.jpg)
មន្ត្រីនៃស្ថាប័នពាក់ព័ន្ធពិភាក្សាពីគម្រោងធ្វើផ្លូវក្រវាត់ក្រុងពីថ្ងៃទី ១៩ តុលា។រូប ក្រសួងសាធារណការ
ភ្នំពេញៈ ក្រសួងសាធារណការ និងដឹកជញ្ជូនជាមួយភាគីពាក់ព័ន្ធបាននិងកំពុងពិភាក្សាពិគ្រោះយោបល់ស្តីពីការសាងសង់ផ្លូវក្រវាត់ក្រុងទី ៤ ដោយមន្ត្រី អះអាងថា គម្រោងផ្លូវថ្មីនេះមានប្រវែង ១៩៥ គីឡូម៉ែត្រដែលឆ្លងកាត់ខេត្តចំនួន ៤។ ភាគីពាក់ព័ន្ធក៏បានសិក្សាពីការគ្រប់គ្រង ទប់ស្កាត់ការទន្ទ្រានដីចំណីផ្លូវ និងតម្រូវការហេដ្ឋារចនាសម្ព័ន្ធនៃប្រព័ន្ធចម្រោះទឹកកខ្វក់ផងដែរ។
លោក វ៉ា ស៊ឹមសុរិយា អ្នកនាំពាក្យក្រសួងសាធារណការ និងដឹកជញ្ជូនថ្លែងពីម្សិលមិញថា ក្រសួងសាធារណការ និងដឹកជញ្ជូន និងភាគីពាក់ព័ន្ធទាំងអស់ កាលពីថ្ងៃទី ១៩ ខែតុលា បានជួបប្រជុំគ្នា ដើម្បីពិគ្រោះយោបល់ស្តីពីការជ្រើសរើសទីតាំងសាងសង់ផ្លូវក្រវាត់ក្រុងទី ៤។ កិច្ចពិភាក្សានោះបានជជែកពីការគ្រប់គ្រង និងការទប់ស្កាត់ការទន្ទ្រានដីចំណីផ្លូវ និងតម្រូវការហេដ្ឋារចនាសម្ព័ន្ធនៃប្រព័ន្ធចម្រោះទឹកកខ្វក់ផងដែរ ប៉ុន្ដែលោកថា មិនទាន់ដឹងពីខ្ទង់ចំណាយនៅឡើយទេ។
បើតាមមន្ត្រីនាំពាក្យរូបនេះ គឺផ្លូវក្រវាត់ក្រុងទី ៤ នេះជាផ្លូវ ១ ដែលមានសារៈសំខាន់ក្នុងការចូលរួមចំណែកកាត់បន្ថយការកកស្ទះចរាចរណ៍។ ផ្លូវក្រវាត់ក្រុងនេះក៏ជួយសម្រួលដល់ការដឹកជញ្ជូនទំនិញរបស់បងប្អូនប្រជាពលរដ្ឋទៅកាន់ផ្លូវជាតិផ្សេងៗ និងទៅកាន់ព្រំដែនប្រទេសវៀតណាម និងប្រទេសថៃបានកាន់តែលឿន និង ចំណេញពេលវេលា ព្រមទាំងកាត់បន្ថយការចំណាយបានមួយកម្រិតថែមទៀតផង។
លោក វ៉ា ស៊ីមសូរិយា បានបញ្ជាក់ថា៖ «យើងប្រជុំនេះ គឺប្រជុំលើកទី ១ ទេ ដោយគ្រាន់តែចង់បានកិច្ចសហការពីអង្គភាពជំនាញពាក់ព័ន្ធ ដើម្បីប្រមូលធាតុផ្សំ ហើយខាងមន្ត្រីថ្នាក់ក្រោមជាតិគាត់ចង់បញ្ចេញមតិ ឬសំណូមពរបែបណា ហើយមានអ្វីខ្លះដែលប៉ះពាល់។ អ៊ីចឹងយើងទទួលយកទៅពិគ្រោះជាមួយឯកឧត្តមរដ្ឋមន្ត្រី [ក្រសួងសាធារណការ ស៊ុន ចាន់ថុល] ដើម្បីសម្រេច និងដោះស្រាយបញ្ហាដែលនៅចំពោះមុខហ្នឹង»។
លោក លីម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន បានថ្លែងនៅថ្ងៃទី ១៩ ខែតុលា ក្នុងពិធីបើកសិក្ខាសាលាពិគ្រោះយោបល់ស្ដីពីគម្រោងនេះថា គម្រោងផ្លូវខ្សែក្រវាត់ក្រុងទី ៤ នេះក្រសួងបានស្នើឱ្យក្រុមហ៊ុនសាជីវកម្មស្ពានថ្នល់ចិនសិក្សាតាំងពីឆ្នាំ ២០១៨ មកម្ល៉េះ។
ពេលនេះក្រុមហ៊ុនបានសិក្សាចប់សព្វគ្រប់ហើយនៅឆ្នាំ ២០២០។ ផ្លូវក្រវាត់ក្រុងទី ៤ នេះមានប្រវែង ១៩៥ គីឡូម៉ែត្រដោយឆ្លងកាត់ខេត្តចំនួន ៤ គឺខេត្តកំពង់ស្ពឺ តាកែវ កណ្តាល និងខេត្តព្រៃវែង។ ឆ្លងកាត់ខេត្តកំពង់ស្ពឺចំនួន ៣ ស្រុក ខេត្តតាកែវចំនួន ១ ស្រុក ខេត្តកណ្តាល ៨ ស្រុក និងខេត្តព្រៃវែងចំនួន ២ ស្រុក។
លោកលើកទឹកចិត្តឱ្យក្រសួងក៏ដូចជាមន្ទីរជំនាញពាក់ព័ន្ធ លើកសំណើទៅរដ្ឋបាលខេត្ត សិក្សាទីតាំងចាក់សំរាម ប្រព័ន្ធលូបង្ហូរទឹកកខ្វក់ ការទន្ទ្រានយកដីចំណីផ្លូវ និងសំណូមពរឱ្យប្រជាពលរដ្ឋបញ្ឈប់សកម្មភាពទន្ទ្រានយកដីចំណីផ្លូវ ការចាក់ដីលុបរំលោភលើដីចំណីផ្លូវ ដែលធ្វើឱ្យផ្លូវបាត់បង់សោភណភាព និងបណ្ដាលឱ្យផ្លូវឆាប់ខូចមុនពេលកំណត់។
លោក ម៉ឹង យូឡេង ប្រធានមន្ទីរសាធារណការ និងដឹកជញ្ជូនខេត្តកណ្ដាល ដែលបានចូលរួមក្នុងកិច្ចប្រជុំពិគ្រោះយោបល់ស្ដីពីគម្រោងនេះដែរនោះ គាំទ្រគម្រោងពេញទំហឹង។ លោកថា ព្រោះផ្លូវក្រវាត់ក្រុងទី ៤ នឹងជួយដោះស្រាយបញ្ហាចរាចរណ៍បន្ថែមទៀត ជាពិសេសដឹកជញ្ជូនទំនិញទៅព្រំដែនកម្ពុជា-វៀតណាម និងកម្ពុជា-ថៃបានឆាប់រហ័ស ហើយមានសុវត្ថិភាព។
លោកបញ្ជាក់ថា៖ «ខ្ញុំគិតថា វាជាការចាំបាច់បំផុតសម្រាប់កសាងផ្លូវខ្សែក្រវាត់ក្រុងទី ៤ នេះ ដើម្បីដោះស្រាយបានបញ្ហាកកស្ទះចរាចរណ៍ និងការសម្រួលដល់ការដឹកទំនិញនានាឆ្លងប្រទេស។ អ៊ីចឹងខាងភាគីខ្ញុំ ក៏កំពុងពិភាក្សាការងារដែលថ្នាក់ដឹកនាំក្រសួងដាក់ផែនការមកទាក់ទងបញ្ហាកាកសំណល់សំរាមនានា ដើម្បីដាក់ស្នើទៅរដ្ឋបាលខេត្តពិនិត្យ»។
នាយកវិទ្យាស្ថានសុវត្ថិភាពចរាចរណ៍លោក គង់ រតនៈ គាំទ្រឱ្យមានការអភិវឌ្ឍ ឬសាងសង់ផ្លូវបន្ថែមបែបនេះ។ ប៉ុន្ដែលោកជំរុញឱ្យសាមីក្រសួងត្រូវតែសិក្សាពីផលប៉ះពាល់គម្រោងក្នុងរយៈពេលវែង ដើម្បីចៀសវាងការពង្រីក ឬដាក់ប្រព័ន្ធលូផ្សេងៗនៅថ្ងៃអនាគតដែលបង្កផលប៉ះពាល់ដល់ប្រជាពលរដ្ឋ ហើយអាចនាំឱ្យខាតបង់ថវិកាដោះស្រាយគោលនយោបាយជូនពលរដ្ឋថែមទៀត។
លោកថ្លែងថា៖ «ក្រសួងគួរតែមានការបើកឱ្យទូលាយ គឺអាចផ្ដល់ឱកាសឱ្យអង្គការសង្គមស៊ីវិល ឬអ្នកជំនាញបានចូលរួមកិច្ចប្រជុំនេះ ដើម្បីពួកគាត់ជួយបន្ថែមធាតុចូលឱ្យបានកាន់តែច្រើនថែមទៀត។ ជាពិសេស អង្គការសង្គមស៊ីវិលខ្លះគាត់ធ្វើការផ្ទាល់ជាមួយសហគមន៍។ ដូច្នេះគាត់អាចដឹងពីតម្រូវការ ឬការដោះស្រាយគោលនយោបាយប៉ះពាល់ជូនប្រជាពលរដ្ឋ»៕
វីដេអូ៖
