.jpg)
ស្លាកសញ្ញាតម្រូវឲ្យពាក់ម៉ាសនៅមុខអគារមួយក្នុងរាជធានីភ្នំពេញ។ រូបថត យូសុះ អាប់ឌុលរ៉ាហ៊ីម
ភ្នំពេញៈ ក្រសួងសុខាភិបាល ក្រើនរំឭកដល់បណ្តារាជធានី ខេត្ត ក្នុងការពង្រឹងបន្ថែម នូវវិធានការទប់ស្កាត់ការរាតត្បាតជំងឺកូវីដ១៩ និងការធ្វើចត្តាឡីស័ក នៅមូលដ្ឋានរបស់ខ្លួន ខណៈវិធានការបិទខ្ទប់ នៅភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាល គឺជាបទពិសោធថ្មី ដែលត្រូវចងចាំ។
ការប្រកាសក្រើនរំឭកនេះ បានធ្វើឡើង ដោយរដ្ឋមន្ត្រីក្រសួងសុខាភិបាល លោក ម៉ម ប៊ុនហេង ក្នុងលិខិតមួយច្បាប់ ចុះថ្ងៃទី ២០ ឧសភា ផ្ញើទៅកាន់បណ្តាលរាជធានី ខេត្តទូទាំងប្រទេស ក្រោយពីទទួលបានការឯកភាពពីលោកនាយករដ្ឋមន្ត្រី ហ៊ុន សែន លើលិខិតចុះថ្ងៃទី១៣ ខែឧសភា ឆ្នាំ ២០២១ របស់ក្រសួងសុខាភិបាល ស្ដីពីរបាយការណ៍កិច្ចប្រជុំគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ១៩ នាថ្ងៃទី១២ ខែឧសភា ឆ្នាំ ២០២១។
លិខិតដដែលនេះ បានបញ្ជាក់ថា ការដាក់វិធានការបិទខ្ទប់នៅភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាល គឺជាមេរៀនបទពិសោធ ដែលគួរត្រូវបានដកស្រង់ ដើម្បីប្រតិបត្តិនៅតាមមូលដ្ឋានរបស់ខ្លួន ទៅតាមស្ថានភាពជាក់ស្តែង។
ជាមួយនឹងបទពិសោធនេះ ក្រសួង បានជំរុញឲ្យបណ្តារាជធានី ខេត្តទាំងអស់ ត្រូវបន្តពង្រឹងការអនុវត្តច្បាប់ វិធានការសុខាភិបាល ការធ្វើចត្តាឡីស័ក និងវិធានការរដ្ឋបាល ដើម្បីទប់ស្កាត់ការឆ្លងរាលដាលជំងឺកូរីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ឱ្យមានប្រសិទ្ធភាពខ្ពស់។
ក្រសួងបានបញ្ជាក់បន្ថែមថា៖ «ត្រូវលើកកម្ពស់ការយល់ដឹងអំពីវិធានការបង្ការជំងឺកូវីដ១៩ ឱ្យកាន់តែស៊ីជម្រៅទៅដល់បុគ្គល គ្រួសារ និងសហគមន៍។ អាស្រ័យដូចបានជម្រាបជូនខាងលើ សូមឯកឧត្តម លោកជំទាវ អភិបាលនៃគណៈអភិបាលរាជធានី ខេត្ត អនុវត្តឱ្យមានប្រសិទ្ធភាពខ្ពស់»។
ព្រឹត្តិការណ៍ឆ្លងសហគមន៍ ២០ កុម្ភៈ បានធ្វើឲ្យកម្ពុជា មានចំនួនអ្នកឆ្លងជំងឺកូវីដទូទាំងប្រទេស កើនឡើងជាង ២ ៣០០០ នាក់ និងចំនួនអ្នកស្លាប់ឡើងដល់ ១៦៤ នាក់។ នេះបើគិតត្រឹមថ្ងៃទី ២០ ឧសភា តាមសេចក្តីប្រកាសរបស់ក្រសួងសុខាភិបាល៕
