ភ្នំពេញៈ ក្រសួងសុខាភិបាលនៅព្រឹកថ្ងៃទី ០៨ ខែ តុលា ឆ្នាំ ២០២០ បានរកឃើញករណីវិជ្ជមានវីរុសកូវីដ ១៩ ថ្មីម្នាក់ទៀត លើបុរសជនជាតិឥណ្ឌូណេស៊ី ខណៈករណីព្យាបាលជាសះស្បើយមិនមាននោះទេ។
យោងសេចក្តីប្រកាសព័ត៌មានក្រសួងសុខាភិបាល ដែល ភ្នំពេញ ប៉ុស្តិ៍ ទទួលបានបុរសជនជាតិឥណ្ឌូណេស៊ី អាយុ ២៦ ឆ្នាំ ដែលរកឃើញវិជ្ជមានកូវីដ ១៩ នេះ មានអាសយដ្ឋានស្នាក់នៅសណ្ឋាគារមួយក្នុងក្រុង-ខេត្តព្រះសីហនុ ជាអ្នកធ្វើដំណើរមក ពីប្រទេសឥណ្ឌូណេស៊ី ដោយបានបន្តជើងហោះហើរនៅប្រទេសសាំងហ្គាពួ និងមកដល់កម្ពុជានៅថ្ងៃទី ០៦ ខែ តុលា ឆ្នាំ ២០២០។
សេចក្ដីប្រកាសនោះបានបញ្ជាក់ថា៖ «លទ្ធផលធ្វើតេស្ត លើវត្ថុសំណាករបស់គាត់ ដែលផ្តល់ដោយវិទ្យាស្ថានប៉ាស្ទ័រកម្ពុជាក្នុងរាជធានីភ្នំពេញ បានបង្ហាញវិជ្ជមានវីរុសកូវីដ ១៩។ បច្ចុប្បន្នអ្នកជំងឺត្រូវបានដាក់ឲ្យសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀត»។
ជាមួយគ្នានេះ ក្រសួងសុខាភិបាលក៏បានប្រាប់ឲ្យដឹងផងដែរថា អ្នកដំណើរតាមយន្តហោះជាមួយបុរសជនជាតិឥណ្ឌូណេស៊ី ដែលមានជំងឺកូវីដ ១៩ ខាងលើនេះ មានចំនួន ១១២ នាក់ ក្នុងនោះមានស្រី ២៣ នាក់។ ប៉ុន្តែលទ្ធផលតេស្តរបស់ពួកគេ អវិជ្ជមានវីរុសកូវីដ ១៩។ ទោះយ៉ាងណាក៏ដោយ ពួកគេទាំង ១១២ នាក់ ត្រូវបានដាក់ឲ្យធ្វើចត្តាឡីស័កចំនួន ២ ថ្ងៃ នៅវិទ្យាល័យបូរី ១០០ ខ្នងចំនួន ៤៩ នាក់ ដាក់តាមសណ្ឋាគារមួយចំនួនក្នុងរាជធានីភ្នំពេញចំនួន ៦២ នាក់ និងនៅស្ថានទូតសិង្ហបុរីចំនួន ១ នាក់។
សូមបញ្ជាក់ថា ភាពវិជ្ជមានវីរុសកូវីដ ១៩ របស់បុរសជនជាតិឥណ្ឌូណេស៊ីខាងលើនេះ បានធ្វើឲ្យចំនួនអ្នកឆ្លងវីរុសកូវីដ ១៩ ពីក្រៅប្រទេសចូលក្នុងកម្ពុជា គិតត្រឹមថ្ងៃទី ០៨ ខែ តុលា ឆ្នាំ ២០២០ មានចំនួនសរុប ២៨១ នាក់ ក្នុងនោះចំនួនអ្នកព្យាបាលជាសះស្បើយសរុបទូទាំងប្រទេសមានចំនួន ២៧៦ នាក់ និងអ្នកកំពុងបន្តសម្រាកព្យាបាលនៅមន្ទីរពេទ្យរដ្ឋចំនួន ០៥ នាក់។
ជាមួយគ្នានេះ លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានប្រាប់ ភ្នំពេញ ប៉ុស្តិ៍ នៅថ្ងៃព្រហស្បតិ៍ថា ក្រៅពីអ្នកជំងឺ ៥ នាក់ ដែលរួមមានបុរស និងស្រី្ត ជនជាតិឥណ្ឌូនេស៊ី ២ នាក់ កំពុងសម្រាកព្យាបាលនៅក្នុងមន្ទីរពេទ្យមិត្តភាពខ្មែរ-សូវៀត ក្នុងទីក្រុងភ្នំពេញ បុរស ២ នាក់ទៀត ដែលម្នាក់ជនជាតិហុងគ្រី និងម្នាក់ទៀតជាជនជាតិបារាំង កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប និង ស្ត្រីខ្មែរម្នាក់ដែលមកពីសហរដ្ឋអាមេរិក កំពុងសម្រាកព្យាបាលនៅក្នុងមន្ទីរពេទ្យ បង្អែកខេត្តបាត់ដំបងនោះ គ្មានអ្នកដែលកំពុងធ្វើចត្តាឡីស័កណាម្នាក់ មានវិជ្ជាមានវីរុសកូវីដ ១៩ នោះទេ។
ទោះជាបែបណាក៏ដោយលោកស្រី បានអំពាវនាវឲ្យអ្នកដែលកំពុងធ្វើចត្តាឡីស័កនៅតាមផ្ទះ និងនៅតាមមណ្ឌលនានា ត្រូវចូលរួមអនុវត្តឲ្យបានត្រឹមត្រូវនិងម៉ឺងម៉ាត់បំផុត តាមការណែនាំរបស់ក្រសួងសុខាភិបាល។
លោកស្រីបានពន្យល់ថា ការមិនគោរពបានត្រឹមត្រូវតាមការណែនាំរបស់ក្រសួងសុខាភិបាល ដូចជាការធ្វើដំណើរចល័តរបស់បុគ្គល ពីកន្លែងមួយទៅកន្លែងមួយ ឬទៅប៉ះពាល់ជាមួយអ្នកដទៃទៀត ក្នុងអំឡុងពេលធ្វើចត្តាឡីស័ក ឬនៅដាច់ដោយឡែកនេះ «នឹងអាចជាហេតុនាំឲ្យមានការចម្លងវីរុសកូវីដ ១៩ ពីបុគ្គលម្នាក់ទៅម្នាក់ បង្កើតឱកាសចម្លងទៅអ្នកផ្សេងទៀត និងក៏អាចជាឱកាសនាំឲ្យមានការចម្លងទៅក្នុងសហគមន៍ផងដែរ ប្រសិនបើបុគ្គលនោះមានផ្ទុកវីរុសកូវីដ ១៩»៕