ភ្នំពេញៈកម្ពុជារកឃើញអ្នកមានវិជ្ជមានកូវីដ ១៩ ម្នាក់ទៀត នៅថ្ងៃទី ២៧ ខែតុលា នេះ ដែលធ្វើឱ្យចំនួនសរុបអ្នកជំងឺនេះកំពុងសម្រាកព្យាបាលមានរហូតចំនួន ៥ នាក់។ នេះបើយោងតាមសេចក្តីជូនព័ត៌មានរបស់ក្រសួងសុខាភិបាល។
សេចក្តីជូនព័ត៌មាននេះបានឱ្យដឹងថា ស្រ្តីជនជាតិបារាំងអាយុ ២៣ ឆ្នាំ ដែលបានធ្វើដំណើរមកពីប្រទេសបារាំង ដោយបន្តជើងហោះហើរនៅប្រទេសសឹង្ហបុរី និងមកដល់ប្រទេសកម្ពុជា នៅថ្ងៃទី ២៥ ខែតុលា កន្លងមកនេះ។
ក្រសួងបានបញ្ជាក់ថា៖ «លទ្ធផលធ្វើតេស្តវត្ថុសំណាករបស់បុគ្គលនេះ គឺវិជ្ជមានវីរុសកូវីដ ១៩ ដែលផ្តល់ដោយវិទ្យាស្ថានប៉ាស្ទ័រកម្ពុជា ហើយបច្ចុប្បន្ននេះ អ្នកជំងឺរូបនេះត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្ត-ភាពខ្មែរ-សូវៀត»។
ចំពោះអ្នកធ្វើដំណើរតាមយន្តហោះជាមួយអ្នកជំងឺជនជាតិបារាំងរូបនេះ មានចំនួន ១០៧ ក្នុងនោះមានស្រី ៤៧ នាក់ និងកុមារចំនួន ៣ នាក់។ ពួកគេទាំងនោះត្រូវបានដាក់ឱ្យធ្វើចត្តាឡីស័កចំនួន ១៤ ថ្ងៃ នៅកន្លែងផ្សេងៗគ្នា ក្នុងនោះអ្នកដំណើរចំនួន ១៩ នាក់ នៅវិទ្យាល័យបូរី ១០០ ខ្នង ឯអ្នកដំណើរចំនួន ៨៨ ផ្សេងទៀតដាក់នៅសណ្ឋាគារបីកន្លែងខុសៗគ្នាក្នុងទីក្រុងភ្នំពេញ។
តាមរបាយការណ៍របស់ក្រសួងសុខាភិបាល គិតត្រឹមថ្ងៃទី ២៧ ខែតុលា នេះ នៅប្រទេសកម្ពុជា មានអ្នកមានវីរុសកូវីដ ១៩ សរុបចំនួន ២៨៨ នាក់ (ស្រី ៥៩ នាក់ និងបុរស ២២៩ នាក់) ដោយក្នុងនោះអ្នកព្យាបាលជាសះស្បើយសរុបទូទាំងប្រទេសមានចំនួន ២៨៣ នាក់ ស្មើនឹង ៩៨,២៦% ធៀបនឹងចំនួនអ្នកមានវីរុសកូវីដ ១៩ ទាំងអស់។
ចំណែកអ្នកសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត មានចំនួន ៥ នាក់ ក្នុងនោះបុរសជនជាតិខ្មែរ ១ នាក់ ស្រ្តីជនជាតិខ្មែរ ១ នាក់ បុរសជនជាតិប៉ូឡូញ ១ នាក់ បុរសជនជាតិបារាំង ១ នាក់ និងស្រ្តីជនជាតិបារាំងចំនួន ១ នាក់។
ជាមួយគ្នានេះផងដែរ ក្រសួងសុខាភិបានបានក្រើនរម្លឹកជាថ្មីទាក់ទងនឹងការការពារ និងប្រុងប្រយ័ត្នពីការឆ្លងជំងឺកូវីដ ១៩ ក្នុងអំឡុងពេលឈប់សម្រាកក្នុងពិធីបុណ្យអ៊ំទូក បើទោះបីជាកម្ពុជាមិនបានប្រារព្ធព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក នៅរាជធានីភ្នំពេញក៏ដោយ ប៉ុន្តែរាជរដ្ឋាភិបាលបានអនុញ្ញាតឱ្យមានការប្រារព្ធពិធិនេះនៅតាមបណ្តាខេត្តនានា។
គួរបញ្ជាក់ផងដែរថា កាលពីដើមខែតុលាកន្លងមកនេះ រដ្ឋមន្រ្តីក្រសួងសុខាភិបាល លោក ម៉ម ប៊ុនហេង បានចេញសេចក្តីណែនាំ ក្រើនរម្លឹក និងអំពាវនាវសារជាថ្មី ទៅដល់សាធារណជន ក្រសួងពាក់ព័ន្ធ អាជ្ញាធរ ថ្នាក់ក្រោមជាតិ និងប្រជាពលរដ្ឋទាំងអស់ត្រូវរួមគ្នាទប់ស្កាត់ការចម្លងវីរុសកូវីដ ១៩ ទៅក្នុងសហគមន៍ និងបន្តអនុវត្តតាមការណែនាំរបស់ក្រសួងសុខាភិបាល៕