ភ្នំពេញៈ ក្រសួងសុខាភិបាលឲ្យដឹងថា ការលក់ឱសថតាមប្រព័ន្ធអនឡាញមានការកើនឡើងខ្ពស់ក្នុងអំឡុងពេលពិភពលោកទទួលរងវិបត្តិកូវីដ១៩ ដែលទាមទារឲ្យមានការប្រុងប្រយ័ត្ន និងយកចិត្តទុកដាក់ខ្ពស់ ជាពិសេសចំពោះឱសថក្លែងក្លាយ និងអន់គុណភាព។
កាលពីថ្ងៃទី ២៩-៣០ ខែកញ្ញា កម្ពុជាបានធ្វើជាម្ចាស់ផ្ទះនៃវេទិកាអាស៊ី-អឺរ៉ុប ស្តីពីការប្រយុទ្ធប្រឆាំងឱសថក្លែងក្លាយ និងអន់គុណភាពតាមប្រព័ន្ធវីដេអូ រយៈពេល ២ ថ្ងៃ ដោយក្នុងនោះមានអ្នកចូលរួមទាំងកម្រិតថ្នាក់ជាតិ និងអន្តរជាតិប្រមាណ ៣០០ នាក់។
ក្រោយបញ្ចប់វេទិកានេះដោយជោគជ័យ ក្រសួងសុខាភិបាលកម្ពុជាបានចេញសេចក្តីប្រកាសបង្ហាញពីលទ្ធផលថា អង្គវេទិកាបានសម្រេចលើកជាអនុសាសន៍សំខាន់ៗសម្រាប់ដាក់បញ្ចូលទៅក្នុងកិច្ចប្រជុំកំពូលអាស៊ី-អឺរ៉ុប លើកទី១៣ ដែលកម្ពុជា ជាម្ចាស់ផ្ទះគ្រោងនឹងធ្វើនៅឆ្នាំ ២០២១។
សេចក្តីប្រកាសដដែលបានបន្តថា ការរាតត្បាតជំងឺកូវីដ ១៩ បានធ្វើឱ្យពិភពលោកក៏ដូចជាកម្ពុជាពិបាកទទួលបានតម្រូវការឱសថសារវន្ត ព្រោះតែខ្សែចង្វាក់ផ្គត់ផ្គង់សារធាតុឱសថសកម្មមានការលំបាកដែលធ្វើឱ្យលេចឡើងនូវឱសថក្លែងក្លាយ និងអន់គុណភាពពាសពេញពិភពលោក។
ស្ថិតក្នុងស្ថានភាពបែបនេះ ក្រសួងសង្កត់ធ្ងន់ថា៖ «បណ្តាប្រទេសនានាគួរទទួលស្គាល់ថា ឱសថក្លែងក្លាយ និងអន់គុណភាពគឺជាបញ្ហាសុខភាពសាធារណៈសកលដែលតម្រូវឱ្យមានការឆ្លើយតបរួមគ្នា។ ក្នុងអំឡុងពេលនៃការរាតត្បាតជំងឺកូវីដ ១៩ ប្រទេសនានា គួរតែទទួលស្គាល់ពីតម្រូវការបន្ទាន់ ដើម្បីការពារពលរដ្ឋពីបញ្ហាឱសថ ក្លែងក្លាយ និងអន់គុណភាព និងអំពាវនាវឱ្យមានការដាក់បញ្ចូលយុទ្ធសាស្ត្រប្រឆាំងឱសថក្លែងក្លាយ និងអន់គុណភាព តាមរយៈការឆ្លើយតបជាបន្ទាន់»។
អ្នកនាំពាក្យក្រសួងសុខាភិបាលលោកស្រី ឱ វណ្ណឌីន និយាយថា ក្នុងអំឡុងពេលពិភពលោកទទួលរងវិបត្តិកូវីដ ១៩ នេះ ការលក់ឱសថតាមប្រព័ន្ធអនឡាញមានការកើនឡើងខ្ពស់។ ជាពិសេសចំពោះឱសថក្លែងក្លាយ និងអន់គុណភាពដែលទាមទារឱ្យមានការប្រុងប្រយ័ត្ន និងយកចិត្តទុកដាក់។
លោកស្រីបានបញ្ជាក់ថា៖ «ប្រទេសទាំងឡាយគួរប្តេជ្ញាចិត្តខ្ពស់ ចំពោះការធានានូវការផ្គត់ផ្គង់ឱសថ វ៉ាក់សាំង និងឱសថសារវន្តដទៃទៀត ប្រកបដោយសុវត្ថិភាព ប្រសិទ្ធភាព គុណភាពខ្ពស់ និងតម្លៃសមរម្យ ដើម្បីធានានូវសុវត្ថិភាព និងសុខភាពប្រជាជន ព្រមទាំងសុវត្ថិភាពក្នុងតំបន់»។
បន្ថែមពីនេះលោកស្រី ឱ វណ្ណឌីន សង្កត់ធ្ងន់ថា ប្រទេសទាំងឡាយគួរតែជំរុញនូវការផ្លាស់ប្តូរបទពិសោធ បច្ចេកទេសល្អៗដែលទទួលបានពីប្រព័ន្ធតាមដានស្រាវជ្រាវ ជុំវិញការចរាចរឱសថក្លែងក្លាយ និងអន់គុណភាពនេះ ដើម្បីដោះស្រាយបញ្ហាប្រឈមចំពោះសុខភាពសាធារណៈនេះផងដែរ។
ឱសថក្លែងក្លាយសំដៅដល់ប្រភេទឱសថដែលគ្មានសារជាតិសកម្ម ឬមានសារជាតិសកម្មមិនត្រឹមត្រូវតាមរូបមន្ដដែលកំណត់លើស្លាកសញ្ញា ឬមានសារជាតិសកម្មមិនគ្រប់ចំនួនតាមកម្រិតកំណត់លើស្លាកសញ្ញា។ នេះបើតាមការពន្យល់របស់គណៈកម្មាធិការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃ។
បើយោងតាមអនុប្រធានគណៈកម្មាធិការសុខាភិបាលរបស់សភាពាណិជ្ជកម្មអឺរ៉ុប ប្រចាំកម្ពុជាលោក Jean-Gaetan Guillemaud បានបង្ហាញរបាយការណ៍របស់ប៉ូលិសអាំងទែរប៉ូលកាលពីក្នុងឆ្នាំ ២០១៦ ស្តីពីចំនួនអ្នកស្លាប់ ដោយសារប្រើប្រាស់ឱសថក្លែងក្លាយនៅលើពិភពលោកគឺមានចំនួនរហូតដល់ ១ លាននាក់។ ចំពោះស្ត្រី និងកុមារគឺជាជនងាយរងគ្រោះបំផុតក្នុងចំណោមអ្នកប្រើប្រាស់ឱសថក្លែងក្លាយ ព្រោះពួកគាត់គឺជាក្រុមគោលដៅដែលប្រើប្រាស់ថ្នាំច្រើនជាងគេ៕
វីដេអូ៖