.jpg)
គ្រូពេទ្យយកសំណាកដើម្បីធើតេស្តរកមេរោគកូវីដ ១៩ នាពេលកន្លងមក។ រូបថត TYDA Page
ភ្នំពេញៈ មនុស្សចំនួន ៣៧ នាក់បន្ថែមទៀត ត្រូវបានរកឃើញមានឆ្លងជំងឺកូវីដ ១៩ ក្នុងនោះអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ មានចំនួន ៣៥ នាក់ រីឯ ២ នាក់ទៀត ជាអ្នកដំណើរមកពីបរទេស ខណៈអ្នកជាសះស្បើយមានរហូតដល់ ៤៩ នាក់។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាលនៅព្រឹកថ្ងៃទី ០១ ខែ មេសា ឆ្នាំ ២០២១ នេះ។
ក្រសួងបានឱ្យដឹងថាអ្នកឆ្លងថ្មីក្នុងព្រឹត្តិការណ៍សហគមន៍លើកទី៣ នេះក្នុងរាជធានីភ្នំពេញនៅតែមានកម្រិតខ្ពស់ដែលមានរហូតដល់ ៣០ នាក់ ស្របពេលនៅខេត្តកណ្ដាលមានតែចំនួន ៣ នាក់ និងខេត្តព្រះសីហនុមាន ២ នាក់។
ចំណែកមនុស្ស ២ នាក់ផ្សេងទៀត ដែលរកឃើញឆ្លងកូវីដ ១៩ ដែរនោះ គឺជាអ្នកដំណើរមកពីបរទេសក្នុងនោះមានស្ត្រីជនជាតិឥណ្ឌូនេស៊ី អាយុ ១៩ ឆ្នាំ ស្នាក់នៅខេត្តបន្ទាយមានជ័យ ដែលបានធ្វើដំណើរមកពីប្រទេសសិង្ហបុរីមកដល់ប្រទេសកម្ពុជា នៅថ្ងៃទី ៣០ ខែមីនា និងម្នាក់ទៀតជាបុរសជនជាតិឥណ្ឌូនេស៊ី អាយុ ៣៩ ឆ្នាំ ស្នាក់នៅខណ្ឌចំការមនរាជធានីភ្នំពេញ ធ្វើដំណើរមកពីប្រទេសឥណ្ឌូនេស៊ី បន្តជើងហោះហើរនៅប្រទេសសិង្ហបុរី មកដល់ប្រទេសកម្ពុជា ថ្ងៃទី ១៨ ខែមីនា។
គិតត្រឹមព្រឹកថ្ងៃទី ០១ ខែ មេសា ឆ្នាំ ២០២១ នេះ កម្ពុជាមានអ្នកឆ្លងសរុបចំនួន ២ ៤៧៧ នាក់ អ្នកជាសះស្បើយចំនួន ១ ២៤០ នាក់ អ្នកកំពុងព្យាបាលចំនួន ១ ២១៩ នាក់ និងអ្នកស្លាប់ចំនួន ១៤ នាក់៕
