ភ្នំពេញៈ ក្រសួងសុខាភិបាលនៃព្រះរាជាណាចក្រកម្ពុជាបានចេញសេចក្ដីប្រកាសព័ត៌មានជាផ្លូវការកាលពីថ្ងៃទី ១៨ ខែឧសភា ដោយបានបដិសេធករណីជនជាតិវៀតណាមម្នាក់ឆ្លងជំងឺកូវីដ ១៩ ហើយបានចាកចេញពីប្រទេសកម្ពុជាទៅវៀតណាម វិញ។
សេចក្ដីប្រកាសព័ត៌មាននេះបានអះអាងថា តាមការស្រាវជ្រាវយ៉ាងយកចិត្តទុកដាក់បំផុតរបស់មន្ត្រីពាក់ព័ន្ធនៅខេត្តសៀមរាបគឺមិនបានរកឃើញឈ្មោះបុរសជនជាតិវៀតណាមដែលឆ្លងជំងឺកូវីដ១៩ឡើយ ហើយក៏មិនមែនជាអ្នករស់នៅក្នុងខេត្តសៀមរាបនោះដែរ។
សេចក្ដីប្រកាសព័ត៌មានដដែលនេះបានឲ្យដឹងថា៖ «តាមរយៈប្រព័ន្ធរាយការណ៍ឱ្យគ្នាទៅវិញទៅមក (EOC) នៃជំងឺឆ្លងថ្មីៗក្នុងបណ្ដាប្រទេសអាស៊ាន ក្រុមការងាររបស់ក្រសួងសុខាភិបាលក៏មិនទទួលបាននូវព័ត៌មានផ្លូវការណាមួយស្ដីអំពីករណីដូចបានចុះផ្សាយនោះដែរ។ ដូច្នេះបុគ្គលជនជាតិវៀតណាមរូបនេះគឺបានឆ្លងនៅលើទឹកដីវៀតណាមតែម្ដង មិនមែននៅកម្ពុជាដូចការលើកឡើងនោះទេ»។
ក្រសួងសុខាភិបាលកម្ពុជាក៏បានស្នើឱ្យភាគីវៀតណាម គោរពតាមបទដ្ឋានបច្ចេកទេស និងគោលការណ៍និយតកម្មអន្តរជាតិលើករណីជំងឺឆ្លងមុននឹងធ្វើសេចក្ដីសន្និដ្ឋាន ឬចុះផ្សាយដែលជាការប៉ះពាល់ធ្ងន់ធ្ងរដល់កិច្ចខិតខំប្រឹងប្រែងរបស់កម្ពុជា ជាពិសេសនៅក្នុងដំណាក់កាលប្រយុទ្ធនឹងជំងឺកូវីដ១៩នេះ ដើម្បីជាផលប្រយោជន៍ដល់ប្រជាជនទាំង ២ ប្រទេស។
ប្រតិកម្មរបស់កម្ពុជាទៅកាន់វៀតណាមនេះបន្ទាប់ពីសារព័ត៌មានវៀតណាម VNexpress កាលពីថ្ងៃសៅរ៍បានរាយការណ៍ថា បុរសអាយុ ៣៩ ឆ្នាំដែលរស់នៅក្នុងសង្កាត់តាន់កូវ (Tan Chau) ក្នុងខេត្តតាយនីញ (Tay Ninh) ជាប់ព្រំដែនជាមួយប្រទេសកម្ពុជាគឺបានធ្វើតេស្ដវិជ្ជមានជាមួយជំងឺកូវីដ ១៩។
សារព័ត៌មាននេះអះអាងថា បុរសដែលបានឆ្លងជំងឺនេះគឺបន្ទាប់ពីបានធ្វើដំណើរតាមរថយន្តក្រុងពីខេត្តតាយនីញមកកាន់ខេត្តសៀមរាបកាលពីថ្ងៃទី ១០ ខែមករា ហើយបន្ទាប់មកបានវិលត្រឡប់ទៅប្រទេសវៀតណាមដោយខុសច្បាប់វិញនៅថ្ងៃទី ២ ខែឧសភា ក្នុងអំឡុងពេលកម្ពុជា-វៀតណាម បានបិទព្រំដែនតាំងពីខែមេសា។
ក្រោយការចុះផ្សាយនេះ លោកស្រី ឱ វណ្ណឌីន មន្ត្រីនាំពាក្យក្រសួងសុខាភិបាលក៏បានបញ្ជាក់ថា បុរសនេះគឺបានចេញផុតពីកម្ពុជាក្នុងរយៈពេល ១៤ ថ្ងៃ មុនពេលធ្វើតេស្ដរកឃើញជំងឺកូវីដ១៩ ដូច្នោះមិនអាចអះអាងថា បានឆ្លងជំងឺនេះពីកម្ពុជាឡើយ។
ក្រសួងសុខាភិបាលនៃព្រះរាជាណាចក្រកម្ពុជាប្រកាសអំពីភាពជោគជ័យ ដែលអាចព្យាបាលអ្នកជំងឺកូវីដ ១៩ ទាំង ១២២ នាក់ជាសះស្បើយ ដោយគ្មានករណីស្លាប់ និងលែងមានអ្នកឈឺជំងឺនេះតទៅទៀត។
ទោះជាយ៉ាងណា ក្រសួងនៅតែអំពាវនាវឱ្យពលរដ្ឋត្រូវបន្តប្រុងប្រយ័ត្នខ្ពស់បន្តទៀត តាមរយៈអនុវត្តវិធានការបង្ការ ដៃស្អាត ពាក់ម៉ាស់ ឬក្រមានៅពេលចាំបាច់ និងត្រូវបន្តរក្សាគម្លាតសុវត្ថិភាពសង្គម និងបុគ្គលបន្តទៀត ដើម្បីបង្ការកុំឱ្យមានរលកទី ២ នៃការឆ្លង ខណៈជំងឺនេះនៅតែបន្តរាតត្បាតក្នុងប្រទេសជិតខាង និងក្នុងពិភពលោកនៅឡើយ៕