The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​សាធារណ​ការ គ្រោង​ប្តូរ​ទៅ​ទីតាំង​ថ្មី​នៅ​ដើម​ឆ្នាំក្រោយ




ក្រសួង​សាធារណ​ការ គ្រោង​ប្តូរ​ទៅ​ទីតាំង​ថ្មី​នៅ​ដើម​ឆ្នាំក្រោយ

Content image - Phnom Penh Post
អគារ​ក្រសួង​សាធារណការ​ដែល​ទើប​សាងសង់​នៅ​ទីតាំង​ថ្មី​ក្នុង​ខណ្ឌ​ឫស្សីកែវ​។ រូបថត ក្រសួង​សាធារណការ

ក្រសួង​សាធារណ​ការ គ្រោង​ប្តូរ​ទៅ​ទីតាំង​ថ្មី​នៅ​ដើម​ឆ្នាំក្រោយ

ភ្នំពេញៈ អគារ​ទីស្នាក់ការ ក្រសួង​សាធារណការ និង​ដឹកជញ្ជូន​គ្រោង​នឹង​ប្តូរ​ទៅកាន់​ទីតាំង​ថ្មី ដែល​ស្ថិត​នៅ​តាម​បណ្តោយ​ផ្លូវ​លេខ​ ៥៩៨ ក្នុង​សង្កាត់​ច្រាំងចំរេះ​ ២ ខណ្ឌ​ប្ញស្សីកែវ (​ផ្លូវ​ ជា សុផារ៉ា​) នៅក្នុង​អំឡុង​ខែ​​មករា ឆ្នាំ​ ២០២១ ខណៈ​ដែល​អគារ​ថ្មី​នេះ សាងសង់​សម្រេច​បាន​ប្រមាណ ៩៥ %​។

លោក គង់ វិមាន នាយកខុទ្ទកាល័យ​ក្រសួង​សាធារណការ​បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា តាម​ផែនការ​របស់​ក្រសួង​នឹង​អញ្ជើញ លោកនាយក​រដ្ឋមន្ត្រី ហ៊ុន សែន ធ្វើ​ជា​អធិបតី​ក្នុង​ពិធី​សម្ពោធ​ដាក់ឱ្យ​ដំណើរ​ជា​ផ្លូវការ​នៅ​អំឡុង​ខែមករា ឆ្នាំ ២០២១ ​ខាងមុខ​។ បន្ទាប់ពី​សម្ពោធ​រួចហើយ ក្រសួង​នឹង​រើ​ពី​ទីស្នាក់ការ​ចាស់​ដែល​ស្ថិត​នៅក្បែរ​វត្តភ្នំ ក្នុង​ខណ្ឌដូនពេញ ទៅ​បម្រើ​ការងារ​នៅ​ទីតាំង​ថ្មី​នោះ ព្រោះ​ទីស្នាក់ការ​ចាស់​មាន​ភាពចង្អៀត​។

លោក​បន្តថា សម្រាប់​អគារ​ទីស្នាក់ការ​ចាស់​របស់​ក្រសួង​សាធារណការ​នឹង​ត្រូវ​ប្រគល់​ទៅឱ្យ​ក្រសួង​រ៉ែ និង​ថាមពល​ស្រប​តាម​សេចក្តី​ជូនដំណឹង​របស់​រាជរដ្ឋាភិបាល ដែល​បាន​សម្រេច​កាលពី​ពេល​កន្លងមក​។

លោក​បន្ថែម​ថា ទីស្នាក់ការ​អគារ​ថ្មី​នេះ​បាន​ទទួល​ការអបអរសាទរ​ពី​មន្ត្រីរាជការ ព្រោះ​មាន​ទីតាំង​ធំ​ទូលាយ ដែល​អាច​ផ្តល់​ឱ្យ​មន្ត្រី​មាន​កន្លែង​អង្គុយ​ធ្វើការ​សមរម្យ ខណៈ​ទីតាំង​ចាស់​មាន​លក្ខណៈ​តូចចង្អៀត​។ ទោះ​យ៉ាងណា​លោក​ គង់ វិមាន ​បាន​បដិសេធ​បង្ហាញ​ពី​ចំនួន​ទឹកប្រាក់​ដែល​ត្រូវ​ចំណាយ​សម្រាប់​ការសាងសង់​អគារ​ក្រសួង​នៅ​ទីតាំង​ថ្មី​នោះ​ដោយ​ថ្លែងថា ចំនួន​ទឹកប្រាក់​ក្នុង​ការចំណាយ​លើ​ការសាងសង់​គឺ​ស្ថិត​នៅក្នុង​ដៃ​ក្រុម​បច្ចេកទេស​។

ឆ្លើយតប​ទៅនឹង​ការរិះគន់​ពី​បណ្តាញ​សង្គម​ហ្វេសប៊ុក​ដែលថា សំណង់​អគារ​ទីស្នាក់ការ​ថ្មី​របស់​ក្រសួង​សាធារណការ​នៅ​ទីតាំង​ថ្មី​ត្រូវ​បាន​សាងសង់​ឡើង​មិនមាន​រចនាប័ទ្ម​ជា​ខ្មែរ លោក​ គង់ វិមាន បញ្ជាក់​ថា សំណង់​នេះ​ត្រូវបាន​គិតគូរ និង​ពិនិត្យពិច័យ​យ៉ាង​ច្បាស់​លាស់​ណាស់​ទាំង​ម៉ូដ​នៃ​អគារ​នេះ មិន​មាន​ចម្លង​មកពី​ក្រៅប្រទេស​ទេ គឺជា​ស្នាដៃ​របស់​កូន​ខ្មែរ ហើយ​អ្វី​ដែល​ជា​ការរិះគន់​គឺ​គ្រាន់តែ​ជា​ការបញ្ចេញមតិ​យោបល់​របស់​មនុស្ស​មួយចំនួន​តូច​ប៉ុណ្ណោះ ពីព្រោះ​ការធ្វើ​អ្វីមួយ​មិនមែន​តម្រូវ​ចិត្ត​គ្រប់​មនុស្ស​ទាំងអស់​នោះបាន​ទេ​។

លោក សន ជ័យ នាយក​ប្រតិបត្តិ​នៃ​អង្គការ​សម្ព័ន្ធ​គណនេយ្យភាព​សង្គម​កម្ពុជា (ANSA) បាន​ថ្លែង​ថា និន្នាការ​នៃ​ការផ្លាស់ប្តូរ​អគារ​ស្ថាប័ន​របស់​រាជរដ្ឋាភិបាល​បាន​កើតឡើង​ស្រប​ពេលដែល​តម្លៃ​ដីធ្លី​នៅ​កណ្តាល​ក្រុង​បាន​ហក់​ឡើង​ថ្លៃ ជាពិសេស​តម្លៃ​ដី​នៅតាម​បណ្តោយ​ផ្លូវ​ព្រះនរោត្តម និង​ព្រះមុនីវង្ស​ហើយ​ដីធ្លី​នៅ​ទីស្នាក់ការ​ចាស់​របស់​ក្រសួង​សាធារណការ​ក៏​មាន​ការឡើង​ថ្លៃ​ផងដែរ ព្រោះ​ជា​ទីតាំង​បណ្តុំ​ទៅ​ដោយ​អគារ​ពាណិជ្ជកម្ម និង​ផ្សារ​ទំនើប​។

លោក​បន្តថា ស្របពេល​តម្លៃ​ដីធ្លី​ឡើងថ្លៃ​នេះ​បាន​ធ្វើឱ្យ​កន្លែង​ផ្តល់​សេវាសាធារណៈ​សំខាន់ៗ​របស់​រដ្ឋាភិបាល​ជាច្រើន​មាន​ការផ្លាស់ប្តូរ​ទីស្នាក់​របស់​ខ្លួន ទៅកាន់​ទីតាំង​ថ្មី​ដែល​នៅ​ជាយក្រុង​ជា​បន្តបន្ទាប់​។ ប៉ុន្តែ​ទោះ​យ៉ាងណា​លោក​ សន ជ័យ មិន​ជំទាស់​ចំពោះ​ការផ្លាស់ប្តូរ​នេះ​ទេ ឱ្យ​តែ​នៅ​ទីតាំង​ថ្មី​នោះ​មាន​អគារ​ទំនើប​មាន​សួនច្បារ មាន​ទីធ្លា​ធំទូលាយ និង​មាន​បរិយាកាស​ល្អ​សម្រាប់​មន្ត្រី​បម្រើ​ការងារ និង​ផ្តល់​សេវា​សាធារណៈ​ឱ្យ​មាន​ប្រសិទ្ធភាព​។

លោក​ថ្លែងថា​៖ «​បើ​កន្លែងចាស់​វា​ចង្អៀត​ក្នុង​ការបម្រើ​សេវា​សាធារណៈ​ទៅ​អា​កន្លែង​ថ្មី គួររៀបចំ​ឱ្យ​មាន​ភាពទូលាយ​មាន​ទាំង​សួនច្បារ និង​កន្លែង​បម្រើការ​របស់​មន្ត្រី​ក៏​ធំ​ទូលាយ ឱ្យ​ស្រប​ទៅតាម​តម្លៃ​នៃ​ការដោះដូរ​ពី​កន្លែងចាស់​»​។

លោក ស៊ុន ចាន់ថុល រដ្ឋមន្ត្រី​ក្រសួង​សាធារណការ​ពីថ្ងៃ​ទី​ ១៩ ខែ​វិច្ឆិកា បាន​ដឹកនាំ​គណៈប្រតិភូ​ក្រសួង​ចុះទៅ​ពិនិត្យមើល​វឌ្ឍនភាព​នៃ​ការសាងសង់​អគារ​ទីស្តីការ​ក្រសួង​ថ្មី​ដោយ​លោក​ថ្លែង​ថា មក​ដល់​ពេល​នេះ​ការសាងសង់​សម្រេចបាន​ស្ទើរតែ​ទាំងស្រុង​ពោល​គឺ​ ៩៥% ​ហើយ នៅតែ​ការងារ​សេសសល់​មួយ​ចំនួន​ប៉ុណ្ណោះ​ដូចជា​ការសម្អាត​បរិវេណ​អគារ ការតុបតែង​ខាងក្នុង​អគារ ការដាំ​ស្មៅ​ក្នុង​សួន​ដើម្បី​បង្កើន​សោភណភាព ការដាំ​ដើមឈើ និង​ការក្រាល​កៅស៊ូ​បេតុង​ផ្លូវ​ចេញ-ចូល​ជាដើម​។

អគារ​ទីស្តីការ​ក្រសួង​សាធារណការ​ថ្មី​នេះ​ត្រូវ​បាន​បើក​ការដ្ឋាន​សាងសង់​កាលពី​ថ្ងៃទី​ ២៦ ខែ ឧសភា ឆ្នាំ​ ២០១៩ ហើយ​គ្រោង​បញ្ចប់​ការសាងសង់​ជា​ស្ថាពរ​នៅ​ដំណាច់​ឆ្នាំ​ ២០២០ ​នេះ​៕

អត្ថបទគួរចាប់អារម្មណ៍