ភ្នំពេញៈ ក្រសួងសុខាភិបាលបានព្រមានថា ការដែលពលរដ្ឋមិនអនុវត្តតាមបទបញ្ជារបស់រដ្ឋាភិបាល និងសេចក្ដីណែនាំនានារបស់ក្រសួងសុខាភិបាល អាចនឹងធ្វើឲ្យកម្ពុជាមានការឆ្លងរាលដាលនៅក្នុងសហគមន៍ ដែលអាចនឹងមានអ្នកស្លាប់ដោយសារជំងឺកូវីដ ១៩ ខណៈដែលកម្ពុជាកំពុងតែស្ថិតក្នុងស្ថានភាព «ផុយស្រួយ» នៃការរីករាលដាលជំងឺនេះ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលថ្លែងនៅក្នុងសន្និសីទកាសែតពីថ្ងៃម្សិលមិញថា ពលរដ្ឋមានផ្លូវ ២ ដែលត្រូវដើរគឺផ្លូវឆ្ពោះទៅរកការឆ្លងរាលដាលទ្រង់ទ្រាយធំដែលនាំឱ្យមានអ្នកស្លាប់ដែលធ្វើឲ្យមានសេចក្ដីសោកសៅ និងផ្លូវមួយទៀតគឺអាចជួយការពារគ្រួសារគេចផុតពីជំងឺកូវីដ ១៩ និងបន្តមានសុភមង្គល។
លោកបន្តថា៖ «យើងមានផ្លូវដើរ ២ ដែលសំខាន់គឺទី ១ ត្រូវអនុវត្តតាមបទបញ្ជា និងការណែនាំរបស់សម្ដេច ហ៊ុន សែន និងការណែនាំរបស់ក្រសួងសុខាភិបាលដើម្បីបង្ការទប់ស្កាត់ការរីករាលដាលនៃជំងឺកូវីដ ១៩។ បើយើងធ្វើបានដូច្នោះបានសេចក្ដីថា យើងរក្សាបានសុភមង្គលក្នុងគ្រួសារ និងគ្មានការឆ្លងជំងឺកូវីដ ១៩ ក៏ដូចជាជំងឺផ្ដាសាយ និងជំងឺរាករូសផ្សេងៗ»។
លោកបន្តថា៖ «ដោយឡែកផ្លូវមួយដែលយើងត្រូវទៅទៀត គឺការមិនគោរពបទបញ្ជារបស់រដ្ឋាភិបាល ឬសេចក្ដីណែនាំរបស់ក្រសួងសុខាភិបាលគឺយើងអាចឈានទៅរកហានិភ័យខ្ពស់គឺការបាត់បង់សុភមង្គលការរីករាលដាលនៃជំងឺនៅក្នុងខ្លួនយើង នៅក្នុងគ្រួសារ និងសហគមន៍យើង ហើយនៅទីបញ្ចប់មានការរីករាលដាលច្រើននឹងអាចមានហានិភ័យខ្ពស់ថែមទៀតគឺមានបងប្អូនយើងទទួលមរណភាព»។
រដ្ឋាភិបាលបានចេញបញ្ជាបិទការធ្វើដំណើរឆ្លងកាត់ពីខេត្តមួយទៅខេត្តមួយ រយៈពេល ៦ ថ្ងៃ ដែលបទបញ្ជានេះត្រូវផុតកំណត់នៅយប់ម៉ោង ១២ ថ្ងៃទី ១៦ ខែមេសា ដើម្បីហាមឃាត់ពលរដ្ឋធ្វើដំណើរទៅស្រុកកំណើតក្នុងអំឡុងបុណ្យចូលឆ្នាំដើម្បីទប់ស្កាត់ការឆ្លងជំងឺកូវីដ ១៩ តាមសហគមន៍។
លោក ម៉ម ប៊ុនហេង បញ្ជាក់ថា ប្រសិនបើពលរដ្ឋមិនបានប្រតិបត្តិតាមបទបញ្ជារបស់រដ្ឋាភិបាល និងសេចក្ដីណែនាំរបស់ក្រសួងសុខាភិបាលគឺកម្ពុជានឹងប្រឈមការឆ្លងរាលដាលនៅក្នុងសហគមន៍ទ្រង់ទ្រាយធំដែលនឹងធ្វើឱ្យជួបការខ្វះខាតខាងវេជ្ជសាស្ដ្រ ហើយនឹងឈានទៅដល់វិនាសកម្មគឺសេចក្ដីស្លាប់។
លោកបន្ថែមថា ក្រសួងបានត្រៀមចេញសេចក្ដីណែនាំរួចហើយ ប្រសិនណាបើកម្ពុជាអាចមានករណីស្លាប់ដោយសារជំងឺកូវីដ១៩នាពេលខាងមុខគឺសាកសពនឹងត្រូវឱ្យយកទៅកប់ ឬបូជាភ្លាមៗដោយមិនអនុញ្ញាតឱ្យសាច់ញាតិយកសពទៅតម្កល់ទុក សម្រាប់ធ្វើបុណ្យឡើយ។
បើតាមរបាយការណ៍របស់ក្រសួងសុខាភិបាលចេញផ្សាយនៅថ្ងៃម្សិលមិញ អ្នកដែលបានព្យាបាលជាសះស្បើយពីជំងឺកូវីដ១៩ បានកើនដល់ ៧៧ នាក់ក្នុងចំណោមអ្នកឆ្លងជំងឺកូវីដ១៩សរុបទាំងអស់ ១២២ នាក់ ខណៈ ៤៥ នាក់កំពុងសម្រាកព្យាបាលនៅក្នុងមន្ទីរពេទ្យ។
លោក ប៊ុនហេង បញ្ជាក់ថា ជនជាតិបារាំងម្នាក់ដែលឆ្លងជំងឺកូវីដ ១៩ និងមានអាយុលើស ៨០ ឆ្នាំ ដែលកំពុងសម្រាកព្យាបាលនៅមន្ទីរពេទ្យខ្មែរ-សូវៀត គឺកំពុងស្ថិតក្នុងស្ថានភាពធ្ងន់ធ្ងរ។ លោកបន្តថាកម្ពុជាបានយកសំណាកធ្វើតេស្ដរកកូវីដ១៩មានចំនួន ៨ ៩០៩ សំណាក ដែលប្រហែលជា ៩០ ភាគរយគឺជាជនជាតិខ្មែរ។
លោកបន្ថែមទៀតថា បន្ទាប់ពីមានការរកឃើញករណីឆ្លងជំងឺកូវីដ ១៩ ជាបន្តបន្ទាប់ក្នុងរយៈពេលប៉ុន្មានថ្ងៃជាប់គ្នានេះនៅក្នុងទីក្រុងភ្នំពេញគឺនឹងអាចធ្វើឱ្យទីក្រុងភ្នំពេញឈានចូលទៅដល់ការឆ្លងជំងឺកូវីដ ១៩ ក្នុងសហគមន៍ទ្រង់ទ្រាយតូច។
លោកបន្តថា ការឈានដល់លក្ខណៈឆ្លងក្នុងសហគមន៍ទ្រង់ទ្រាយតូចនេះ គឺប្រសិនណានាយកដ្ឋានប្រយុទ្ធនឹងជំងឺឆ្លង មន្ទីរសុខាភិបាលរាជធានីភ្នំពេញ អង្គការសុខភាពពិភពលោក និងមជ្ឈមណ្ឌលប្រយុទ្ធជំងឺឆ្លងសហរដ្ឋអាមេរិកមិនអាចរកឃើញប្រភពនៃការចម្លងទាំងនោះបានច្បាស់លាស់។
ជាមួយគ្នានេះលោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានលើកឡើងថា កម្ពុជាកំពុងស្ថិតក្នុងស្ថានភាពផុយស្រួយដែលធ្លាក់ទៅក្នុងការឆ្លងនៅក្នុងសហគមន៍ ដោយសារបច្ចុប្បន្នករណីនាំចូលជំងឺពីក្រៅប្រទេស គឺបានចម្លងមកដល់អ្នកនៅក្នុងស្រុក ហើយឥឡូវនេះអ្នកនៅក្នុងស្រុកគឺបានចម្លងបន្តទៅកាន់អ្នកក្នុងស្រុកបន្តទៀត។
លោកស្រីថា៖ «អ៊ីចឹងកន្លែងនេះគឺផុយស្រួយណាស់ ហើយប្រសិនបើការចម្លងនេះចេះតែរាតត្បាតបន្តទៅ ហើយយើងមិនមានលទ្ធភាពស្រាវជ្រាវរកប្រភពឱ្យបានច្បាស់លាស់នោះគឺជាការចម្លងនៅសហគមន៍ហើយ។ អ៊ីចឹង! កន្លែងនេះក្រុមការងារក្រសួងសុខាភិបាលកំពុងដុតដៃដុតជើងក្នុងការសិក្សា និងស្រាវជ្រាវឱ្យបានហ្មត់ចត់ជាទីបំផុតនូវករណីនានាដែលយើងបានរកឃើញនាពេលថ្មីៗនេះ»។
លោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលក៏ថ្លែងដែរថា នៅពេលនេះមានមនុស្សចំនួន ២៦៦ នាក់ផ្សេងទៀត ដែលប៉ះពាល់ផ្ទាល់ និងមិនផ្ទាល់ជាមួយអ្នកជំងឺគឺកំពុងដាក់ឱ្យនៅដាច់ដោយឡែក ហើយក្នុងនោះ ៨៦ នាក់ ដែលប្រឈមនឹងហានិភ័យខ្ពស់បំផុតគឺកំពុងស្ថិតក្នុងការតាមដានដោយយកចិត្តទុកដាក់បំផុត។
ចំណែកលោកស្រី Li Ailan មន្ត្រីតំណាងអង្គការសុខភាពពិភពលោកប្រចាំកម្ពុជាបានលើកឡើងថា ជំងឺកូវីដ ១៩ គឺជាប្រភេទជំងឺថ្មី និងមានការឆ្លងរាលដាលលឿនដែលកម្ពុជាត្រូវតែត្រៀមខ្លួន និងផែនការជាមុនសម្រាប់ទប់ទល់ការឆ្លងរាលដាលនៅក្នុងសហគមន៍នាពេលខាងមុខ។
លោកស្រីថា ប្រសិនកម្ពុជាកើតមានករណីឆ្លងរាលដាលច្រើននៅពេលខាងមុខនោះនឹងមានតម្រូវការខ្ពស់នូវសម្ភារវេជ្ជសាស្ដ្រ និងបុគ្គលិកសុខាភិបាល ខណៈដែលប្រទេសជាច្រើននៅលើពិភពលោកគឺបានជួបប្រទះរួចហើយនូវការខ្វះគ្រែសម្រាប់ព្យាបាល ខ្វះឧបករណ៍សម្រាប់ជំនួយដល់ការដកដង្ហើម ខ្វះមន្ទីរពេទ្យព្យាបាល និងការខ្វះឧបករណ៍សម្រាប់ការពារខ្លួនរបស់មនុស្សម្នាក់ៗជាដើម។
លោកស្រីបញ្ជាក់ថា៖ «អង្គការសុខភាពពិភពលោកកំពុងធ្វើការងារជាមួយក្រសួងសុខាភិបាល និងវិស័យផ្សេងទៀត ដើម្បីឲ្យប្រាដកថា យើងមានការត្រៀមខ្លួនដ៏ល្អប្រសើរមួយ»៕
វីដេអូ៖