ភ្នំពេញ: ក្រសួងសាធារណការ និងដឹកជញ្ជូនបានអញ្ជើញ និងគ្រោងអញ្ជើញតំណាងក្រុមហ៊ុនជាង ១ ម៉ឺននាក់មកចូលរួមវគ្គបណ្តុះបណ្តាលច្បាប់ស្តីពីចរាចរណ៍ផ្លូវគោក ដើម្បីអប់រំបណ្ដុះបណ្ដាលជនបង្គោលរបស់ក្រុមហ៊ុនឲ្យពួកគេបានយល់ដឹងពីច្បាប់ចរាចរណ៍ និងយកចំណេះដឹងនេះទៅផ្សព្វផ្សាយបន្តដល់បុគ្គលិក និងនិយោជិតផ្សេងទៀត។
លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោកនៃក្រសួងសាធារណការថ្លែងក្នុងពិធីបើកវគ្គបណ្ដុះបណ្ដាលច្បាប់ស្ដីពីចរាចរណ៍ផ្លូវគោកដល់បុគ្គលិក និយោជិត ២២ ក្រុមហ៊ុនពីថ្ងៃទី ២៤ ខែកក្កដាថា ក្រសួងសាធារណការបានអញ្ជើញតំណាងក្រុមហ៊ុនដឹកជញ្ជូនប្រមាណ ៦០ នាក់មកពីក្រុមហ៊ុនចំនួន ២២ ដើម្បីមកចូលរួមវគ្គបណ្ដុះបណ្ដាលច្បាប់ស្ដីពីចរាចរណ៍ផ្លូវគោក។
លោកបញ្ជាក់ថា៖ «ក្រោយពេលបញ្ចប់វគ្គនេះ យើងគ្រោងនឹងអញ្ជើញក្រុមហ៊ុនដឹកជញ្ជូនជាង ១ ម៉ឺនក្រុមហ៊ុនដែលបានចុះបញ្ជីនៅក្រសួងពាណិជ្ជកម្ម និងក្រុមហ៊ុនដែលមិនទាន់ចុះបញ្ជីមកចូលវគ្គបណ្ដុះបណ្ដាលស្ដីពីច្បាប់ចរាចរណ៍ដែរ។ យើងធ្វើបែបនេះគឺដើម្បីឲ្យជនបង្គោលរបស់ក្រុមហ៊ុនចូលរួមវគ្គបណ្ដុះបណ្ដាលយកចំណេះជំនាញនេះទៅជួយអប់រំជួយផ្សព្វផ្សាយដល់អ្នករួមការងារក្នុងក្រុមហ៊ុនគាត់ដែរ»។
លោកបានស្នើដល់ជនបង្គោលក្រុមហ៊ុនដែលបានមកទទួលបណ្តុះបណ្តាលនេះសូមជួយធ្វើការបណ្តុះបណ្តាលដល់បុគ្គលិករបស់ខ្លួនបន្ត ព្រោះការធ្វើបែបនេះ ដើម្បីឲ្យពួកគាត់បានយល់ដឹងពីច្បាប់ចរាចរណ៍ និងយកទៅអនុវត្តនៅពេលពួកគាត់បញ្ជាយានយន្តនៅលើដងផ្លូវ។ លើសពីនេះ ដើម្បីឲ្យស្ថាប័នឯកជនបានយល់ដឹងពីច្បាប់ចរាចរណ៍ផ្លូវគោកដែលជាការចូលរួមជាមួយរាជដ្ឋាភិបាលក្នុងការទប់ស្កាត់គ្រោះថ្នាក់ចរាចរណ៍នៅកម្ពុជា។
លោកស្រី មឹន មាណវី រដ្ឋលេខាធិការក្រសួងសាធារណការ និងជាអគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោកបានថ្លែងក្នុងកម្មវិធីនោះដែរថា គ្រោះថ្នាក់ចរាចរណ៍គឺជាឃាតករលាក់មុខ ឆក់យកជីវិតប្រជាពលរដ្ឋដែលធ្វើដំណើរតាមដងផ្លូវប្រមាណពី ៥ ទៅ ៦ នាក់ក្នុង ១ ថ្ងៃដោយបន្សល់ទុកក្មេងកំព្រា ស្ត្រីមេម៉ាយបុរសពោះម៉ាយ ពិការភាព និងធ្វើឲ្យពួកគាត់ធ្លាក់ខ្លួនក្នុងភាពក្រីក្រ។
លោកស្រីបញ្ជាក់ថា៖ «ការទប់ស្កាត់គ្រោះថ្នាក់ចរាចរណ៍គឺមិនមែនចំពោះតែក្រសួងសាធារណការ និងមន្ត្រីនគរបាលទេគឺកើតចេញពីការប្រុងប្រយ័ត្ន ការគោរពច្បាប់ទាំងអស់គ្នា។ អ៊ីចឹងបានជាយើងអញ្ជើញភាគីពាក់ព័ន្ធមកជួបគ្នា រៀនសូត្រពីគ្នាហើយបើមានរឿងអ្វី គឺចូលរួមដោះស្រាយទាំងអស់គ្នាទើបយើងអាចចូលរួមកាត់បន្ថយគ្រោះថ្នាក់ចរាចរណ៍មានប្រសិទ្ធភាព»។
លោក ស៊ិន ចន្ធី ប្រធានសមាគមភ័ស្ដុភារកម្មកម្ពុជា (Cambodia Logistic Associations) បានថ្លែងឲ្យដឹងថា លោកគាំទ្រឲ្យមានវគ្គបណ្ដុះបណ្ដាលនេះ ព្រោះអ្នកបើកបរ ឬបុគ្គលិកក្រុមហ៊ុនមួយចំនួនមិនទាន់មានការយល់ដឹងច្បាស់លាស់ពីច្បាប់ចរាចរណ៍ និងមិនទាន់យល់ពីលិខិតបទដ្ឋានគតិយុត្តនានានៅឡើយ។ ម្យ៉ាងទៀតវគ្គបណ្ដុះបណ្ដាលនេះអាចផ្ដល់ឱកាសឲ្យពួកគាត់សាកសួរពីនីតិវិធីច្បាប់ដែលពួកគាត់មិនទាន់យល់បានផងដែរ។
លោកបញ្ជាក់ថា៖ «សមាគមខ្ញុំនេះមានសមាជិកចំនួនជាង ១០០ ក្រុមហ៊ុនដឹកជញ្ជូន អ៊ីចឹងបើពួកគាត់បានសិក្សារៀនសូត្របន្ថែមទៀតបែបនេះ ខ្ញុំគិតថា ល្អខ្លាំងណាស់ហើយខ្ញុំអំពាវនាវឲ្យសមាជិកខ្ញុំចូលរួមក្នុងវគ្គបណ្ដុះបណ្ដាលនេះ។ ជាធម្មតា បើយើងស្គាល់ច្បាប់ ដឹងពីនីតិវិធីហាមឃាត់ ឬដឹងពីរបៀបផ្ទុកទំនិញត្រឹមត្រូវ គឺមិនសូវខុសច្បាប់»។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំនៅកម្ពុជា (AIP) បានថ្លែងពីម្សិលមិញថា លោកក៏គាំទ្រឲ្យមានវគ្គបណ្ដុះបណ្ដាលនេះដែរ។ លើសពីនេះលោកចង់ឲ្យបង្កើតកម្មវិធីផ្សេងៗបន្ថែមទៀត ដើម្បីអប់រំ ផ្សព្វផ្សាយស្ដីពីច្បាប់ចរាចរណ៍ឲ្យកាន់តែទូលំទូលាយដើម្បីឲ្យម្ចាស់យានយន្ត ឬអ្នកបញ្ជាយានយន្តបានដឹង និងត្រៀមខ្លួនអនុវត្តច្បាប់។
លោកបញ្ជាក់ថា៖ «ក្នុងនាមអង្គការសង្គមស៊ីវិល ពួកខ្ញុំនឹងនៅតែបន្តជំរុញការផ្សព្វផ្សាយ អប់រំឲ្យកាន់តែខ្លាំងថែមទៀតចាប់ពីឆ្នាំ ២០២០ នេះតទៅ ហើយយើងគ្រោងធ្វើសន្និសីទកាសែតធំមួយនៅឆ្នាំនេះ។ អ៊ីចឹងយើងត្រូវតែចូលរួមជំរុញទាំងអស់គ្នាទាំងមន្ត្រី និងបុគ្គលិកក្រុមហ៊ុនឯកជន ហើយជាពិសេសគឺត្រូវអនុវត្តច្បាប់ឲ្យបានតឹងរ៉ឹងតម្លាភាព និងយុត្តិធម៌»។
បើតាមរបាយការណ៍របស់អគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោក គ្រោះថ្នាក់ចរាចរណ៍មានការថយចុះប្រមាណ ២៥ ភាគរយ នៅក្នុងឆមាសទី ១ នៃឆ្នាំ ២០២០ បើធៀបនឹងរយៈពេលដូចគ្នាក្នុងឆ្នាំ ២០១៩ ។ នៅក្នុងរយៈពេល ៦ ខែនេះមានគ្រោះថ្នាក់ចរាចរណ៍កើតឡើងចំនួន ១៦១៦ លើកបណ្តាលឲ្យស្លាប់ចំនួន ៨៦១ នាក់ របួសធ្ងន់ចំនួន ១៥១៨ នាក់ របួសស្រាល ៩៣៤ នាក់ និងមិនពាក់មួកពេលមានគ្រោះថ្នាក់ ៣ ៧៣៧ នាក់៕