរជិះ ហើយក៏ដើម្បីបញ្ចៀសគ្រោះថ្នាក់ចរាចរណ៍ផងដែរ។
ការលើកឡើងរបស់លោក ស៊ុន ចាន់ថុល ដូចនេះធ្វើឡើងនៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី ១ ឆ្នាំ ២០២០ និងទិសដៅការងារឆមាសទី ២ ឆ្នាំ ២០២០ ក្រោមអធិបតីភាពលោកឧបនាយករដ្ឋមន្ត្រី ស ខេង នៅទីស្ដីការក្រសួងមហាផ្ទៃកាលពីថ្ងៃទី ៧ ខែកក្កដា។
លោករដ្ឋមន្ដ្រីថ្លែងថា៖ «យើងខ្ញុំនឹងពិចារណាឡើងវិញលើរថភ្លើងដែលធ្វើដំណើរពីស្ថានីយភ្នំពេញមកព្រលានយន្តហោះភ្នំពេញអន្តរជាតិ។ ពីដើមមានអ្នកជិះ...ប៉ុន្ដែដោយសារតែឥឡូវយន្តហោះមិនសូវមានអ្នកធ្វើដំណើពីស្ថានីយភ្នំពេញ...ព្រោះគ្មានជើងហោះហើរចេញចូលច្រើន ហើយក៏គ្មានអ្នកដំណើរ (ក្នុងកម្ពុជា) ទៅព្រលានយន្តហោះ។ ដូច្នេះយើងខ្ញុំពិនិត្យ ពិចារណាថា គួរតែបិទ។ បើអាចបិទបានក៏គួរតែបិទទៅសម្ដេច (ស ខេង) ព្រោះគ្មានអ្នកជិះហើយវាអាចបង្កគ្រោះថ្នាក់ចរាចរណ៍តាមផ្លូវរថភ្លើងនោះផង»។
លោក ស៊ុន ចាន់ថុល ថ្លែងថាលោកនឹងពិចារណាជាមួយភាគីពាក់ព័ន្ធ និងក្រុមហ៊ុនរ៉ូយ៉ាល់គ្រុប ដើម្បីបិទដំណើរការចរាចរណ៍រថភ្លើងនេះតែម្ដង។
ទាក់ទងនឹងគ្រោះថ្នាក់ចរាចរណ៍រវាងរថយន្ត និងរថភ្លើង លោករដ្ឋមន្ដ្រី ស៊ុន ចាន់ថុល បានឱ្យដឹងថា បច្ចុប្បន្នក្រសួងសាធារណការកំពុងត្រៀមធ្វើកម្មវិធីផ្សព្វផ្សាយមួយ (Spot) ដែលសង្ឃឹមថា ការងារនេះនឹងធ្វើរួចរាល់នៅត្រីមាសទី ៣ ឆ្នាំនេះ។
លោកបានបញ្ជាក់ថា៖ «ឥឡូវយើងខ្ញុំកំពុងតែត្រៀមធ្វើកម្មវិធីផ្សព្វផ្សាយមួយ ដោយសារតែការដឹកជញ្ជូនតាមរយៈរថភ្លើងនៅភាគខាងជើងមានដំណើរការច្រើន។ ពលរដ្ឋយើងគាត់មិនដែលឃើញរថភ្លើងចរាចរជាង ២០ ឆ្នាំមកហើយ។ ដូច្នេះពួកគាត់បើកបរឆ្លងកាត់ផ្លូវរថភ្លើងដោយមិនប្រាប់អាជ្ញាធរ...។ យើងសង្ឃឹមថា មុនដាច់ត្រីមាសទី ៣ ឆ្នាំ ២០២០ នេះនឹងធ្វើកម្មវិធីផ្សព្វផ្សាយនេះឱ្យហើយ និងផ្សព្វផ្សាយឱ្យបានទូលំទូលាយដល់ពលរដ្ឋ»។
យោងតាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោកដែលបានផ្សព្វផ្សាយកាលពីថ្ងៃទី ៧ កក្កដាបង្ហាញថា ករណីគ្រោះថ្នាក់ចរាចរណ៍ក្នុងឆមាសទី ១ ឆ្នាំ ២០២០ បានថយចុះ ២៥ ភាគរយ បើប្រៀបធៀបនឹងឆមាសទី ១ ឆ្នាំ ២០១៩។
បើតាមរបាយការណ៍នេះនៅក្នុងឆមាសទី ១ ឆ្នាំ ២០២០ ករណីគ្រោះថ្នាក់ចរាចរណ៍បានកើតឡើងចំនួន ១ ៦១៩ លើកហើយបើប្រៀបធៀបរយៈពេលដូចគ្នាកាលពីឆ្នាំមុនមានការថយចុះចំនួន ៥៥២ លើកស្មើនឹង ២៥ ភាគរយ។ រីឯអ្នកស្លាប់ថយចុះចំនួន ១៧២ នាក់ស្មើនឹង ១៧ ភាគរយ ខណៈអ្នករបួសថយចុះចំនួន ៧៧៨ នាក់ស្មើនឹង ២៤ ភាគរយ។
លោករដ្ឋមន្ដ្រី ស៊ុន ចាន់ថុល បានបន្ថែមថា ទិសដៅបន្តរបស់ក្រសួងសាធារណការ និងដឹកជញ្ជូនក៏ដូចជា គណៈកម្មាធិការជាតិសុវត្ថិភាពចរាចរណ៍ផ្លូវគោកគឺបន្តយុទ្ធនាការចែកមួកសុវត្ថិភាព បំពាក់ស្លាកសញ្ញាសុវត្ថិភាព បិទចំណាំងប្លាត ជួសជុល និងថែទាំផ្លូវ និងគំនិតផ្តួចផ្តើមនានា ដើម្បីកាត់បន្ថយគ្រោះថ្នាក់ចរាចរណ៍នៅទូទាំងប្រទេសកម្ពុជា៕