.jpg)
រថយន្តជាច្រើនទៅត្រួតពិនិត្យលក្ខណៈបច្ចេកទេសនៅមជ្ឈមណ្ឌលត្រួតពិនិត្យបច្ចេកទេសយានយន្តម៉ូតូក្នុងខណ្ឌសែនសុខឆ្នាំ ២០២០ ។ ហេង ជីវ័ន
ភ្នំពេញៈ ក្រសួងសាធារណការ និងដឹកជញ្ចូន បើកដំណើរការឡើងវិញនូវសេវាត្រួតពិនិត្យលក្ខណៈបច្ចេកទេសយានយន្តចល័ត (ឆៀកចល័ត) ដោយចាប់ផ្ដើមពីថ្ងៃទី ១០ ឧសភា ដល់ម្ចាស់យានយន្តដែលផុតសុពលភាពដែលបានកំណត់។
សេចក្តីជូនដំណឹងរបស់ក្រសួងសាធារណការ និងដឹកជញ្ចូនបានឲ្យដឹងកាលពីថ្ងៃទី ៧ ឧសភា ថា គ្រប់ម្ចាស់យានយន្តគ្រប់ប្រភេទអាចយកយានយន្ត ទៅត្រួតពិនិត្យលក្ខណៈបច្ចេកទេសតាមការកំណត់នៅមន្ទីរសាធារណការ និងដឹកជញ្ចូនខេត្តតាមកាលបរិច្ឆេទ ឬនៅមជ្ឈមណ្ឌលត្រួតពិនិត្យលក្ខណៈបច្ចេកទេសយានយន្ត ដែលមានទីតាំងនៅជិតបំផុត។
លោក ប៉ាល ច័ន្ទតារា អ្នកនាំពាក្យក្រសួងសាធារណការ និងដឹកជញ្ចូនបានប្រាប់ភ្នំពេញប៉ុស្តិ៍នៅថ្ងៃ ទី ៩ ខែឧសភា ថា កន្លែងត្រួតពិនិត្យលក្ខណៈបច្ចេកទេសចល័តទូទាំងប្រទេស ត្រូវបានរៀបចំរួចជាស្រេច ដោយអនុវត្តតាមវិធានការសុខាភិបាល ដូច្នេះម្ចាស់យានយន្តគ្រប់ប្រភេទត្រូវទៅទទួលសេវានេះឲ្យបានគ្រប់គ្នា ដើម្បីចៀសវាងការពិន័យ ឬវិធានការរដ្ឋបាលណាមួយ ដែលនឹងត្រូវធ្វើការត្រួតពិនិត្យនាពេលខាងមុខ។
លោកបញ្ជាក់ថា៖ «យើងដល់ពេលឆៀកហើយ ដូច្នេះមិនកំណត់អាទិភាពអ្នកណា អ្នកណាទេ គឺនៅពេលយានយន្តគាត់ ដល់ពេលគឺត្រូវទៅឆៀក។ យើង បានគិតរួចហើយ បើសិនមានការសម្រុកទៅឆៀកខ្លាំង គឺយើងត្រៀមវិធានដាក់គម្លាត ដាក់អី។ បន្ថែមពីនេះ យើងក៏បានប្រើប្រាស់ប្រព័ន្ធអនឡាញ ដោយការស្នើសុំឆៀកតាមអនឡាញ ដើម្បីកំណត់ពេលវេលាដែលមិនចាំបាច់រង់ចាំយូរ»។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិ បានប្រាប់ភ្នំពេញប៉ុស្តិ៍ថា ក្នុងអំឡុងពេលនេះ ប្រសិនបើក្រសួងអាចកំណត់គោលដៅអាទិភាព គឺជារឿងប្រសើរដូចជា ឡានធំ ឡានអាជីវកម្ម ដឹកគ្រឿងសំណង់ ដឹកដី ដឹកហ្គាស ឬដឹកទំនិញផ្សេងៗ និងរថយន្តឈ្នួល ព្រោះរថយន្តទាំងនោះតែងធ្វើដំណើរញឹកញាប់ ឬខ្លះទៀតបើកបរលើផ្លូវវែងឆ្ងាយ។ ការធ្វើយ៉ាងដូច្នេះ ក៏បញ្ចៀសបាននូវការសម្រុកទៅកាន់កន្លែងឆៀកចល័តដែលងាយនឹងប្រឈមការឆ្លងរីករាលដាលជំងឺកូវីដ១៩ផងដែរ។ ទោះជាក្រសួងតែងតែបានរៀបចំឱ្យមានវិធានការទាំងនេះ ប៉ុន្តែការពង្រឹង និងអនុវត្តយ៉ាងហ្មត់ចត់លើវិធានសុវត្ថិភាពដោយមន្ត្រីសុវត្ថិភាពដែលបានចាត់តាំង គឺជាចាំបាច់។
លោក ថ្លែងថា៖ «មិនថាទីណាទេ ពិសេសកន្លែងដែលអាចមានមនុស្សច្រើន ចាំបាច់ត្រូវតែ រក្សាគម្លាត (បើបាន ២ ម៉ែត្រឡើងកាន់តែល្អ) ពាក់ម៉ាស់ឱ្យបានត្រឹមត្រូវគ្រប់ៗគ្នា ទាំងក្រុមការងារផ្តល់សេវា និងអ្នកមកទទួលសេវា វាស់កម្ដៅ បាញ់អាល់កុល ឬជែល និងលាងដៃនឹងសាប៊ូញឹកញាប់ កំណត់ច្រកចូល ច្រកចេញ ដែលមានគម្លាត។ល។ បើពុំដូច្នោះទេ កន្លែងប្រមូលផ្តុំប្រឈមនឹងការចម្លង និងឆ្លងមេរោគដ៏កាចសាហាវនេះខ្ពស់ខ្លាំងណាស់»៕
