.jpg)
លោក ម៉ម ប៊ុនហេង ក្នុងសន្និសីទកាសែតពីម្សិលមិញ។ រូបថត ហេង ជីវ័ន
ភ្នំពេញៈ ក្រសួងសុខាភិបាល និងអង្គការសុខភាពពិភពលោក (WHO) នៅតែបន្តក្រើនរំឭកដល់ប្រជាពលរដ្ឋឲ្យបន្តបង្កើនការប្រុងប្រយ័ត្នឲ្យបានខ្ពស់ ចំពោះការរាតត្បាតនៃជំងឺកូវីដ-១៩ បើទោះបីជាក្នុងរយៈពេលប្រមាណ ២ សប្តាហ៍កន្លងមកនេះក្រសួងពុំបានរកឃើញអ្នកឆ្លងថ្មី ខណៈអ្នកដែលត្រូវបានព្យាបាលជាសះស្បើយបានកើនដល់ ១១៩ នាក់ ហើយអ្នកដែលនៅកំពុងព្យាបាលនៅសល់តែ ៣ នាក់ទៀតក្តី។
របាយការណ៍របស់ក្រសួងសុខាភិបាលបានឲ្យដឹងថា គិតត្រឹមម៉ោង ៧ ព្រឹក ថ្ងៃទី ២៧ ខែមេសាមានអ្នកព្យាបាលជាសះស្បើយពីជំងឺកូវីដ ១៩ សរុបចំនួន ១១៩ នាក់ដែលស្មើ ៩៧,៥៤ ភាគរយក្នុងចំណោមអ្នកឆ្លងសរុប ១២២ នាក់។ របាយការណ៍បន្តថា ចំពោះសំណាកចំនួន ១១ ៥៧៦ សំណាក ដែលបានយកមកពិនិត្យក៏មិនមានរកឃើញករណីថ្មីនោះដែរ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងនៅក្នុងសន្និសីទសារព័ត៌មាននាទីស្តីការក្រសួងកាលពីថ្ងៃចន្ទម្សិលមិញថាបើទោះជាលទ្ធផលវិភាគវត្ថុសំណាកពីវិទ្យាស្ថានប៉ាស្ទ័របង្ហាញនូវភាពអវិជ្ជមានមានការកើនឡើង ក៏ប៉ុន្តែការរាតត្បាតនៃជំងឺកូវីដ១៩ នៅលើសកលលោក និងបណ្តាប្រទេសក្នុងតំបន់មិនមានស្ថានភាពធូរស្រាលឡើយ។
លោកសង្កត់ធ្ងន់ថា ចំពោះករណីនេះកម្ពុជាក៏ជាប្រទេសស្ថិតក្នុងដំណាក់កាលផុយស្រួយផងដែរ ដរាបណាវ៉ាក់សាំង និងថ្នាំព្យាបាលជំងឺនេះមិនទាន់ត្រូវបានរកឃើញ។ លោកបន្តថា ការបាត់បង់នូវការប្រុងប្រយ័ត្នក្នុងការការពារខ្លួនពីការចម្លងជំងឺ កូវីដ១៩ គឺជាហានិភ័យខ្ពស់ក្នុងការបើកផ្លូវសម្រាប់ការរាតត្បាតនៃវីរុសកូរ៉ូណា នៅក្នុងប្រទេសកម្ពុជា។
លោកថា៖ «ក្នុងពេលថ្មីៗនេះបានសង្កេតឃើញថា បងប្អូនប្រជាពលរដ្ឋយើងហាក់បីដូចជាបានវិលត្រឡប់មករកការធ្វើដំណើរចល័តដោយសេរី និងវិលមករកជីវភាពប្រចាំថ្ងៃឡើងវិញជាបណ្ដើរៗ ដោយខ្វះការប្រុងប្រយ័ត្ន និងការការពារខ្លួន។ សូមអំពាវនាវដល់បងប្អូនប្រជាពលរដ្ឋសូមមេត្តាកុំយល់ច្រឡំថា ប្រទេសកម្ពុជាអស់មានការរាតត្បាតដោយវីរុសកូរ៉ូណាឱ្យសោះ ហើយត្រូវតែនាំគ្នាបន្តទប់ស្កាត់ការចម្លង វីរុសដ៏កាចសាហាវនេះជាបន្តទៀត»។
លោកស្រី Li Ailan តំណាង WHO ប្រចាំនៅកម្ពុជាក៏បានថ្លែងក្នុងសន្និសីទកាសែតនេះដែរថា បច្ចុប្បន្នជំងឺឆ្លងដ៏កាចសាហាវនេះកំពុងឆ្លងរាតត្បាតខ្លាំងក្លានៅលើប្រទេសជាច្រើនក្នុងតំបន់ និងលើពិភពលោក ដែលមានអ្នកឆ្លងជាង ២,៨ លាននាក់រួចមកហើយ។
លោកស្រីបន្តថា ក្នុងករណីដែលកម្ពុជាចាប់ផ្តើមដំណើរការនូវអាជីវកម្ម សាលារដ្ឋ និងឯកជនដូចធម្មតាវិញ គឺត្រូវគោរពតាមគោលការណ៍ឲ្យបានត្រឹមត្រូវ និងត្រូវអនុវត្តម្តង ១ ជំហានៗព្រោះកម្ពុជាមិនអាចធ្វេសប្រហែសបានឡើយ។ បន្ថែមពីនេះ លោកស្រី Li Ailan បានព្រមានថា កម្ពុជាអាចប្រឈមនឹងការចម្លងថ្មីឡើងវិញ ហើយអាចនឹងមានការឆ្លងរីករាលដាលនូវជំងឺកូវីដ ១៩ នេះទៅកាន់សហគមន៍ផងដែរក្នុងករណីដែលកម្ពុជាបើកកន្លែងអាជីវកម្មផ្សេងៗដូចជាក្លិបកម្សាន្ត សាលារៀន និងបើកកន្លែងឲ្យជួបជុំជាទ្រង់ទ្រាយធំ ហើយលែងមានការរឹតបន្តឹងការធ្វើដំណើរ។
លោកបន្តថា៖ «នៅពេលណាដែលកម្ពុជាអាចវិលត្រឡប់មកស្ថានភាពធម្មតាវិញគឺយើងត្រូវធ្វើការសម្រេចចិត្តជាដំណាក់កាលៗដោយមានលក្ខខណ្ឌច្បាស់លាស់ដែលត្រូវមាន។ ការគ្រប់គ្រងស្ថានការណ៍រីករាលដាលឲ្យបានត្រឹមត្រូវការមានប្រព័ន្ធសុខាភិបាលរឹងមាំការមានប្រព័ន្ធកាត់បន្ថយការរីករាលដាលនៅកន្លែងទីសាធារណៈ ជាពិសេសនៅតាមស្ថាប័នសាធារណៈដូចជាសាលារៀននោះគឺត្រូវមានផែនការច្បាស់លាស់ដែរ ហើយការចូលរួមរបស់ប្រជាពលរដ្ឋក៏ជាកត្តាចាំបាច់ផងដែរ»។
បន្ថែមពីនេះលោក ម៉ម ប៊ុនហេង បានថ្លែងដោយក្រើនរំឭកដល់ប្រជាពលរដ្ឋទាំងអស់សូមបន្តការប្រុងប្រយ័ត្នខ្ពស់ជាប់ជានិច្ច ហើយអាកាសធាតុក្ដៅ និងភ្លៀងដូចស្ថានភាពនៅកម្ពុជា មិនប្រាកដថាអាចទប់ស្កាត់ការចម្លងវីរុសកូរ៉ូណាបានឡើយ។
លោកបានបញ្ជាក់ថា៖ «យើងទាំងអស់គ្នាត្រូវដឹងថា ជំងឺកូវីដ១៩ នៅជាមួយយើងនៅក្នុងរយៈពេលដែលពិបាកនឹងប៉ាន់ប្រមាណបាន ហើយការចម្លងវីរុសកូរ៉ូណាគឺត្រូវផ្តើមចេញពីបុគ្គលម្នាក់ៗជាចាំបាច់។ នៅពេលនេះគឺជាពេលវេលាដែលយើងត្រូវសាមគ្គីគ្នា ដោយមិនត្រូវមាក់ងាយ ឬរើសអើងគ្នានោះឡើយ»៕
