.jpg)
គ្រែក្នុងបន្ទប់ VIP សម្រាប់ព្យាបាលជំងឺកូវីដ១៩។ រូបថត សហការី
ភ្នំពេញៈ ក្រសួងសុខាភិបាលបានបង្កើតបន្ទប់ VIP ចំនួន ២ ទីតាំងនៅមន្ទីរពេទ្យមិត្ដភាពខ្មែរ-សូវៀត និងមជ្ឈមណ្ឌលជាតិកំចាត់រោគរបេង និងហង់សិន សម្រាប់ព្យាបាលជំងឺកូវីដ ១៩ ដាច់ដោយឡែក និងជាលក្ខណៈគ្រួសារ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងក្នុងឱកាសចុះពិនិត្យទីតាំងព្យាបាលជំងឺកូវីដ ១៩ នៅមន្ទីរពេទ្យមិត្ដភាពខ្មែរ-សូវៀត នៅថ្ងៃទី ១៤ ខែតុលា ដោយបានអះអាងថា ការបង្កើតបន្ទប់បែបលក្ខណពិសេស ឬ VIP នេះ គឺដើម្បីផ្ដល់ភាពទំនើប និងងាយស្រួលសម្រាប់ការព្យាបាលជំងឺកូវីដ ១៩ ជូនដល់អ្នកដំណើរពីក្រៅប្រទេសចូលមកកម្ពុជា ជាពិសេសមន្ដ្រីការទូតជាតិ និងអន្តរជាតិ។
លោករដ្ឋមន្ត្រីថ្លែងថា៖ «យើងផ្តល់សេវាព្យាបាលដូចគ្នាទៅនឹងបន្ទប់ជំងឺទូទៅ គ្រាន់តែបន្ទប់សម្រាក វាមានលក្ខណៈទំនើបជាងធម្មតា។ យើងក៏បានប្រកាសទៅដល់មន្ត្រីទាំងអស់ដែរថា យើងបង្កើតបន្ទប់ពិសេសនៅពេទ្យរដ្ឋរបស់យើង ដើម្បីទទួលមន្ត្រីទូត និងមន្ត្រីអង្គការសហប្រជាជាតិ។ ប្រសិនបើជាគាត់មានជំងឺកូវីដនេះ និងសម្រាប់អ្នកដែលគេមានធនធាន។ និយាយយ៉ាងដូច្នេះ មិនមែនចាត់ទុកថា អ្នកអត់ធនធានដោយឡែកទេ ព្រោះការផ្តល់សេវា គឺដូចគ្នាទាំងអស់ ពេទ្យ និងឱសថដូចគ្នាទាំងអស់»។
យោងតាមក្រសួងសុខាភិបាលបានឱ្យដឹងថា បន្ទប់ VIP នេះគឺប្រមាណ ១០០ គ្រែ និងក្រុមគ្រូពេទ្យជិត ១០០ នាក់ នៅមន្ទីរពេទ្យមិត្ដភាពខ្មែរ-សូវៀត និងមជ្ឈមណ្ឌលជាតិកំចាត់រោគរបេង និងហង់សិន។
លោក ងី ម៉េង នាយកមន្ទីរពេទ្យមិត្ដភាពខ្មែរ-សូវៀត បានប្រាប់ ភ្នំពេញ ប៉ុស្តិ៍ កាលពីថ្ងៃព្រហស្បតិ៍ថា បន្ទប់ប្រមាណ ៥០ បន្ទប់បានត្រៀមរៀបចំរួចជាស្រេច ដើម្បីរង់ចាំព្យាបាលអ្នកជំងឺកូវីដ ១៩។
លោក ម៉ម ប៊ុនហេង បាននិយាយថា ដើម្បីកុំឱ្យជំងឺដ៏សាហាវមួយនេះឆ្លងចូលសហគមន៍ មន្ដ្រីសុខាភិបាលក៏ត្រូវតែបន្ដអប់រំប្រជាពលរដ្ឋឱ្យបានយល់ច្បាស់ពីវិធានការការពារពីជំងឺកូវីដ ១៩ និងពង្រឹងវិធានការចត្ដាឡីស័កទាំងនៅមណ្ឌល និងនៅតាមផ្ទះរបស់ពលរដ្ឋផងដែរ។
តាមសេចក្តីប្រកាសប្រចាំថ្ងៃរបស់ក្រសួងសុខាភិបាលបានឱ្យដឹងថា នៅថ្ងៃទី ១៤ តុលា មិនមានរកឃើញករណីវិជ្ជមានវីរុសកូវីដ ១៩ ថ្មីនោះទេ ហើយក៏មិនមានករណីជាសះស្បើយនោះដែរ ខណៈតួលេខអ្នកជាសះស្បើយពីជំងឺកូវីដ ១៩ ទូទាំងប្រទេសមានចំនួន ២៧៨ នាក់ និងអ្នកកំពុងសម្រាកព្យាបាលនៅមន្ទីរពេទ្យមានចំនួន ៥ នាក់៕
