.jpg)
ប្រជាជនឆ្លងកាត់ផ្លូវលិចដោយសារជំនន់ទឹកភ្លៀងនៅខណ្ឌដង្កោ រាជធានីភ្នំពេញ។ ហេង ជីវ័ន
ភ្នំពេញៈ ក្រោយពីពិនិត្យឃើញស្ថានភាពផ្លូវរងការជន់លិចដោយជំនន់ទឹកភ្លៀងកាន់តែអាក្រក់ ក្រសួងសាធារណការណែនាំដល់មន្ទីរជំនាញនៅតាមបណ្ដារាជធានី-ខេត្តដែលកំពុងរងការជន់លិចចុះត្រួតពិនិត្យ និងចេញបម្រាមហាមឃាត់ ការធ្វើចរាចរណ៍ឆ្លងកាត់ជាបណ្ដោះអាសន្នលើកំណាត់ផ្លូវទាំងឡាយណា ដែលមានការជន់លិច និងទឹកហូរកាត់ខ្លាំង ដើម្បីចៀសវាងគ្រោះថ្នាក់។
ជុំវិញការណែនាំនេះលោក ម៉ឹង យូឡេង ប្រធានមន្ទីរសាធារណការ និងដឹកជញ្ជូន ខេត្តកណ្ដាលប្រាប់ ភ្នំពេញ ប៉ុស្តិ៍ ពីម្សិលមិញថា កាលពីព្រលប់ថ្ងៃទី ១៤ តុលា លោកបានចេញសេចក្ដីជូនដំណឹង ១ ស្ដីពីការសម្រេចបិទចរាចរណ៍រថយន្តដឹកទំនិញធុនធំគ្រប់ប្រភេទលើកំណាត់ផ្លូវជាតិលេខ ២, ៣, ៤, ៥, ២០, ២០A , ២១, ២១A និងផ្លូវជាតិលេខ ២១B ក្នុងភូមិសាស្ត្រ ខេត្តកណ្តាលជាបណ្ដោះអាសន្ន។
លោកថ្លែងថា៖ «ការផ្អាកចរាចរណ៍ជាបណ្ដោះអាសន្នលើកំណាត់ផ្លូវទាំងនោះ គឺដើម្បីថែរក្សាផ្លូវ ស្ពានកុំឱ្យបាក់ស្រុត និងធានាដល់ការធ្វើចរាចរណ៍ប្រកបដោយសុវត្ថិភាព។ ព្រោះនៅក្នុងខណៈនេះកំណាត់ផ្លូវទាំងនោះកំពុងត្រូវបានទឹកជន់លិច និងហូរកាត់ក្នុងជម្រៅចាប់ពី ២,៥ ដេស៊ីម៉ែត្រឡើងទៅ»។
ជាមួយគ្នានេះនាយករដ្ឋបាលខេត្តតាកែវលោក ម៉ឹង វុទ្ធី ក៏ប្រាប់ភ្នំពេញប៉ុស្តិ៍ដែរថា លើកំណាត់ផ្លូវជាតិលេខ ២ និងផ្លូវជាតិលេខ ៣ ក្នុងភូមិសាស្ត្រខេត្តតាកែវក៏ត្រូវបានហាមឃាត់ រថយន្តធុនធ្ងន់ ធ្វើចរាចរណ៍ឆ្លងកាត់ផងដែរ។
លោកប្រាប់ថា៖ «សម្រាប់ផ្លូវជាតិលេខ ២ ចំណុចដែលត្រូវបានហាមឃាត់ការធ្វើចរាចរណ៍គឺចាប់ពីរង្វង់មូលអូរចំបក់ ដល់ ស្ពានកំពង់ដង្កោ ព្រំប្រទល់ខេត្តកណ្ដាល។ កំណាត់ផ្លូវជាតិលេខ ៣ គឺចាប់ពីអង្គតាសោមដល់ព្រំប្រទល់ខេត្តកណ្ដាល»។
នៅរាជធានីភ្នំពេញក្រោយពីបាក់ទំនប់សណ្ដស្ទឹងព្រែកត្នោតកាលពីព្រឹកថ្ងៃ ពុធនោះលំនៅឋានពលរដ្ឋជាច្រើនពាន់ខ្នង និងកំណាត់ផ្លូវជាច្រើនកន្លែងក្នុងខណ្ឌដង្កោ ភាគខាងត្បូងរាជធានីភ្នំពេញបានរងការជន់លិច និងហូរកាត់យ៉ាងធ្ងន់ធ្ងរ ដែលមិនអាចធ្វើចរាចរណ៍ឆ្លងកាត់បាន។ ក្នុងស្ថានភាពដ៏អាក្រក់នេះ លោក ឃួង ស្រេង អភិបាលរាជធានីភ្នំពេញនាព្រឹកម្សិលមិញបានសម្រេចបិទផ្លូវលេខ ២១៧ ពីចំការដូងទៅរង្វង់មូលកួរស្រូវ និងកំណាត់ផ្លូវលំមួយចំនួនទៀតនៅក្នុងខណ្ឌនេះជាបណ្តោះអាសន្ន។
លោក ស៊ឹម តុលា នាយករដ្ឋបាលខណ្ឌដង្កោ ប្រាប់ភ្នំពេញប៉ុស្តិ៍ពីម្សិលមិញថា សង្កាត់ចំនួន ១១ លើ ១២ សង្កាត់នៃខណ្ឌនេះបានរងការជន់លិចដោយជំនន់ទឹកភ្លៀង និងទឹកជំនន់ព្រែកត្នោត។ ប៉ុន្តែលោកមិនបានប្រាប់ឱ្យដឹងនូវចំនួនគ្រួសារពលរដ្ឋដែលរងផលប៉ះពាល់ដោយទឹកជំនន់នេះទេ។
លោកថ្លែងថា៖ «នៅពេលនេះយើងនៅមិនទាន់ដឹងច្បាស់អំពីចំនួនខ្នងផ្ទះ ឬគ្រួសារពលរដ្ឋដែលរងផលប៉ះពាល់នៃជំនន់នេះទេ ព្រោះយន្តការឆ្លើយតបជាបន្ទាន់នៅពេលនេះគឺយើងត្រូវគិតគូរពីអាយុជីវិតរបស់ប្រជាពលរដ្ឋដោយ ត្រូវជម្លៀសអ្នកដែលរងប៉ះពាល់ធ្ងន់ធ្ងរទៅទីទួលសុវត្ថិភាពសិន»។
ការជន់លិចដ៏អាក្រក់នេះពន្ធនាគារព្រៃស (ម២) ក្នុងសង្កាត់ព្រៃស ខណ្ឌដង្កោ ដែលមានអ្នកទោសប្រមាណ ១ ៤០០ នាក់ជាស្ត្រី និងអនីតិជនក៏ត្រូវបានទឹកជន់លិចធ្ងន់ធ្ងរដែរ ដែលតម្រូវឱ្យអគ្គានុរក្សពន្ធនាគារសម្រេចផ្ទេរអ្នកទោសទៅពន្ធនាគារព្រៃស (ម១) និង PJ ជាបណ្ដោះអាសន្ន ដើម្បីសុវត្ថិភាព។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃលោក នុត សវនា ប្រាប់ពីម្សិលមិញថា ដោយសារទឹកជន់លិចធ្ងន់ធ្ងរ អ្នកទោសស្រី និងអនីតិជនជាង ៨០០ នាក់ ក្នុងចំណោមអ្នកទោសប្រមាណ ១៤០០ នាក់នៃមណ្ឌលអប់រំ កែប្រែព្រៃស (ម២) ត្រូវបានផ្ទេរទៅមណ្ឌលកែប្រែព្រៃស (ម១) និង ជាង ៥០០ នាក់ទៀត ត្រូវបានផ្ទេរទៅកាន់មណ្ឌលឃុំឃាំង PJ នៃស្នងការដ្ឋានរាជធានីភ្នំពេញ។
លោកថា៖ «បើទោះជាពួកគេជាអ្នកទោសក៏ដោយយើងមិនអាច ទុកពួកគាត់ចោលបានឡើយ ខណៈទឹកបានជន់លិចចូលទៅក្នុងបន្ទប់ឃុំឃាំងដែលបន្ទប់ខ្លះមានជម្រៅជាង ១ តឹក និងខ្លះទៀតមានជម្រៅ ៣ តឹក។ តើឱ្យពួកគេទ្រាំរស់នៅដូចម្ដេច? ពួកគេក៏ជាមនុស្សដែរ»។
បើតាមលោក សវនា នៅក្នុងទីធ្លាមណ្ឌលឃុំឃាំងនេះទឹកបានជន់លិចរហូតដល់ជិត ១ ម៉ែត្រដែលមិនអាចបម្រើការងាររដ្ឋបាលបានឡើយ។ លោកបានបន្តថា៖ «នៅពេលនេះទឹកក៏កំពុងជ្រាបចូលនៅក្នុងផ្នែកខ្លះនៃទីធ្លាមណ្ឌលឃុំឃាំងព្រៃស (ម១) ផងដែរ ប៉ុន្តែកម្លាំងមន្ត្រីនុរក្សពន្ធនាគារយើងកំពុង ប្រើម៉ាស៊ីនបូមទឹកចេញ។ បើមិនដូច្នេះយើងមិនដឹងថា នឹងត្រូវជម្លៀសអ្នកទោសពីក្នុងពន្ធនាគារនេះបែបណានោះទេ»៕
